Aımaqtar • 23 Mamyr, 2019

Áýlıeatalyq ónerpazdar ózbek óńirinde

796 ret kórsetildi

Qazaqstan jáne О́zbekstan elderiniń ǵasyrlar boıy jalǵasyp kele jatqan mádenı baılanysyn odan ári nyǵaıtý maqsatynda Jambyl oblysy ákimdiginiń qoldaýymen oblystyń óner sheberleri ózbek jerinde bolyp, «Jambyldan Jızaqqa tartý» atty mádenı is-sharasy Jızaq oblysynyń Myrzachól aýdanynan bastaý aldy.

Atalǵan aýdannyń qazaq halqy shoǵyrlanǵan Gagarın aýylyndaǵy О́zbek-Qazaq mádenıet ortalyǵynda  saltanatty qarsy alý sharasy ótip, Jızaq oblystyq mádenıet basqarmasynyń basshysy Kamol Fahradov kelgen qonaqtarǵa ystyq lebizin bildirdi. Jambyl óńirinen dostyq delegasııasyn bastap barǵan Jambyl oblystyq mádenıet, arhıvter jáne qujattama basqarmasynyń basshysy Dúısenáli Byqybaev is-sharanyń mańyzdylyǵyna toqtalyp, eki el arasyndaǵy júzege asyp jatqan ıgi bastamalardyń ary qaraı jalǵasyn tabatynyna senim bildirdi.

 Áýlıeatalyq ónerpazdar kezdesý barysynda ala shapandy aǵa ıyndarǵa qazaq ónerin nasıhattady. Kenen Ázirbaev atyndaǵy Jambyl oblystyq fılarmonııasynyń «Alataý» folklorlyq ansambli Aman Maldybaevtyń «Kóne Taraz», Ábdimomyn Jeldibaevtyń «Erke sylqym» kúılerin oryndasa,   Mádenıet salasynyń úzdikteri Ońal Azamatova, Jandos Omarov jáne Dınara Dıhanbaeva halyq ánderi men jergilikti kompozıtorlardyń ánderin shyrqady. Sonymen qatar, Sarysý aýdandyq «Aıjan qyz» halyqtyq bı ansambli bıden shashý shashty. Al, Jýaly aýdandyq halyq teatry Baqyt Bedelhannyń «Taǵdyr taqtasy» atty Asanáli Áshimovtyń ómir tarıhyna qurylǵan poetıkalyq dramasyn usyndy. Sapar barysynda jambyldyq óner sheberleri jızaqtyqtarǵa sheberlik saǵattaryn ótkizip, tájirıbe almasty. Shara sońynda Myrzachól aýdanyna saıahat uıymdastyryldy. Sonymen qatar, jambyldyq delegasııa jergilikti qazaqtarmen de kezdesip, qarııalardyń batasyn aldy. Jızaq oblysy boıynsha qazaq mádenı ortalyǵynyń tóraǵasy О́tep  Sedamanovqa Áýlıeata jerinen estelik retinde shyǵarmashylyq áriptesteri syı-sııapat kórsetti. Sondaı-aq, jambyldyqtar О́zbekstan Respýblıkasynyń Tashkent qalasynda da bolyp, Jambyl oblystyq kıno ortalyǵy «Jaýjúrek myń bala», «Bizdiń qalanyń hanzadasy» atty kórkem jáne «Muzbalaq» anımasııalyq fılmderiniń kórsetilimin uıymdastyrdy.

 Eki eldiń mádenıet ókilderiniń kezdesýi barysynda Jambyl oblystyq mádenıet, arhıvter jáne qujattama basqarmasynyń basshysy Dúısenáli Byqybaev pen Jızaq oblysy ákiminiń orynbasary Azızbek Egamberdıev, oblystyq mádenıet basqarmasynyń basshysy Kamol Fahrodov baýyrlas eki el arasyndaǵy júzege asyp jatqan ıgi is-sharalar ǵasyrlar boıy úzilmeı kele jatqan mádenı baılanysty odan ári nyǵaıta túsetinine senim bildire otyryp, jambyldyq delegasııaǵa qasıetti Mekke qalasy men О́zbekstannyń ǵajaıyp tabıǵaty sýrettelgen saǵattaryn syıǵa tartty. О́z kezeginde áýlıeatalyqtar da Jambyl oblysy ákimdiginiń atynan óńir sheberleriniń qolynan shyqqan Jambyl Jabaevtyń beınesi órnektelgen kilemshe jáne «Kóne Taraz» kartınasyn tabys etti.

 Sonymen qatar, áýlıeatalyq delegasııa Jızaq oblysynyń tarıhı-mádenı oryndaryn da tamashalady. Samarqand qalasynda ornalasqan «Regıstan» alańy, Ámir Temir men Bıbı Haným keseneleri, Myrza Ulyqbek observatorııasy, «Shahın-Zında» jáne «Haziret Qyzyr» memorıaldy kesheni jáne taǵy basqa da eskertkishterge ekskýrsııa jasady. Sońynda Farysh aýdanynda  ózbek ónerpazdarynyń konserti uıymdastyryldy.
Sońǵy jańalyqtar

Aqyly joldaǵy ahýal qandaı?

Aımaqtar • Keshe

Buǵybulaý

Qazaqstan • Keshe

Júze bilý – ómir

Qoǵam • Keshe

О́lketanýshy

Qazaqstan • Keshe

Kebenek

Tarıh • Keshe

Sáýkele

О́ner • Keshe

Uqsas jańalyqtar