«Qazgıdromet» 2026 jylǵy 9-11 maýsym aralyǵyna arnalǵan aýa raıy boljamyn jarııalady, dep habarlaıdy Egemen.kz.
Sınoptıkterdiń málimetinshe, el aýmaǵynyń basym bóliginde batys sıklonynyń áseri saqtalady. Sonyń saldarynan aýa raıy qubylmaly bolyp, jańbyr jaýyp, naızaǵaı oınaıdy. Keı óńirlerde jel kúsheıip, burshaq jaýýy yqtımal.
9-11 maýsym kúnderi elimizdiń soltústik-batysynda jáne soltústiginde, al 11 maýsymda ońtústik-shyǵys óńirlerinde jaýyn-shashyn kútiledi.
Al kezeńniń basynda shyǵys aımaqtarda, al ortasynan bastap ońtústik-batysta aýa raıy negizinen jaýyn-shashynsyz bolady.
Temperatýralyq kórsetkishterge kelsek, batys óńirlerde kúndiz aýa temperatýrasy +27...+35 gradýsqa deıin kóteriledi. Soltústik oblystarda aýa temperatýrasy +17...+28 gradýsqa deıin tómendeıdi. Soltústik-shyǵys pen ortalyq óńirlerde aptap ystyqtyń beti qaıtyp, +25...+33 gradýs shamasynda bolady.
Al ońtústik jáne ońtústik-shyǵys óńirlerde +27...+35 gradýs aralyǵynda saqtalsa, shyǵysta kún raıy áli de ystyq bolyp, aýa temperatýrasy +32...+39 gradýsqa deıin jetedi.
Eske sala keteıik, «Qazgıdromet» usynǵan boljamǵa sáıkes, maýsym jáne tamyz aılary ádettegiden ystyq bolady.