Úkimet otyrysynda Premer-mınıstr Oljas Bektenov barlyq jedel áreket etý qyzmetteri joǵary daıyndyq rejımine kóshirilýi tıis ekenin atap ótti, dep habarlaıdy Egemen.kz.
Premer-mınıstr Oljas Bektenov Úkimet otyrysynda jazǵy týrıstik maýsymdaǵy qaýipsizdik máselelerine erekshe nazar aýdardy.
«Bıylǵy jazǵy týrıstik maýsymǵa jeke toqtalǵym keledi. Birinshi kezekte, barlyq ákimdikter men mınıstrlikter demalýshylardyń qaýipsizdigin qamtamasyz etý boıynsha qosymsha aldyn alý sharalaryn qabyldaýy tıis. Demalýshylar úshin kýrorttyq aımaqtardy daıyndaý jumystaryn aqparattyq turǵydan barynsha belsendi túrde jarııalaý qajet. Sý aıdyndaryndaǵy qaýipsizdik erejeleri men órt qaýipsizdigi talaptaryn saqtaý boıynsha túsindirý jumystaryn júıeli negizde júrgizý kerek. Barlyq jedel áreket etý qyzmetteri joǵary daıyndyq jáne monıtorıng rejımine kóshirilýi tıis. Bul jumysqa volonterlerdi de tartqan jón», dedi Oljas Bektenov.
Oqýshylardyń dene shynyqtyrý sabaqtary Almaty SuperSki kýrortynda ótedi
Premer-mınıstr týrıster úshin baǵyt-baǵdar kórsetkishteri, demalys aımaqtarynda sanıtarııalyq talaptardyń saqtalýy jáne jaýapty qyzmetterdiń jumysyn úılestirý máselelerine erekshe nazar aýdardy.
«Barlyq demalys oryndarynda, saıabaqtarda jáne jaǵajaı aımaqtarynda ártúrli tilderde arnaıy aqparattyq belgiler, shemalar men baǵyt-baǵdar kórsetkishteri ornatylýǵa tıis. Ákimdikter demalys oryndarynyń menshik ıelerimen birlesip, tazalyq ári sanıtarııalyq talaptardyń qatań saqtalýyn qamtamasyz etýi qajet. Týrısterdiń qaýipsiz ári jaıly demalysy osy salanyń negizgi standartyna aınalýǵa tıis. Jedel úılestirý shtabyna muny erekshe baqylaýǵa alýdy tapsyramyn», dedi Úkimet basshysy.
Buǵan deıin týrızmniń el ekonomıkasyna qosqan úlesi 5 trln teńgege jetkenin habarlaǵan edik.