Erlan Qoshanov qalalyq qyzmettiń jumysyn synǵa aldy

Qazaqstan • 13 Naýryz, 2019

Erlan Qoshanov qalalyq qyzmettiń jumysyn synǵa aldy

837 ret kórsetildi

Oblys ákimi birqatar qalalyq áleýmettik nysandardyń basshylaryn synǵa aldy. Aımaq basshysy josparsyz qala ishin aralaýǵa shyqty. Onyń nazaryna birden joldardyń jaǵdaıy, qar tazalaý, jáne jumyspen qamtý máseleleri ilikti.

Erlan Qoshanov kóshelerdi qardan tazalaý jumystaryna kóńili tolmady. Mektepter men balabaqshalar, áleýmettik nysandar alańdary tazartylmaǵan. Jeke aýmaqtardan da, keńseler, meıramhanalar, dúkender men bankter mańynda qar shyǵarylmaǵan.

- Qardy tazalap, shyǵarmaı jatqandardan qatań suraý kerek qoı. Polısııany qosyp, ýchastkelik ınspektorlardy shaqyryp, ýaqytyly qar shyǵarmaǵandary úshin aıyppul salý kerek emes pe?! Qala ákimine bir apta ýaqyt beremin. Bir aptadan keıin men osy jáne basqa da baǵyttar boıynsha tekserip ótemin. Jeke sektorlardy da tazalańdar qardan. Birde-bir úı sý astynda qalmaý kerek, - dedi Erlan Qoshanov.

Budan bólek, aımaq basshysy qalalyq jumyspen qamtý ortalyǵy qalaı jumys istep jatqanyn nazarǵa aldy. Sáýirden bastap, kópbalaly, az qamtylǵan otbasylaryna jańa esepteý boıynsha ataýly táleýmettik kómek kórsetile bastaıdy. Kelýshiler kúrt kóbeıedi dep kútilýde, sondyqtan birinshi kezekte, aımaq jetekshisi mamandar azamattarǵa jedel qyzmet kórsete ala ma, olar úshin barlyq jaǵdaı jasalǵan ba, degen suraqtarǵa jaýap alyp, kóz jetkizý úshin arnaıy keldi. Bul jerde de olqylyqtar bar bolyp shyqty.

- Alty ústel, jarty saǵattan, eger halyq kóp kelse qalaı úlgermekshisińder? Bizde qalada AEK alýǵa 9 myń adam úmitti, eger kúnine myń adam kelse de sizder úlgermeısizder. Qosymsha mamandardy jiberińizder mynda. Budan bólek otyratyn oryndar da az. Bar bolǵany 12! Men taǵy qaıtalap aıtamyn, bizde 9 myń adam! Olar qaıda otyrady?! Qosymsha oryndyqtar qosyńyzdar, barlyq jumyspen qamtý ortalyqtarynda elektrondy kezek ornatyńyzdar, jumys ýaqyty kórsetilgen taqtaıshalar ilińizder, bul jerge kópbalaly analar keledi, balalary úılerinde olardyń. Saǵattap kezek kúttirmeý kerek olarǵa, - dep tapsyrdy oblys ákimi.

Erlan Qoshanovtyń kelesi baǵyty Qazybek bı aýdanynyń úıge áleýmettik kómek kórsetý bólimshesi boldy. Onda múgedekterge, psıhonevrologııalyq aýrýy bar adamdarǵa kómektesedi. Ákim nysanǵa keletin joldyń tazalanbaǵanyn birden synǵa aldy. Múgedekter kiretin jer tym bıik, al, pandýstyń ústine jyp-jyltyr muz qatqan. Ǵımarattyń ishi alakóleńke, dáliz tar.

- Bul ataýly áleýmettik kómekke qujattar qabyldaı bastaǵanda 334 adam keledi. Olar qaı jerde otyryp, kútedi. Barlyq olqylyqty joıý úshin úsh kún beremin. Baspaldaqtardyń muzyn tazalańyzdar, jol salyp, ishin retke keltirińizder, - dedi aımaq basshysy.

Bul jumystardy baqylaýdy óziniń orynbasary Ashat Aımaǵambetovke júktedi.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz