Qoǵam • 13 Maýsym, 2019

Bardyń baǵasyn bileıik

Qoǵamda búlik shyǵaryp, iritki salý, halyqty arandatý óte aýyr kúná ekeni, onyń buzaqylyq bolyp sanalatyny belgili. Bul jóninde Islam dini jaıyndaǵy kitaptar men dinı ýaǵyzdarda az aıtylyp júrgen joq. Tipti osy turǵyda Alla taǵaladan túsken qasıetti Quran Kárimde: «Buzaqylyq kisi óltirýden qıyn» (Baqara súresiniń 191-aıaty) dep naqty jazylǵan.

Joldybaı BAZAR

Bul jerdegi «Buzaqylyq» sózi keıbir adamdardyń mádenıetsizdiginen týyndaıtyn óreskel áreketter jóninde emes, el-jurttyń aýyzbirshiligine, jarasymdy yntymaǵyna syna qaǵar iritki salýshylar isine qatysty ekeni anyq. Demek, el tatýlyǵyna keri áserin tıgizetin áreketterge barý, osyndaı jaıttardy uıymdastyrý – adam óltirýden de aýyr qylmys. О́ıtkeni áldekimderdiń buzyq nıetinen týyndaıtyn orynsyz is-qımyldardyń sońy jappaı dúrbeleńge, qaqtyǵysqa ulasyp, sonyń saldarynan adamdardyń qany tógilýi yqtımal. Sondyqtan jurtshylyqty jeliktirip aıdap salý, túrli jalǵan aqparattar taratý arqyly eldiń kóńil kúıin buzyp, qalyptasqan birliktiń berekesin qashyrýdyń amal-aılasyn qoldaný aýyr kúná sanalady.

Jalpy, memlekettiń táýelsiz bolyp, ony óz azamatyń basqaryp, qoǵamnyń barlyq salasynda, atqarýshy organdarda óz qandastaryń qyzmet etip júrse, muny Allanyń bergen nyǵmeti, baǵa jetpes syıy dep uqqanymyz jón. Eger biz bul orasan zor jetistiktiń qadirine jete almasaq, onda moınyńa ózgeniń qylburaýy túsýi múmkin.

Búginde jurtymyz qoǵamymyzdaǵy tatýlyqty eń basty qundylyq sanaıdy, ony ornyqty damýdyń kepili dep biledi. Bul óz kezeginde halqymyzdyń kóńil kúıiniń jaqsy bolýyna ózindik yqpalyn tıgizip otyr. Degenmen, qoǵam bolǵan soń ártúrli keleńsiz kórinister boı kórsetpeı turmaıdy. Mundaı jaǵdaıattardyń basym bóligi sheshimin kútken birqatar áleýmettik máselelerge qatysty ekeni baıqalady. Alaıda olardy jalpyulttyq óte kúrdeli túıtkil retinde qarastyryp, túńilý, sóıtip ony bıliktiń basty aıyby sanaý kóńilge qonymsyz. Árkim óziniń áleýmettik ahýalyn ózi sheshýge umtylýy kerek. Mundaı zamanda masyldyq pıǵyly júre bermeıtinin umytpaǵan abzal.

Táýelsizdik jyldarynda memleketimiz jas urpaqty otandyq jáne sheteldik joǵary oqý oryndarynda tegin oqytýda, halyqty baspanamen, jumyspen, tegin medısınalyq járdemmen qamtýda, shaǵyn jáne orta bıznesti, aýyl sharýashylyǵy salasyn damytýda jáne basqa da aýqymdy sharalardy júzege asyrýda kóptegen qoldaý kórsetti. Buǵan jurtshylyq kýá. Memleketten beriletin mundaı kómekter barshaǵa jappaı ońdy-soldy úlestirilmeıtinin, onyń belgilengen sharttary bolatynyn eskere sóılesek, Úkimet tarapynan naqtylanǵan talaptardyń údesinen shyǵa almaı, tıisti kómekterdi ala almaǵandar men berilgen múmkindikti óziniń qyrsyzdyǵyna baılanysty ornymen paıdalanbaı, sharýasy shatqaıaqtaǵandardyń kináni ózinen emes, ózgeden izdep, aqyrynda bılikti jazǵyryp shyǵa keletini bar...

Aramyzda túımedeı nárseni túıedeı etip kórsetip, áleýmettik jeliler arqyly kópshiliktiń kóńil kúıin túsirer sózder aıtyp, ózin aqıqatshyl, halyqshyl, shyndyqty betke aıtar azamat retinde tanytýǵa tyrysatyndar barshylyq. Olardyń zerdelenbegen, ishki máni bulyńǵyr aqparattary qarapaıym halyqty ári-sári kúı keshtirip, talaılardyń «burq-burq» qaınaýyna túrtki bolýda. Osynyń saldarynan sondaı búkir pikirlerge ımandaı senetinder el ishinde jasalyp jatqan ıgilikti isterdi, sharapatty bastamalardy kórip tursa da baıqamaǵansyp, ózeýreıdi. Bul – qaýipti úrdis, elimizdegi ıgilikti isterdi búrkemeleýdiń aılasy, halyq pen bılik arasynda qalyptasyp kele jatqan senim men ózara baılanysqa soqqy berýdi maqsat etken jaǵymsyz áreket.

Taǵy bir ereksheler aıta keter jaıt, búginde jekelegen azamattardyń ózderiniń áleýmettik jeke máselelerin búkil halyqtyń basyna túsken ortaq aýyrtpashylyq retinde kórsetýge tyrysý úrdisi baıqalady. Bul bizge abyroı ákelmeıdi. О́mir bolǵan soń keıde bireýlerdiń tirligi ónbeı, jumysy júrmeı jatady. Munysyn qasiret kórip, oǵan búkil qoǵamdy aıypty sanap, kústánalap, ártúrli jaǵymsyz pikirlerge erik berip, baıbalam salatyndar el tynyshtyǵyna keri yqpalyn tıgizip, qarapaıym halyqty arandatyp júrgenin uqsa deımiz.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz