Oblys ákimi «Aqtóbe» ÁKK jumysyn kúsheıtýdi tapsyrdy

• 18 Naýryz, 2019

Oblys ákimi «Aqtóbe» ÁKK jumysyn kúsheıtýdi tapsyrdy

787 ret kórsetildi

Senbi, 16 naýryz kúni Aqtóbe oblysynyń ákimi Ońdasyn Orazalın «Aqtóbe» ındýstrııalyq aımaǵyn aralap, «Aqtóbe» ÁKK-niń qyzmeti týraly esepti tyńdady.

Indýstrıaldy aımaqta Ońdasyn Orazalın «Faeton» A-klass saýda-logıstıkalyq ortalyǵynyń, «Polıvest» JShS-niń polıetılen ónimderiniń, «Aqtóbe TOPSA Plast» JShS antıfrızdi jáne hımııalyq reagentteriniń, «TALAN Technology» shınalaryn joıý sehtarynyń jumystarymen tanysty. Sonymen qatar, oblys ákimi «FIBC KAZAKHSTAN» JShS-niń iri qaptarynyń sheberhanasynyń jáne «Zerde-Keramıka Aqtóbe» JShS-niń keramogranıt jáne keramıkalyq plıtkalar óndiretin zaýytty iske qosý daıyndyǵyn joǵary baǵalady.

«Polıvest» JShS oblys ákimine tez qurastyrylatyn ámbebap ramalyq shatyr angarlaryn jabyq sport zaldary retinde shyǵarý josparlary týraly habardar etti. Osyndaı qurylymdardyń mańyzdy artyqshylyqtary qurylystyń jyldamdyǵy jáne salystyrmaly túrde shyǵyndary tómen bolyp otyr. Oblys ákimi bul tehnologııanyń aýyldaǵy mádenı-saýyqtyrý jáne sporttyq nysandardyń jelisin keńeıtý úshin belsendi túrde qoldanylý kerektigin atap ótti.

«Bul sportpen aınalysýǵa ǵana emes, qajet bolsa, konsert qoıylýy úshin kópqurylymdy nysan bolýy kerek. Ákimshilik blokty, ártúrli jas sanattaryna arnalǵan úıirmeler zaldaryn qamtıtyn jańa joba jasańyz. Eger shyǵyndar qolaıly bolsa, biz ony óńirde iske asyramyz», - dedi Ońdasyn Orazalın.

Sodan keıin oblys ákimi «Aqtóbe» ÁKK qyzmeti týraly baıandamany tyńdady. Korporasııanyń basshysy Ánýarbek Mahanov 2019 jylǵa arnalǵan josparlarǵa toqtalyp, 23,3 mlrd. teńgeniń 8 jobasyn egjeı-tegjeıli talqylady, olar aǵymdaǵy jyly iske qosýǵa josparlanǵan.

Baıandamany tyńdaǵan oblys ákimi ındýstrıaldy aımaqtyń negizgi operatory retinde jobalardy iske asyrýdyń aıqyn josparlary men merziminiń joqtyǵy, joǵary tehnologııalyq óndiristerge ınvestısııa salýǵa daıyn ınvestorlardy tartý boıynsha álsiz jumysy úshin korporasııa jumysyn synǵa aldy.

Eseptiń qorytyndysy boıynsha oblys ákimi barlyq baǵyttar boıynsha jumysty kúsheıtý jóninde birqatar tapsyrmalar berdi, bul ınvestısııalardy tartý ÁKK negizgi mindeti bolyp tabylady.

«Investorlar úshin eń qolaıly jaǵdaı jasaý kerek, olar úshin memlekettik qyzmetterdi alý múmkindiginshe ońaı bolýy kerek. Men bıznespen aınalysatyn barlyq memlekettik organdarǵa eskertemin, eger sizderdiń tarapyńyzdan tosqaýyldar jasaý týraly kem degende bir shaǵym jasalsa, suranys qatal bolady. Kásipkerlikti damytý, ınvestısııalardy tartý - bul Elbasynyń oryndalýy tıis tapsyrmalary», - dedi Ońdasyn Orazalın.

Jumys sapary polıgon aýmaǵynda ornalasqan turmystyq qatty qaldyqtar suryptaıtyn keshen jumysymen, sondaı-aq oblys ortalyǵynyń aǵyndy sýlardy tazartý qondyrǵylaryn jańǵyrtý jobasyn júzege asyrý barysymen jalǵasty. «Aqbulaq» AQ prezıdenti Asan Ybraevtyń aıtýynsha, bul jobanyń jalpy jumysynyń quny 16,8 mlrd. teńgeni quraıdy. Qazirgi ýaqytta jobalyq-smetalyq qujattardy ázirleý jumystary jalǵasýda. Ony júzege asyrý bes jylǵa josparlanǵan.

Ońdasyn Orazalın «Aqbulaq» AQ basshylyǵyna ekologııalyq qaýipsizdikti qamtamasyz etý - ómir sapasynyń eń mańyzdy kórsetkishi ekenin, sondaı-aq ýákiletti memlekettik organdarǵa qalanyń ekologııalyq jaǵdaıyn jaqsartý jónindegi sharalardy kúsheıtýdi, sonyń ishinde Aqtóbedegi jaǵymsyz ıis kózderin joıýdy erekshe tapsyrdy.

Sondaı-aq ol Asan Ybyraevqa «Aqbulaq» AQ qyzmetine qatysty azamattardyń shaǵymdaryn qanaǵattandyrý boıynsha jumysty kúsheıtýdi tapsyrdy. Sońǵy kúnderde áleýmettik jelilerde qalanyń túrli aýdandaryndaǵy sýyq sýdyń joqtyǵy týraly úsh shaǵym jarııalanǵanyn eskertti. Aımaq basshysy barlyq kommýnaldyq qyzmetter men memlekettik organdardyń oblys turǵyndarynyń shaǵymdardyna barynsha tezirek jaýap berýge mindetti ekenin atap ótti.

Budan basqa, oblys ákimi «Aqtóbe Stroıtehnologııa» avtoklavty gazdalǵan zaýytyn aralady. О́ndirispen tanysqannan keıin oblys basshysy kásiporynnyń qyzmetine oń baǵasyn berip, odan ári tabysqa jetýdi tiledi.

Temir QUSAIYN,

«Egemen Qazaqstan»

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz