16 Shilde, 2011

Pogon taqqannyń bári perishte me?

212 ret kórsetildi
Buryn baspasózde jemqorlardyń «sha­baq­tary» ǵana qarmaqqa ilinip, «shor­tan­darynyń» shorshyp júrgeni kóp aıtylatyn. Odan beri zaman ózgerdi. О́mir aǵynymen birge sý betine talaı «shortan» shyqty. Quryqqa ilindi. Jazasyn tartty. Biraq jemqorlar budan aıaǵyn tartpaı tur. Oǵan myna sózimiz dálel. Aral aýdandyq ishki ister bólimi bastyǵynyń jedel jumystar jónindegi orynbasary Jalǵasov osydan bir jyl buryn S.Toqmambetovti ózine shaqyrady. Kabınetke kelgen Toqmam­betovti quzyrly organnyń ókili toqpaqqa alady. «Sen esirtki satýmen aınalysasyń. Ústińnen aryz bar», deıdi. Túkke túsin­begen Toqmambetov ózine taǵylǵan aıypty moıyn­damaıdy. Jalǵasov bolsa, óz sózin qaıtalaı beredi. Onyń aıaǵy qınaý-qystaýǵa ulasady. Jasamaǵan isin Toqmambetov qaı­dan moıyndasyn? Úzildi-kesildi bas tar­tady. Sodan Jalǵasov kúdik­tiń seıilmegenin, istiń áli qozǵalatynyn aıtyp Toq­mambetovti bosatady. Byltyrǵy jyldyń jeltoqsanynda Jalǵasov Toqmambetovke mynandaı mátin­degi hat jazady: «Oblystan arnaıy brıgada kelip, jumys istedi. Biraq men saǵan olardy tıiskizbedim. Endi jyldyq esep tapsyrý úshin oblysqa bara jatyrmyn. Jolaı brıgada basshylaryna soǵamyn. Soǵan 4000 dol­lar berip jiber». Hatty óziniń júrgizýshisi M.Aqmambetov arqyly berip jiberedi. Arada on kún ótpeı Toqmambetovtiń úıine ýchaskelik polısııa izdep keledi. Dál sol kezde ol úıinde bolmaıdy. Sodan tyqyrdyń taıan­ǵanyn sezgen ol Ulttyq qaýipsizdik ko­mıtetiniń Qyzylorda oblysy jáne Baı­qońyr qalasy boıynsha departamentine aryz túsiredi. Aryzynda Jalǵasovtyń qyz­met babyn paıdalanyp, zańsyz aıyp taǵyp, 4000 AQSh dollaryn bopsalap otyrǵanyn aıtady. Sodan Toqmambetov Jalǵasovpen kezdeskende onyń talabyna kelisken syńaı tany­typ, biraq, 4000 dollardy bere almaı­tynyn aıtady. Degenmen, sol kúni 150 myń teńge taýyp berýge ýáde beredi. Anaý oǵan kelisedi. Sóıtip, jeńil oljany oljalap qaıtýǵa júrgizýshisin jiberedi. Júrgizýshi Aqmambetov 150 myń teńgeni alyp jatqan kezinde Ulttyq qaýipsizdik komıtetiniń qyzmetkerleriniń quryǵyna túsedi. Sóıtip, UQKD qyzmetkerleri M.Jalǵasovqa QK-tiń 177-baby 3-bóliginiń «g» tarmaǵy, júrgizýshi M.Aqmambetovke qarsy QK-tiń 177-baby 2-bóliginiń «a» tarmaǵy boıynsha qylmystyq is qozǵalyp, ol qarjy polı­sııa­­syna joldanady. Aqmambetovtiń osyndaı ońaı oljany talaı ret bastyǵyna ákelip bergeni kúmánsiz bolsa kerek. О́z basyn aman alyp qalý úshin máseleniń mán-jaıyn tolyq aıtyp, istiń tez bitýine qal-qaderinshe kómek qylady. Osyny eskergen prokýratýra ókilderi ony qylmystyq jaýapkershilikten bosatady. Al Jalǵasovtyń isi qyzmetin jeke paıdasyna paıdalanǵany úshin degen aıyppen sotqa ótedi. Sot ony 5 jylǵa kesedi. Al «Aral aýdandyq Mádenıet úıleri men klýbtary» memlekettik qazynalyq kásipornynyń esepshisi Jasaqbaeva osy aýdandyq Mádenıet jáne tilderdi damy­tý bóliminiń bastyǵy Ábilǵazıeva­nyń ústinen qarjy polısııasynyń ókil­derine aryzdana­dy. Aryzdy ınspektor Ahmetov tekserýge alady. О́zin aqtap alýdyń jalǵyz joly para berý dep oılasa kerek, Ábilǵazıeva qarjy polısııa­synyń qyz­met­kerine 200 myń teńge berip, máseleniń ózine oń sheshilýine yqpal etýin suraıdy. Aýdandyq qarjy polısııa­synyń qyz­metkeri sol mezetinde oblys­taǵy bas­shylyǵyna málimdeme jazady. Sóıtip, Ábilǵazıeva para berý ústinde qolǵa tústi. Sóıtse Ábilǵazıevanyń munan da ótken kinási kóp eken. «Qyz Jibek» degen dúkenge para berýshi 52 myń teńge qaryz bolypty. Ony jańaǵy aıtqan Jasaq­baevanyń qalta­synan tólettiripti. Ony­men qoımaı hat­shy­sy arqyly 27100 teńge aldyrtypty. Odan keıin jeke esep-shoty­na taǵy 20 myń teńge aýdartyp alypty. Qysqasy, Ábil­ǵazıeva Jasaqbaevany tespeı sorǵan ǵoı. Alaıda, bir tańǵalarlyǵy, Aral aýdandyq soty oǵan QK-tiń 63-babyn qoldaný arqy­ly 2 jyl synaq merzimin ǵana belgilepti. Osydan keıin jeń ushy­nan jalǵas­qan jemqorlyq pen barmaq basty, kóz qysty sybaılastyq qaıdan tyıylsyn. Erjan BAITILES, Qyzylorda oblysy.
Sońǵy jańalyqtar

Uqsas jańalyqtar