Sýbsıdııa – úlken jeńildik

Qyzyljar óńirinde jumys isteıtin 3800-den astam seriktestikter men sharýa qojalyqtary kóktemgi egis naýqanyn óz merziminde aıaqtaýǵa jumyla kirisken. Olardyń arasynda Úkimet tarapynan beriletin sýbsıdııalyq jáne nesıelik jeńildikterdi tıimdi paıdalanyp, tabystyń taı­qazanyn tasytyp júrgen qurylymdar barshylyq. Solardyń biri – Aqqaıyń aýdanyna qarasty «Zımın» JShS.  Onyń jetekshisi V.Zımındi qaına­ǵan  qyzý eńbek ortasynda jolyqtyryp, osy másele jóninde oı bólisken edik. – Topyraqta ylǵal jetkilikti. Kúnniń jylýy molynan tógilip, barlyq múmkindikti paıdalanyp eńbek etýge tabıǵattyń ózi janashyrlyq tanytyp tur. Kóktemniń aýa raıy qubylmaly. Sondyqtan ár kúni biz úshin erekshe qymbat, – deı kelip,  6000 gektar alqaptyń 4500 gektaryna  dándi daqyldar egiletinin, qalǵany parǵa qaldyrylǵanyn jetkizdi. Jaýapty naýqanǵa 40-qa jýyq  mehanızator, 9 agregat tartylǵan. Vladımır Dmıtrıevıch birneshe jyldan beri Úkimettiń kómegine súıenip, sharýashylyǵyn túzepti. Bıyl 10 mıllıon teńge nesıe alyp, bir bóligin eginshilik salasyna baǵyt­tasa, qalǵanyna  Shyǵys Qazaqstan oblysynan 50 iri qara malyn satyp alypty. Budan tysqary 2 mıllıon teńge sýbsıdııa alýǵa qajetti qujat­tar­dy ótkizip qoıypty. – Biz sekildi shaǵyn sharýashylyqtarǵa memleket qol ushyn bermegende aldaǵy jaǵdaıymyzdy boljaý qıyn bolar edi, – deıdi ol erteńge degen senimdi únmen. Oblystan shalǵaıdaǵy Tımırıazev aýdanynda ornalasqan «Raıymbek jáne kompanııa»» fermerlik sharýashylyq dırektorynyń orynbasary Dáýren Nurahmetov «Azyq-túlik» kelisim-shart korporasııasy» AQ-tyń jergilikti fılıaly arqyly byltyr 10 mıllıon teńge jeńildikti nesıe alsa, bıylǵysy – 17 mıllıon. Sóıtip, qajetti  dızel otynyn da, mıneraldyq tyńaıtqyshty da jetkizip alǵan. 2000 gektar egistik alqapqa sýbsıdııa almaq oıy bar. Onyń  aıtýynsha, nesıe jáne sýbsıdııa alý joldary da jeńildetilgen.   Oblystyq aýyl sharýashylyǵy basqarmasy­nyń bastyǵy Nurlan Bıbolaev Úkimet tarapynan kór­setilip jatqan qarjylyq kómekter jaıly bylaı deıdi: – Jyl ótken saıyn jeńildikti sýbsıdııalar men nesıelerdiń mólsheri ulǵaıyp keledi. Bıyl  mıneraldyq tyńaıtqysh úshin ǵana 1,1 mıllıard teńgeniń  sýbsıdııasy berildi. Gerbısıdke 318 mıllıon teńge bólindi. Qajetti 63 myń tonna dızel otyny da jeńildikpen alyndy. Tutastaı al­ǵanda, kóktemgi-kúzgi dala jumystaryn atqarýǵa  qar­jylyq ınstıtýttar men qurylymdar arqyly 20 mıllıard teńge qarastyrylǵan.  Budan tys­qa­ry agroónerkásip keshenin damytýǵa 6,6 mıllıard  teńge kóleminde sýbsıdııa  jumsaý kózdelgen. Bul – ótken jylǵa qaraǵanda 1,3 mıllıard teńgege  kóp. Byltyr  qarapaıym tásilmen óńdelgen bir gektar bıdaı alqabyna 350 teńge tólense, bıyl 550 teńgege kóbeıdi. Al, ǵylymı tehnologııa qoldanylatyn bolsa,  ár gektar alqapqa 750 teńge beriledi. Sol sııaqty kartop, kókónis, maıly daqyldar ósirýshilerge de arzandatylǵan baǵa qoldanylady. Mundaı qamqorlyqtyń ıgiligin shaǵyn sharýashylyqtar óte-móte kórip otyr. О́mir ESQALI. Soltústik Qazaqstan oblysy.