Aımaqtar • 09 Mamyr, 2019

Qaraǵandyda Uly Jeńis kúni «Batyrlarǵa taǵzym» sherýi ótti

Kenshiler astanasynda Uly Jeńistiń 74 jyldyǵyna arnalǵan «Batyrlarǵa taǵzym» sherýinde qala turǵyndary men qonaqtary qoldaryna Uly Otan soǵysyna qatysqan ata-babalarynyń ǵana emes, sondaı-aq qazaq halqynyń erte zamandaǵy aǵa batyrlarynyń da sýretterin ustap, ortalyq kóshelermen júrip ótti.

Qaırat Ábilda

Dástúrge saı «Máńgilik alaý» memorıalynda uıymdastyrylǵan mıtıng-rekvıemde qaraǵandylyqtar ekinshi dúnıejúzilik soǵysta qaza tapqan jaýyngerlerdi bir mınýt únsizdikpen eske aldy.

Jıylǵan qaýym aldynda oblys ákimi Erlan Qoshanov sóz alyp, elimiz úshin eń qasıetti mereke – Uly Jeńistiń ońaıshylyqpen kelmegenin jáne bul kúni Otan úshin jer jastanǵan erlerdiń rýhyna taǵzym etý kerektigin atap ótti.

– Bizdiń elimiz úshin Uly Jeńis – eń qasıetti mereke. Árbir shańyraqtyń osy soǵyspen baılanysqan ózindik tarıhy bar. Qandy qyrǵynnan qaıtpaǵan ata-babalarymyzdyń, beıbit kúnderi kóz jumǵan erlerdiń rýhy árdaıym bizben birge. Erjúrek atalarymyz ben analarymyz bizderge naǵyz otansúıgishtik pen patrıotızmniń qandaı bolatynyn kórsete bilgen úlgi tutar jandar. О́kinishke qaraı, surapyl soǵys jyldary erlik tanytqan batyrlarymyzdyń qatary azaıyp barady. Alaıda, biz olardy máńgi este saqtaımyz jáne bolashaq urpaqqa árdaıym aıtyp otyramyz, – dedi óńir basshysy.

Budan keıin jurt aldyna Uly Otan soǵysynyń ardageri Búrkit Esjanov shyǵyp, surapyl soǵys jyldary kórgen estelikterimen bólisti. Jıylǵan qaýymdy jeńis merekesimen quttyqtap, jastarǵa batasyn berdi.

«Máńgilik alaý» basyna gúl shoqtary qoıylǵannan keıin, «Batyrlarǵa taǵzym» sherýi shebin buzbastan Keńes Odaǵynyń Batyry Nurken Ábdirov eskertkishine keldi. Qyran qazaqtyń qola músininiń aldynda óziniń ushaǵyn jaý kolonnasyna baǵyttap, jaryp jibergen esil erdiń erligine arnalǵan teatrlandyrylǵan qoıylym kórsetildi. Horeografııalyq qoıylym barysynda jergilikti qazaq teatrynyń ártisteri batyr ushqyshtyń ata-anasyna jazǵan hattaryn oqydy, sondaı-aq óz erkimen soǵysqa attanǵan sarbazdardy týǵan-týystarynyń shyǵaryp salý sátin kórsetilim arqyly óte áserli jetkizdi.

Sondaı-aq, bul kúni oblys ákimi Uly Otan soǵysynyń ardagerleri Asylhan Omarhanov pen Marııa Shınkevıchtiń úılerine baryp, maıdangerlerdi Jeńis kúnimen quttyqtap, syı-sııapat jasady.

Uly Jeńis merekesine arnalǵan is-sharalar qalanyń Ońtústik-Shyǵys shaǵyn aýdanyndaǵy «Jeńis saıabaǵynda» jalǵasyn tapty. Saıabaqtyń tórinen oryn alǵan arnaıy sahnada jergilikti ónerpazdar merekelik kóńil-kúı qushaǵyndaǵy halaıyqtyń aldynda soǵys jáne áskerı ánderge shyrǵalǵan konsert qoıdy. Qala turǵyndary men qonaqtary arnaıy tigilgen áskerı shatyrlardyń ishine kirip, sarbaz botqasynyń dámin tatty.

Uly Jeńistiń 74 jyldyǵyna arnalǵan is-shara búgin keshkisin «Jeńis saıabaǵyndaǵy» merekelik otshashýlarmen túıindeledi.

Qaraǵandy oblysy