Qazaqstan – Reseı: Birlesken áskerı-áýe jattyǵýlary

Týǵan Otanǵa adal qyz­met etý, onyń qaýipsizdigin kózdiń qarashyǵyndaı saq­tap, qorǵaý osy maman­dyq­ty tańdap alǵan árbir azamattan, eń aldymen, joǵa­ry jaýapkershilikti, kásibı iskerlik pen biliktilikti talap etetindigi sózsiz. Qorǵa­nys mınıstriniń birinshi orynbasary, general-polkovnık Sáken Jasuzaqov­tyń pikirinshe, «áskerı ká­sibı biliktilik tájirıbe jınaq­taý men mol izdenis nátıjesinde ǵana keledi». Almaty oblysynyń «Qy­zylaǵash» polıgonynda jaqynda ótkizilgen «Áýe kúshteri-2011» halyq­ara­lyq ushý-taktıkalyq jat­tyǵýlary, oǵan qatysýshy ushqyshtar úshin, mine, osyn­daı tájirıbe jınaq­taý­ǵa septesti desek qa­telespeımiz. Halyqaralyq ushý-taktıkalyq «Áýe kúsh­teri – 2011» jattyǵýyna Qazaqstan Respýblıkasy ta­rapynan Taldy­qorǵan­daǵy №21751 áskerı bóli­miniń «Sý-27», «Mıg-27», «Mıg-23» jańartylǵan bom­balaýshy joıǵysh ushaq­tary men Qaraǵandy­daǵy №50185 áskerı bóliminiń «Mıg-31» joı­ǵysh ushaqtarymen qatar, Áýe qorǵanysy kúshteriniń Balqash áýe bazasynan «L-39» oqý-jattyqtyrý ushaq­ta­rynyń ushqysh quramda­ry qatysty. Reseı men Qazaqstan memleketteriniń áýe top­tary qatysqan halyq­ara­lyq ushý-taktıkalyq jat­tyǵýlarynyń eń negizgi ke­zeńi uıymdastyrylǵan «Qy­zyl­aǵash» áskerı polı­gonyndaǵy «áskerı beıbit shabýylda» paıdalanylǵan zymyrandar men bombalar kózdegen nysanasyna dál jáne aldyn ala belgilengen ýaqytta túsýimen erekshelendi. Árıne, munyń ózi oǵan qatysýshylardyń túgel­deı derlik joǵary daıyn­dyqpen kelgendigin jáne ózderine júktelgen kúrdeli tapsyrmalarǵa joǵary jaýapkershilikpen qaraǵandyǵyn aıqyn ańǵartady. Sáken Jasuzaqovtyń aı­týyn­sha, halyqaralyq ushý-taktıkalyq jattyǵýlary Reseı Áskerı-áýe kúshterimen ózara qarym-qatynas baǵdar­lamasy aıasynda uıymdas­tyrylǵan. – Bizder jaqynda eli­mizdiń ońtústiginde «Qara­taý-2011» atty iri jattyǵýdy aıaqtadyq. Bul jattyǵýlar­dyń ózi terrorızmmen, eks­tre­mızmmen kúres arnaýly jat­tyǵýlary aıasynda boldy. Al, endi búgingi «Áýe kúsh­teri – 2011» halyqaralyq ushý-taktıkalyq jattyǵý­laryna Qazaqstan Respýblı­kasy men Reseı Federasııasy qarýly kúshteriniń barlyq bólimsheleri qatysýda. Reseı Federasııasymen birlese oty­ryp, áýe operasııalaryna qarsy joba daıyndadyq. Má­selen, jerdegi shartty túrde belgilengen nysandarǵa ushaq­tar aýqymdy soqqy bergen soń, bizder qanatty ra­ketalardy jiberdik. Qanatty raketalar sáýlesin alǵash ret jasap shyǵardyq, mundaı tematıka bizde buryn bol­maǵandyqtan, bul bizder úshin jańalyq, – deıdi Sáken Ádilhanuly. Qysqasha aıtqanda, «Áýe kúshteri-2011» jat­tyǵýla­ry­na qatysýshylar ózderiniń aldyna qoıǵan úlken mindetteri men maqsattarynyń úde­sinen shyqty. Bul jattyǵý­dyń kelesi kezeńi Semeı po­lıgonynda ótpek. Bir quptar­lyǵy, TMD elderi aıasynda áýe qorǵanysynyń birtutas júıesi bar kórinedi. Negizinen bul máselemen tereńirek aınalysyp, arada tolyq túsi­nistik pen berik yntymaq­tastyq ornaýy úshin ol odan ári jetildirilmek eken. Mun­daı jattyǵýlardyń paıdasy orasan jáne munyń Qazaq­stannyń ǵana emes, Reseıdiń de qaýipsizdigin nyǵaıtýǵa yqpaly mol ekeni anyq. – «Áýe kúshteri-2011» áýe-taktıkalyq jat­tyǵý­lary barysynda jınaqtal­ǵan áskerı tájirıbe bizdiń eki memlekettiń, ıaǵnı Qa­zaq­stan men Reseıdiń ǵana ujymdyq qaýipsizdigin qam­tamasyz etip qana qoı­maıdy. Sonymen qatar, Shanhaı yntymaqtastyq uıymy men Ujymdyq qa­ýipsizdik sharty uıymy elderine de óz yqpalyn tıgizbek,– deıdi №21751 áskerı bólimniń tárbıe jáne áleýmettik-quqyqtyq ju­mys­tar jónindegi komandı­riniń orynbasary Sergeı Chernyshev. Sonymen, «Áýe kúsh­teri-2011» jattyǵýlary kór­shiles eki memleket – Reseı men Qazaqstannyń áskerı-áýe kúshteri bólim­sheleriniń biliktiligin art­tyrýǵa kómektesip, ózara túsinistikti qalyp­tastyr­dy. Eń bastysy, Qazaqstan men Reseı qarýly kúshteri arasyndaǵy áskerı dástúr­lerdiń odan ári nyǵaıa tú­sýine yqpal etip otyr. Baqyt Balǵarına, Almaty.