Jastarǵa senim zor

Malaızııanyń Penang qalasynda aýyr atletıkadan 20 jasqa deıingi jasóspirimder arasyndaǵy álem birinshiligi jalaýyn kóteredi. Álemniń ár túkpirinen jınalǵan jastardyń dúbirli dodasynda Qazaqstan quramasy da baq synaıdy. Elimizdiń bas komandasynda sporttyń bul túri boıynsha álem chempıonaty men Olımpııa oıyn­darynda olja salǵandar kóptep sanalady. Endi, mine, sol sańlaqtardyń jolyn jalǵas­tyrý qurmetine jas órender ıe bolyp otyr. Jalpy, bizdiń ziltemirshilerdiń arasynda jastardyń túrli halyqaralyq jarystarda jasyndaı jarqyrap júrgenin kórýge bolady. Bizdiń sońǵy bes-alty jylǵy nátıjelerimiz osyny kórsetip otyr. Osy kúnderi elimizdiń maqtanyshyna aınalǵan, Olımpıada chempıony Ilıa Ilın 2005 jáne 2006 jyldary jasóspirimder arasyn­da álem chempıony atanǵan bolatyn. Ár jyl­dary sol jarystarda Roman Rýsıanovskıı, Vladımır Sedov, Qýanysh Rahatov, Ibragım Bersanov, Nadejda Nogaı, Ádilbek Balqaev syndy bir shoǵyr órender atoı sal­dy. Joǵaryda atalǵan keıbir sportshy­larymyzdyń jasaǵan rekordtary áli kúnge deıin jańarmaı, kúshinde tur. Jasóspi­rim­derdiń arasyndaǵy eń úlken báseke – byltyrǵy jylǵy Dúnıejúzilik Olımpıadada Qazaqstan quramasy 1 altyn, 1 kúmis jáne 1 qola medaldi jeńip alyp, aıdy aspanǵa shyǵardy. Bul básekede Jazıra Japarqul altynnan alqa taǵynsa, Zúlfııa Chınshanlo men Rústem Sybaı júldegerler sanatyna qosyldy. Olardyń da kórsetkishteri kópshilik kóńilinen shyqty. Malaızııadaǵy jarysqa Qazaqstannyń úz­dik 15 ziltemirshisi attandy. Qyzdar saıy­synda Margarıta Elıseeva (53 kılo), Faına Sybanbaeva (58 kılo), Karına Gorıcheva (63 kılo), Anastasııa Shvabaýer (63 kılo), Jazıra Japarkul (69 kılo), Anna Nurmaǵambetova (75 kılo) jáne Nadejda Nogaı ( 75 kılodan joǵary) kúsh synasady. Erler arasynda Erbol Jolamanov (56 kg.), Aleksandr Abramov (56 kg.), Aleksandr Kım (69 kg.), Nursultan Rahatov (77 kg.), Erbol Meıirmanov (85 kg.), Rústem Sybaı (85 kg.), Aleksandr Zaıchıkov (94 kg.) jáne Ibragım Bersanov (105 kg.) óner kórsetedi. – Bizder bul jarysta keminde eki altyn alýǵa tıispiz. Bul rette bapkerlerdiń tarapy­nan Aleksandr Zaıchıkov pen Nadejda Nogaı­dyń múmkindigi joǵary baǵalanýda. Sonymen qatar, Jazıra Japarqul men Ibargım Ber­sanov­qa da zor senim artylyp otyr. Basqa sportshylarymyz da Malaızııaǵa jaı týrıst retinde bara jatqan joq. Jarys jo­lyn­da olar da jankeshtilik tanytyp, Qazaq­stan quramasynyń qorjynyn toltyrý úshin barynsha kúsh salady. Sóz oraıy kelgende, bizdiń sportshylardyń álem birinshiligine esh alańsyz daıarlanýyna Týrızm jáne sport mınıstrligi, respýblıka Aýyr atletıka federasııasy, «Samuryq-Qazyna» ál-aýqat qory barynsha qolaý kórsetti, – deıdi memlekettik jattyqtyrýshy Meńdihan Tápsiruly. Bilikti bapkerdiń oıynyń iske asatyny sózsiz. О́ıtkeni, joǵaryda atalǵan úsh sportshynyń úsheýi de kóptegen jarys­tarda ózderin jaqsy qyrynan kórsetip, zor tabystarǵa jetken. Máselen, Ibragım Bersanov jasóspirimder arasyndaǵy byl­tyrǵy jylǵy álem chempıony. Aleksandr Zaıchıkov sol jarysta úshinshi satyǵa taban tiredi. Nadejda – bıyl Perýdiń Lıma qalasynda ótken 17 jasqa deıingilerdiń álem birinshiliginde altynnan alqa taǵy­nyp, úsh ret álemdik rekordqa ózgeris engizdi. Jazıra – ótken jylǵy jasóspirim­derdiń Dúnıejúzi­lik Olımpıadasynyń jeńimpazy. Budan basqa, Dúnıejúzilik Olımpıadada qola medaldi enshilegen Rústem Sybaı men Azııa chempıony Anastasııa Shvabaýerdi de bóle-jara ataǵan jón. Basqa sportshylardy da osal dep aıtýǵa bolmas. Olardyń barlyǵy da elishilik jarystarda júlde alyp júrgen asa daryndy aýyr atletter. Dastan KENJALIN.