Nur Otan partııasynyń atynan prezıdenttik saılaýǵa usynylǵan kandıdat Qasym-Jomart Toqaevtyń elimizdiń barlyq aımaǵynda 227 qoǵamdyq saılaýaldy shtaby jumys istep jatyr. Sonyń aıasynda keshe shtab ókilderi Qaraǵandy oblysyna bardy. Jergilikti halyqpen kezdesýler kezinde metallýrgter men kenshiler Nur Otan partııasynyń kandıdatyn biraýyzdan qoldaıtyndaryn bildirdi.
Shtab basshysy, Nur Otan partııasy Tóraǵasynyń birinshi orynbasary Máýlen Áshimbaev bastaǵan atalǵan respýblıkalyq qoǵamdyq shtabtyń quramynda memleket jáne qoǵam qaıratkerleri, belgili kásipkerler, mádenıet jáne sport juldyzdary jáne taǵy basqa belsendi azamattar bar. Olar aldymen Temirtaý qalasyndaǵy «ArselorMıttal Temirtaý» AQ kombınatynyń alańynda ótken kandıdat Qasym-Jomart Toqaevty qoldaýǵa arnalǵan is-sharaǵa qatysty. Metallýrgter aldynda sóz sóılegen Máýlen Áshimbaev «Saparymyzdy Qaraǵandy oblysynan, dál sizderdiń zaýyttaryńyzdan bastaýymyz kezdeısoq emes. Sebebi bul zaýytta Tuńǵysh Prezıdentimiz Nursultan Nazarbaevtyń eńbek joly bastaldy. Osy jerde Elbasymyz shyńdalyp, tulǵa retinde qalyptasyp, qaıralyp, qaırattanyp shyqty. Elbasymyzdyń álemdik deńgeıdegi saıasatker bolýynyń negizi de osy óńirde, osy zaýytta qalandy», dedi.
* * *
«Aýyl» halyqtyq-demokratııalyq patrıottyq partııasynyń atynan prezıdenttikke kandıdat Tóleýtaı Raqymbekovtiń saılaýaldy baǵdarlamasymen tanystyrý maqsatynda Taraz ınnovasııalyq-gýmanıtarlyq ýnıversıtetinde saılaýshylarmen kezdesý ótti. Atalǵan jıynǵa partııa tóraǵasy, Parlament Senatynyń depýtaty Álı Bektaev, partııanyń Jambyl oblystyq fılıalynyń saıası keńes músheleri, oblystyq jáne aýdandyq máslıhattyń depýtattary, qalalyq jáne aýdandyq fılıaldarynyń tóraǵalary, kásipkerler, professor-oqytýshylar quramy men stýdentter qatysty.
Áýeli «Aýyl» partııasynyń tóraǵasy Álı Bektaev kandıdat Tóleýtaı Raqymbekovtiń saılaýaldy baǵdarlamasymen tanystyryp, partııanyń qazirgi jumystaryna toqtaldy. Saılaýaldy baǵdarlamada aıtylǵan Qazaqstannyń agroónerkásiptik keshenin damytý – halyqtyń ál-aýqatyn arttyrýdyń kilti, aýyldar men qalalardyń áleýmettik teńdigi – qoǵamnyń ózekti máselelerin sheshý múmkindigi, dástúrli jáne rýhanı qundylyqtardy saqtaý – el damýynyń senimdi negizi jáne aýyldaǵy jastar saıasatynyń tıimdi modeli – aýyldy órkendetýdiń quraly syndy máseleler de keńinen talqylandy.
Budan keıin «Aýyl» halyqtyq-demokratııalyq patrıottyq partııasy Jambyl oblystyq fılıalynyń saıası keńes múshesi, «Qazaq sý sharýashylyǵy ǵylymı-zertteý ınstıtýty» jaýapkershiligi shekteýli seriktestiginiń bas dırektory Nurlan Balǵabaev jáne «Aýyl» partııasy Taraz qalalyq fılıalynyń tóraǵasy Qaırat Baıjanov sóz alyp, elimizdegi eń iri saıası naýqanǵa baılanysty óz oılaryn jetkizdi. Árbir qatysýshy baǵdarlamaǵa sáıkes pikirin bildirip, onyń mańyzdylyǵyn atap ótti.
* * *
«Aq jol» partııasynan kandıdat Danııa Espaeva partııa tóraǵasy Azat Perýashev bastaǵan respýblıkalyq shtab ókilderimen birge Almaty bazarynda jumys isteıtin kásipkerlermen kezdesti. «Jibek joly» bazarynda kásibin dóńgeletip otyrǵan jurtshylyq kandıdat pen partııa ókilderinen Qazaqstandaǵy shaǵyn jáne orta bıznesti damytý máseleleri jóninde surady. Osyǵan oraı óz kezeginde D.Espaeva saılaýaldy baǵdarlamasynyń negizgi basymdyqtary týraly baıandap, onyń ishinde kásipkerlikke qatysty máselelerin sheshý baǵyty da aıqyn kórsetilgenin atap aıtty.
