«Altyn belgini» Alashtyń ardaqtylary tapsyrdy

Mańǵystaý oblysynyń bilim salasynyń jetistikteri jıi aıtylyp keledi. Árıne, aıtylýǵa laıyq bolǵan soń aıtylady. Olaı deıtinimiz, osydan bes jyl buryn respýblıka boıynsha Ulttyq biryńǵaı testileý qorytyndysynda sońǵy oryndaǵy oblys úsh jyldan beri kósh bastap keledi. Sońǵy bes jylda «Altyn belgi» ıeleriniń qatary 6 ese ósti. Byltyr 54 oqýshy «Altyn belgige» ıe bolsa, ol kórsetkish osy jyly 71-ge jetip otyr. Bıyl el Táýelsizdiginiń 20 jyldyǵyna óz bilimderin shashý etken ul-qyzdarymyzdyń qýanyshynda shek bolmady. Erekshe uıymdastyrylǵan saltanatqa alystan arnaıy kelgen alashtyń ardaqtylary Qazaqstannyń Eńbek Eri Ábish Kekilbaıuly, áıgili akademıkter Salyq Zımanov, Tóregeldi Sharmanov, Kamal Ormantaev, Raqymjan Eleshev bilimpazdarǵa «Altyn belgi» men syı-syıapattaryn tapsyryp, aq batalaryn berdi. Al oblys ákimi Qyrymbek Kósherbaev 125 upaı jınap, aımaqta eń úzdik kórsetkishke jetken Aqtaýdaǵy ekonomıkalyq lıseıdiń oqýshysy G.Jarylǵapqyzyna arnaıy syı-qurmet kórsetti. Jolaman BOShALAQ, Mańǵystaý oblysy.