Senat komıteti respýblıkalyq bıýdjetke túzetýlerdi qarady

Zań jobasy 2019-2023 jyldarǵa arnalǵan naqtylanǵan makroekonomıkalyq kórsetkishter negizinde ázirlendi jáne Qazaqstan Respýblıkasynyń Tuńǵysh Prezıdenti-Elbasynyń «Nur Otan» partııasynyń XVIII sezinde, Memleket basshysynyń jyl saıynǵy Joldaýlarynda aıtqan tapsyrmalaryn, «Qazaqstan Respýblıkasynyń memlekettik basqarý júıesin odan ári jetildirý jónindegi sharalar týraly» Prezıdent Jarlyǵyn iske asyrýǵa baǵyttalǵan.

Álemdegi qazirgi jaǵdaıdy, syrtqy naryqtardaǵy kórsetkishterdi jáne 2018 jylǵy ekonomıkalyq damý qorytyndylaryn eskere otyryp, Qazaqstan Respýblıkasynyń 2019-2023 jyldarǵa arnalǵan áleýmettik – ekonomıkalyq damý boljamy aıasynda 2019 jylǵa arnalǵan makroekonomıkalyq kórsetkishterdiń boljamy naqtylandy.

Osylaısha, bazalyq ssenarııde 2019 jyly munaı baǵasy barreline 55 AQSh dollary deńgeıinde saqtaldy.

2019 jyly nomınaldy Jalpy ishki ónim 64 335,0 mlrd teńge kóleminde baǵalanady, bul 2018 jylǵy qarashada maquldanǵan kórsetkishten 323,5 mlrd teńgege artyq. Jan basyna shaqqandaǵy Jalpy ishki ónim 9 409,2 AQSh dollaryn quraıdy. Jalpy ishki ónimniń naqty ósimi 3,8 % deńgeıinde saqtaldy.

Ulttyq bank jyldyq ınflıasııanyń buryn josparlanǵan 4-6% shegindegi maqsatty dálizin saqtap qaldy.

2019 jylǵa arnalǵan respýblıkalyq bıýdjettiń kiris boljamy (transfertter túsimin eseptemegende) 6 986,3 mlrd.teńge somasynda belgilendi.

2019 jylǵa arnalǵan transfertterdiń túsimderi 621,0 mlrd teńgege ulǵaıyp, jalpy somasy 3 466,1 mlrd teńgeni quraıdy.

2019 jylǵa arnalǵan respýblıkalyq bıýdjet túzetilip, 1 168,8 mlrd teńgege ulǵaıdy jáne bıýdjettiń shyǵystary 11 895,1 mlrd teńge somasynda kózdelip otyr.

Kórsetilgen ulǵaıtýlardy, sondaı-aq qarajatty qaıta bólýdi eskere otyryp, respýblıkalyq bıýdjettiń shyǵystary:

- «Áleýmettik qamqorlyq» jańa áleýmettik sharalarǵa 444,3 mlrd teńge somasynda;

- Qazaqstan Respýblıkasy Prezıdentiniń «Básekege qabilettilikti arttyrý jónindegi keıbir sharalar týraly» tikeleı ınvestısııalar qoryn qurýǵa arnalǵan Jarlyǵyn iske asyrýǵa 370,0 mlrd teńge somasynda;

- «Jastar jyly» aıasyndaǵy sharalarǵa 24,6 mlrd teńge somasynda;

- óńirlik ınfraqurylymdy damytý jónindegi sharalarǵa;

- eldiń buryn qabyldanǵan mindettemelerine jiberiletin boldy.

2019 jylǵa arnalǵan respýblıkalyq bıýdjet tapshylyǵy 347,6 mlrd teńgege ulǵaıyp, 1 326,6 mlrd teńgeni nemese Jalpy ishki ónimniń 2,1% - yn qurady.

Sonymen qatar, aǵymdaǵy jylǵy 20 naýryzda Parlament palatalarynyń birlesken otyrysynda mańyzdy sheshimder qabyldandy jáne Qazaqstan Respýblıkasynyń Prezıdenti osy zań jobasyna ózgerister men tolyqtyrýlar engizýdi talap etetin birqatar tapsyrmalar bergen bolatyn:

- Astanany Nur-Sultan qalasy dep qaıta ataý;

- jańa memlekettik organ – Qazaqstan Respýblıkasy Tuńǵysh Prezıdentiniń-Elbasynyń Keńsesin qurý;

 - bıýdjet salasyndaǵy jalaqysy tómen qyzmetkerlerdiń jáne atqarýshy organdardaǵy tómengi sanattaǵy memlekettik qyzmetshilerdiń eńbekaqysyn arttyrý merzimin bıylǵy jyldyń 1 shildesinen 1 maýsymyna aýystyrý.

Bul tapsyrmalardy iske asyrý úshin 38,8 mlrd teńge talap etilip otyr, olardy respýblıkalyq bıýdjettiń tapshylyǵy esebinen onyń nomınaldy mánin arttyra otyryp ári Jalpy ishki ónimge qatysty mólsherin 2,1% deńgeıinde saqtaı otyryp josparlaý usynylady. 

Komıtettiń keńeıtilgen otyrysynda sondaı-aq «Qazaqstan Respýblıkasynyń Ulttyq qorynan 2019-2021 jyldarǵa arnalǵan kepildendirilgen transfert týraly» zańǵa ózgeris te qaraldy.

Bul zań jobasymen Ulttyq qordan 2019 jylǵa arnalǵan respýblıkalyq bıýdjetke beriletin kepildendirilgen transfert kólemi 2 700 mlrd.teńge somasynda belgilendi.

2019 jyly respýblıkalyq bıýdjet shyǵystarynyń 23%-y kepildik berilgen transfert esebinen qarjylandyrylady, bul Ulttyq qordaǵy qarajattyń tómendetilmeıtin qaldyǵy boıynsha tıisti qarjy jylynyń sońyndaǵy Jalpy ishki ónimniń boljamdy máninen 30%-y mólsherinde sharttardyń oryndalýyn qamtamasyz etedi.