Sonymen qatar prezıdenttikten úmitker D.Espaeva Almatydaǵy «Temirbeton-1» JShS ujymymen kezdesti. Temirbetondy ónimder men qurylǵylardy daıyndaýda úlken jetistikke jetken, 65 jyldyq tarıhy bar bul kásiporynda 400-ge jýyq qyzmetker jumys isteıdi. Olar kandıdattyń saılaýaldy baǵdarlamasymen tanysyp, ózderin tolǵandyrǵan saýaldaryn qoıdy.
Budan keıin partııanyń respýblıkalyq shtaby úgit-nasıhat jumysyn Taldyqorǵanda jalǵastyryp, onda elimizdegi iri akkýmlıator zaýyty «Qaınar» JShS jumysshylarymen kezdesti. A.Perýashev mundaı áleýetti óndiris ornyna memlekettik qoldaýdyń jańa mehanızmderin engizý kerektigin nazarǵa alyp, ondaı basymdyq D.Espaevanyń saılaýaldy baǵdarlamasynda kórsetilgenin aıtty.
* * *
Qazaqstan Kommýnıstik halyq partııasynan prezıdenttikke kandıdat Jambyl Ahmetbekovtiń respýblıkalyq saılaýaldy shtabynyń ókilderi Aqmola oblystyq aýrýhana qyzmetkerlerimen kezdesti. Jıynda «Halyq kommýnısteri» fraksııasynyń depýtaty Vladıslav Kosarev pen uıymnyń Aqmola oblystyq komıtetiniń birinshi hatshysy Beısenbaı Májıtov sóz sóıledi.
* * *
Qazaqstan Respýblıkasynyń Kásipodaqtar federasııasynan kandıdat Amangeldi Taspıhovtyń keshe saılaýaldy tuǵyrnamasy jarııalanyp, oblystyq shtabtary aımaqtarda úgit-nasıhat jumystaryn júrgize bastady.
Kandıdattyń respýblıkalyq qoǵamdyq shtabynyń senimdi ókilderi Nur-Sultan qalasyndaǵy Onkologııalyq aýrýhanada eńbek ujymymen kezdesti. Kezdesýge 100-ge jýyq medısına qyzmetkeri qatysty. Shtabtyń teń tóraǵasy S.Dáýletalın kandıdattyń eńbek joly men adamgershilik tulǵasyn baıandap, saılaýaldy tuǵyrnamasymen tanystyrdy.
* * *
«Ult taǵdyry» ulttyq-patrıottyq qozǵalysy atynan prezıdenttikke kandıdat Ámirjan Qosanovtyń saılaýaldy shtaby Soltústik Qazaqstan oblysynyń Báıterek aýylyna keldi. Shtab ókilderi jergilikti turǵyndarmen kezdesip, kandıdattyń saılaýaldy tuǵyrnamasyn tanystyrdy.
* * *
Nur-Sultan qalasyndaǵy «Jetisý» saıabaǵynda «Uly dala qyrandary» respýblıkalyq qozǵalysynan prezıdenttikke kandıdat Sádibek Túgeldiń saılaýaldy shtaby ekologııalyq aksııa ótkizdi. 1991 jyly 12 mamyr ekologııalyq bilim kúni retinde belgilenip, Reseıde jáne TMD elderinde atap ótilip keledi. Osyǵan sáıkes atalǵan aksııa qorshaǵan ortaǵa qamqorlyq jasaýdy, jas býyndy týǵan jeriniń tabıǵatyna janashyrlyqpen qaraýǵa ekologııalyq bilim berý arqyly tárbıeleýdi maqsat etip aldy.
S.Túgel óziniń saılaýaldy baǵdarlamasynda «Jer-ana – janymyz, ana tili – arymyz» dep urpaq boıyna ulttyq qundylyqtardy sińirý basty ustanymy ekenin atap kórsetken. Sondyqtan bul sharaǵa mektep oqýshylary men respýblıkalyq karate federasııasynyń jas sportshylary jınaldy. Olar «Uly dala qyrandary» qozǵalysynyń kandıdatyna qoldaý kórsetip, saıabaqtardaǵy tastalǵan qoqystardy jınap, aksııaǵa belsendi qatysty. Osylaısha jas urpaq adamnyń sanasy tazarmaı, qalasy tazarmaıtynyn sezinip, ekologııalyq is-sharadan erekshe áser aldy.
Memlekettik tildiń mártebesin kóterý men urpaq tárbıesin alǵa qoıatyn S.Túgel osy sharanyń aldynda elordadaǵy túngi klýbtardy aralap, jasóspirimderdi jat qylyqtardan boıyn aýlaq ustaýǵa shaqyrdy. Búginde kandıdattyń 3 qalada jáne 15 oblysta 17 qoǵamdyq saılaýaldy shtaby jumys istep jatyr.
Daıyndaǵan
Orynbek О́TEMURAT,
Qalmahanbet MuQametqalı,
Hamıt ESAMAN,
«Egemen Qazaqstan»
