Qazaqstan quramasy joldastyq kezdesýde Majarstan quramasynan jeńilis tapty, dep habarlaıdy Egemen.kz
Oıynnyń alǵashqy taımynda qazaq fýtbolshylary belsendi óner kórsetti. Bizdiń jigitter joǵary qarqynmen qysym kórsetip, birneshe qaýipti shabýyl jasady. Sonyń nátıjesinde 9-mınýtta Maksım Samorodovtyń pasynan Sergeı Malyı golǵa aınaldyrdy.
Úzilisten keıin alań ıeleri bastamany óz qolyna aldy. 53-mınýtta Domınık Soboslaı aıyp alańyna baǵyttalǵan pasty sátti paıdalanyp, tarazy basyn teńestirdi.
Alaıda qazaqstandyqtarǵa oıyn qarqynyn saqtap qalý qıynǵa soqty. 62-mınýtta Maksım Samorodovqa tóreshi eskertý jasady. Ekinshi sary qaǵaz alǵan Samorodov alańnan qýyldy.
San basymdyǵyn paıdalanǵan vengrııalyqtar bes mınýttan keıin alǵa shyqty. 67-mınýtta Andrash Shefer alystan dál soqqy jasap, Qazaqstan qaqpasyna gol soqty.
Osydan keıin oıyn tartysty kúreske ulasty. Keı sátterde oıyn qarqyny joldastyq kezdesýdiń deńgeıinen asyp tústi.
Kezdesýdiń sońǵy núktesin Raımýnd Tot qoıdy. Ol qosymsha ýaqytta Qazaqstan quramasynyń qaqpasyna úshinshi goldy soǵyp, kezdesýdiń qorytyndy nátıjesin belgiledi. Esep 3:1.
Goldar: Sergeı Malyı, 9 (0:1); Domınık Soboslaı, 52 (1:1); Andrash Shefer, 67 (2:1); Raımýnd Tot, 90+2 (3:1).
Qazaqstan men Vengrııa quramalary úshin bul maýsymdaǵy ekinshi joldastyq match boldy. Buǵan deıin Talǵat Baısýfınov shákirtteri Armenııa quramasymen 1:1 esebimen teń tússe, majarlyqtar Fınlıandııany 2:1 esebimen jeńgen edi.