Rýhanııat • 13 Mamyr, 2019

Qaraǵandyda «Kartınalar. GIF» qoıylymy kórermendi tánti etti

Kenshiler astanasynda oblystyq beıneleý óneri murajaıy men «Qupııa baza» shyǵarmashylyq birlestigi tize qosyp, «Kartınalar. GIF» atty tosynsyıǵa toly qoıylymdy kórermen nazaryna usyndy.

Qaırat Ábilda

Murajaıda ótken spektakl barysynda ónersúıer qaýym áıgili «Qara sharshy» kartınasynyń avtory Kazımır Malevıchtiń rolin oınaǵan aqynnyń ómir týraly tolǵanysyna, «Italııalyq taltús» kartınasyndaǵy keıipkerdiń gıtarada sheber oınaǵanyna jáne taǵy basqa da ataqty óner týyndylaryna qatysty sátti shyqqan túrli obrazdar sheshimine tánti boldy.

Ásirese, Ámiráli Qojaǵulov beınesin somdaǵan Kazımır Malevıchtiń «Qara sharshysy» kórermen qaýymnyń erekshe iltıpatyna bólendi. Avtor qara matamen jabylǵan sharshy nysan astynda otyryp, óziniń óleńderin oqydy. «Adamdar qanshalyqty qatigez?», «Ne úshin ómir súrip júrmiz?», «Artymyzda ne qaldyrmaqpyz?», degen salmaqty suraqtary bar kúrdeli taqyryptar tóńireginde oı tolǵady. Ara-arasynda qara jáshik ishinen kórermenge qaraı ishindegi mazmuny árqıly hattar laqtyrylyp otyrdy. Ol jazbalardy oqyǵan qaýym avtormen áńgime-dúken quryp, oı-pikir bólisti.

Sonymen qatar, spektaklde Irına Dergýnova sýretshi Karl Brıýllovtyń «Italııalyq taltús» kartınasyn qalaı salǵanyn egjeı-tegjeıli baıandap berse, Vadım Kım áıgili Van Gogtyń «Avtoportret» kartınasyn tańdap, qylqalam sheberiniń obrazyn shynaıy somdap shyqty. Al Vasılısa Velman bolsa, «Kóńildester» týyndysyndaǵy Mark Shagalanyń zaıyby Bella Rozenfeldtiń beınesin kórermen nazaryna usyndy.

Beıneleý óneri murajaıy dırektorynyń orynbasary Aleksandr Gehttyń aıtýynsha, spektaklge qajetti kostıýmder men jabdyqtardy, kartınalar men olarǵa arnalǵan óleń jáne sóz mátinderin avtorlardyń ózderi tańdap, ázirlegen eken.

Úsh jyldan astam ýaqyttan beri jumys istep kele jatqan «Qupııa baza» – qaraǵandylyq aqyndar men prozaıktardyń jáne mýzykanttardyń shyǵarmashylyq birlestigi.

– «Qupııa bazanyń» quramy jıi ózgerip turady. Bireý ketedi, jańadan adamdar keledi. Qazir birlestikte 12 avtor bar. Eski gvardııadan men jáne Mıhaıl Papýsha ekeýimiz ǵana qaldyq, – deıdi shyǵarmashylyq keshterdi uıymdastyrýshy, joba avtorlarynyń biri Vasılısa Velman.

Qazirgi tańda shyǵarmashylyq birlestik elimizdegi birqatar qaladaǵy áriptesterimen shyǵarmashylyq tyǵyz qarym-qatynas ornatqan.

«Kartınalar. GIF» spektakli «Art-terapııa» jobasy aıasynda uıymdastyryldy.