Prezıdentke Abaı oblysynyń 2025 jylǵy áleýmettik-ekonomıkalyq damý qorytyndylary jáne bıylǵy tórt aıdaǵy kórsetkishteri týraly esep berildi, dep habarlaıdy Egemen.kz Aqordanyń baspasóz qyzmetine silteme jasap.
Berik Ýálıdiń aıtýynsha, ótken jyly óńirlik jalpy ónim kólemi 3,9 trıllıon teńgege jetti. Bıyl qańtar-sáýir aılarynda qysqa merzimdi ekonomıkalyq ındıkator 103,8 paıyzdy qurady. Investısııa kólemi 19,4 paıyzǵa ósip, ónerkásip, óńdeý sektory, aýyl sharýashylyǵy, qurylys jáne kólik salalarynda oń dınamıka saqtaldy.
Memleket basshysyna ınvestısııa tartý baǵytynda atqarylǵan jumystar jóninde baıandaldy. Byltyrdan bastap jalpy ınvestısııalyq pýlǵa kiretin jobalar sany 29-dan 112-ge deıin ulǵaıdy. Tartylatyn ınvestısııa kólemi 2,2 trıllıon teńgeden 4,4 trıllıon teńgege deıin artty. Iri ınvestısııalyq jobalar qatarynda quny 577,5 mıllıard teńge bolatyn «Aıagóz – Baqty» temirjol jelisiniń qurylysy júrgizilýde. Semeı qalasynda quny 714 mıllıard teńgeni quraıtyn jańa jylý elektr ortalyǵy men jalpy ınvestısııa kólemi 255 mıllıard teńge bolatyn taý-ken baıytý kombınatyn salý jobalary júzege asyrylyp jatyr.
Oblys ákimi arnaıy ekonomıkalyq aımaq qurý jumystary týraly da baıandady. Semeı qalasynda josparlanǵan aımaqta jalpy quny 400 mıllıard teńgeni quraıtyn óndiristik jobalardy iske asyrý jáne 2500 jańa jumys ornyn ashý kózdelgen. Úsh iri joba boıynsha usynys kelip tústi.
Memleket basshysy Danııa halqyn Konstıtýsııa kúnimen quttyqtady
Qasym-Jomart Toqaevqa Alakól týrıstik aımaǵyn damytý barysy týraly aqparat berildi. Bıyl jaǵalaý ınfraqurylymyn jańǵyrtýǵa 15,4 mıllıard teńge bólingen. Sonyń ishinde elektr jelilerin tartý jáne Úrjar áýejaıynyń termınalyn rekonstrýksııalaý úshin Arnaýly memlekettik qordan 11,6 mıllıard teńge qarastyrylǵan.
Prezıdentke óńirdegi ınjenerlik ınfraqurylymdy jańǵyrtý baǵytynda qolǵa alynǵan jobalar tanystyryldy. Atap aıtqanda, sýmen jabdyqtaý, káriz jáne jylý jelilerin jańartý, Semeı qalasyndaǵy jańa kópir qurylysyn aıaqtaý, turǵyn úı qurylysy men jol ınfraqurylymyn damytý jumystary baıandaldy.
Kezdesý sońynda Memleket basshysy óńirge ınvestısııa tartý jumystaryn kúsheıtý, ekonomıkany ártaraptandyrý, ınfraqurylymdy jańǵyrtý jáne halyqtyń turmys sapasyn jaqsartý, «Abaıǵa qurmet» aksııasyn laıyqty deńgeıde júzege asyrý jóninde birqatar naqty tapsyrma berdi.
Prezıdent Almaty qalasynyń ákimin qabyldady