Qazaqstandyq kásipkerler Uly Jibek jolyndaǵy qalalardy damytýǵa yntaly

«Shymkent» ÁKK» AQ jáne Forbes Kazakhstan uıymdastyrýymen ótken  forýmǵa  Shymkent qalasynyń ákimi Ǵabıdolla Ábdirahymov qatysyp, «Shymkent qalasynyń ınvestısııalyq-kásipkerlik klımaty» taqyrybynda baıandama jasady.     

Sondaı-aq, talqy minberinde tanymal qazaqstandyq kásipkerler Aıdyn Rahymbaev, Raıymbek Batalov, Serik Túlbasov, Islambek Saljanov, Edýard Kım, Andreı Lavrentev, Ramıl Mýhorıapov, Ivan Kamenskıı, Qaırat Qudaıbergen, Beıbit Álibekov, Armanjan Baıtasov, Larıon Lıan, Dana Ormanbaeva, Qaırat Májibaev, Mahmýd Shadıev jáne de basqa spıkerler kásipkerliktiń keleshektegi damýy joldarymenen Shymkent qalasynyń ınvestısııalyq múmkinshilikteri jaıly tájirıbeleri men bıznesti damytý strategııalarymen bólisti. Forýmda BI Group kompanııasynyń Dırektorlar keńesiniń tóraǵasy Aıdyn Rahymbaev sóz alyp, qalada qolǵa alǵan jobalary jaıynda jáne shahardyń áleýmettik áleýetin aıtyp ótti. Al, Raıymbek Batalov elektrondy tólem júıeleriniń búgingi ahýalyn keńinen áńgimeledi.

Silkway Shymkent Summit alańynda shahar basshysy atalǵan forýmnyń Elbasynyń «Qazaqstannyń úshinshi jańǵyrýy: Jahandyq básekege qabilettilik» atty Joldaýynda aıtylǵan mindetterdi oryndaýdyń negizgi alǵysharttardyń biri ekenin atap ótti. Jıyn qatysýshylaryna qalada jańadan boı kótergen nysandar men «Shymkent City» qalashyǵynda atqarylyp jatqan jumystarmen tanystyrdy.

«Uly Jibek jolynyń boıynda ornalasqan Shymkent - 2200 jyldyq tarıhy bar kóne qala. Bir sózben Shymshahar- Uly Jibek jolynyń júregi. Bul forýmdy «Kerýender qaıta oralady» dep ataýymyzdyń ózi osymen baılanysty. Sebebi, iri saýda ortalyǵy atanǵan Shymqala ǵasyrlardan beri saýda-sattyq úshin qonaqjaılyq qasıetin joǵalytpaǵan. Sondyqtan saýda klımatty qalyptastyrýǵa arnalǵan is-shara tikeleı elimizdiń úshinshi megapolısiniń tarıhymen baılanysty bolmaq. Elbasy Nursultan Nazarbaev mıllıondy qalanyń damýynyń birneshe baǵytyn naqtylap bergen bolatyn. Alǵashqysy, Shymkent Ortalyq Azııanyń iri ekonomıkalyq ortalyǵy atanýy tıis. Shaǵyn jəne orta bıznesti damytý kerek, ınvestorlardy jumyldyrý qajet. Ekinshisi, ejelgi saýda dálizindegi shahardy týrızm ortalyǵyna aınaldyrý edi.  Árıne, týrızm – əlemdegi eń tabysty bıznes. Týrızm damýy úshin jaqsy damyǵan ınfraqurylym, zamanýı əýejaı men temirjol vokzaly bolýy mańyzdy. Al bul turǵyda Shymkenttiń múmkindikteri mol. 2020 jyly Shymkent TMD-nyń mədenı astanasy atanbaq. Qazir qalada atalǵan máseleler boıynsha aýqymdy jobalar júzege asyrylýda. Qalamyzdyń damý úshin biz tómendegi basymdyqtarǵa basa mán berdik. Onyń biri  ekonomıkalyq ósim bolsa, ekinshisi, halyqtyń turmys jaǵdaıyn kóterý. Sol arqyly mıllıondy qalanyń turǵyndaryna sapaly bilim men medısınalyq kómekti barynsha qoljetimdi etý  bolmaq»,  dedi qala ákimi.

Investorlardy tartý arqyly Shymkenttiń ekonomıkasyn kóterý jáne halyqtyń ál-aýqatyn jaqsartýdy kózdegen jıynda  elektrondyq kommersııany damytý, Qazaqstanda buqaralyq aqparat quraldarynyń damýy, áıelder kásipkerligin qoldaý, Qazaqstandaǵy orta jáne iri kásipkerliktiń ózekti máseleleri talqylandy.

Birqatar iri kásiporyn basshylary Shyraıly shymqalanyń múmkindikteri men damý jospary jaıly qala ákimdigi usynǵan jobalardy júzege asyrýǵa ýaǵdalasty. Bıznes forým jergilikti jáne sheteldik kásipkerler men ınvestorlar úshin Shymkenttiń mártebesi men tartymdylyǵyn arttyratyn ınvestısııalyq jáne kásipkerlikke qatysty kontentke toly boldy. 

Aýqymdy is-sharanyń uıymdastyrýshysy, «Shymkent»  áleýmettik-kásipkerlik korporasııasynyń basqarma tóraǵasy Rashıd Aıýpov forýmnyń qala damýy men ekonomıkasy úshin bereri mol ekendigine toqtalyp ótti.

Uıymdastyrýshylardyń aıtýynsha byltyr kúzde  ótken forýmnyń qorytyndysy boıynsha 42 mlrd teńgege kelisim  jasalyp, qazir «Shymkentsıtıde»  62 úıdiń qurylysy júrgizilgen.

«Bıyl «Kerýen oralady» ataýymen  uıymdastyrlǵan  ınvestısııalyq- kásipkerlik forýmy aıasynda da tıimdi  kelisim -sharttar túziledi degen senim bar. Elimizge  áıgili kompanııalardyń biri Shymkentte «Kongress-holl»-dyń qurylysynan bólek, jańa eki shaǵynýadannyń qurylysyn bastamaq. Shymkent saýda habyna aınalmaq. Ol úshin  adam resýrsy da,  barlyǵy da bar», dedi R.Aıýpov.