Baǵdarlamany iske asyryp jatqan «Irkýt» korporasııasy – reseılik, tipti álemdik avıasııa naryǵyndaǵy eń úlken segmentke arnalǵan básekege barynsha qabiletti ushaqty jasap shyǵarmaq nıette. Sońǵy ınjenerlik sheshimder MS-21 úlgisine eki negizgi baǵyt boıynsha óz básekelesterinen asyp túsýge múmkindik beredi. Ol – ekonomıkalyq tıimdilik jáne yńǵaılylyq.
MS-21-300 dep atalatyn negizgi ushaq bıznes-klasta 16 jolaýshy jáne ekonom klasta 147 jolaýshy tasymaldaýǵa arnalǵan. Bir klasta jolaýshylar tasymaldaýǵa arnalǵan ushaqta 211 jaıly oryndyq tyǵyz ornalastyrylady. Budan bólek, eki klasta 132 jolaýshyny yńǵaıly ornalastyratyn salony bar MS-21-200 ushaǵy qurastyrylyp jatyr. Sonymen qatar budan da kóbirek jolaýshy syıdyra alatyn MS-21-400 ushaǵyn qurastyrý múmkindigi zerdelenip jatyr.
MS-21 ushaǵyn qurastyrýshylar laınerdiń aerodınamıkalyq kórsetkishterin qoldanystaǵy ushaqtarmen salystyrǵanda 5-6%-ǵa arttyrdy. Bul ushaq qanatyn uzartýdyń arqasynda múmkin bolǵan. Alaıda mundaı kórsetkishi bar qanatty temirden jasaý múmkin emes bolǵandyqtan, zamanaýı polımerlik-kompozıttik materıaldar paıdalaný týraly sheshim qabyldandy.
Keń fıýzelıaj jolaýshylardy shyǵarý jáne otyrǵyzýdy jyldamdatady. «Irkýt» korporasııasynyń vıse-prezıdenti Kırıll Býdaev atap ótkendeı, «árbir jolaýshynyń kirip-shyǵýynan 5-7 mınýt ýaqyt únemdeýge bolady. Ádette jylyna 1500 reıs jasaıtyn áýe kompanııasy osy merzimde 150 saǵat únemdeı alady, demek, qosymsha reıs jasaı alady.
MS-21-300 ushaǵynyń alǵashqysyn synaqtan ótkizý 2017 jylǵy 28 mamyrda bastalǵan. 2017 jylǵy qazan aıynda Irkýtskidegi zaýyttan Máskeý mańyndaǵy synaq alańyna 6 saǵat ushyp bardy. Alǵashqy synaqtardan-aq ushaq maqsatty paıdalaný kórsetkishterine qol jetkizdi: ushý bıiktigi – 12 000 metr, jyldamdyǵy – 860 km/s.
«Irkýt» korporasııasynyń avıasııa tehnıkasyn qurastyrý boıynsha vıse-prezıdenti Konstantın Popovıchtiń aıtýynsha, bul synaqtar negizgi konstrýktorlyq jáne óndiristik sheshimder durys baǵytta júrgizilgenin kórsetti.
2018 jylǵy 12 mamyrda ekinshi MS-21-300 synaq ushaǵy kókke kóterildi. Ushý synaqtaryna barlyǵy 4 áýe kemesi jumyldyrylmaqshy.
MS-21 baǵdarlamasy 20 jyldyń ishinde 1000-ǵa jýyq ushaq jasap shyǵarýdy kózdeıdi. Qazirdiń ózinde «Irkýt» 175 ushaq jasaýǵa tapsyrys alǵan.
Alǵashqylardyń biri bolyp Reseıdiń ulttyq áýe tasymaldaýshysy – «Aeroflot» kompanııasy 50 MS-21 ushaǵyna tapsyrys bergen. Olar 2020-2026 jyldar aralyǵynda jetkiziledi dep josparlanǵan.
Qambar Ahmet,
«Egemen Qazaqstan»
