«Fenerbahcheni syrt alańda jeńý úshin bir chempıondyǵymdy pıda eter edim»

Fýtbol • 24 Aqpan, 2020

«Fenerbahcheni syrt alańda jeńý úshin bir chempıondyǵymdy pıda eter edim»

61 ret kórsetildi

Derbı – belgili bir óńirdiń nemese bir qalanyń eki komandasy kezdesetin oıynǵa qatysty aıtalady. Derbı matchtyń ereksheligi – ony oıynshylar da, jankúıerler de asyǵa kútedi jáne alańda bolatyn oıyn men alań syrtyndaǵy oqıǵalar dep bólinedi. Árbir derbıdiń óz aty, óz tarıhy jáne dástúri bar, olar sonysymen qyzyq.

Egemen Qazaqstan

Álemde túrli derbı bar: Halyqtyń komandasy Spartak pen áskerdiń komandasy SSKA; Mázhab derbıi – Glazgo qalasynan katolık Seltık pen protestan Reındjers; Kedeı men baılar derbıi – Mılan men Inter; El-Klasıko – Real Madrıd pen Barselona t.s.s derbıler bar.

Búgingi taqyrybymyzǵa arqaý bolyp otyrǵan sondaı bir derbıdiń biri – qurlyqtyq derbı atalyp ketken Fenerbahche men Galatasaraı arasyndaǵy teketires týraly bolmaq. Stambýldyń Azııa men Eýropa bólikterinde ornalasqan bul qos komanda Túrkııanyń eń kóp chempıon bolǵan qos komandasy. Jeksenbi kúni qos komanda Túrkııa sýper lıgasynyń 23-aptasynda kezdesti. Bul matchtyń tartymdy tustarynyń eń bastysy – Fenerbahche jeńilse, chempıondyq jarystan úmiti úzile bastaıtyn edi, Galatarasaı jeńse, chempıondyq jarysyn jalǵastyrýmen qatar Fenerbahcheni syrt alańda 20 jyl boıy jeńe almaı kele jatqan serııasyn támamdaý edi.

Matchtyń tóreshisi – Halıl Ýmýt Meler edi, biraq ol tóreshini taǵaıyndamaı turyp, áleýmettik jelilerde Halıldyń sol derbıge tóreshi bolatyny boljanyp jatqan edi, óıtkeni Halıldiń ózi de, ákesi de Galatasaraı jankúıeri edi. О́z alańynda oınap jatqan komandalarǵa búıregin buryp turatynyn, tipti qalasa penaltı qoıyp beretini týraly da aıtylyp jatty. Týra solaı boldy da: 2 penaltı qoıylǵan, 4 gol soǵylǵan, 3 qyzyl qaǵaz, 11 sary qaǵaz kórsetilgen matchta alǵash bolyp Galatasaraıdyń qaqpasyna penaltı qoıyldy. Fenerbahche bul múmkindikti jibermeı, matchtyń 21-mınýtynda Maks Krýzeniń penaltıden soqqan golymen alǵa shyqty. Galatasaraı birinshi taımda esepti teńestirmekshi bolyp, kóbirek shabýyldap, 40-mınýtta Donktyń soqqan golymen úziliske 1-1 esebimen ketedi.

Galatasaraı bapkeri Fatıh Terım Fenerbahche stadıonyna shabýyldaýshy komandamen keldi. Eki komanda da jeńgisi keldi, biraq Galatasaraıdyń «tábeti» myqtyraq edi. Bapkerler fýtbolshylaryna úzdiksiz nusqaýlar berýde. Sondaı sátterdiń birinde Fenerbahche bapkeri Ersýn Iаnal alańǵa kirip ketedi. Buny baıqaǵan tóreshi ony qyzyl qaǵazben alańnan qýady jáne Fenerbahche bapkersiz qalady. Ekinshi taımda úzdiksiz shabýyldardyń nátıjesinde tóreshi Fenerbahche qaqpasyna penaltı qoıyp berdi. Ony qatty soqqy arqyly gol soǵyp, esepti 2-1-ge jetkizgen – Galatasaraıǵa úlken úmittermen transfer etilgen, biraq nátıje kórsete almaı júrgen Radamel Falkao edi. Oıynnyń 86-mınýtynda Fenerbahcheden Denız Túrúch pen Galatasaraıdan Iýnes Belhanda alańnan qyzyl qaǵazben qýylyp, komandalar on adammen oınaýǵa májbúr boldy.

Fenerbahche oıyndy teńestiremiz dep júrgende, Galatasaraı qarsy shabýylmen 97-mınýtta Onıýkýrý esepti 3-1-ge jetkizedi. Osylaısha, Fenerbahche jeńilip, búginge deıin jınaǵan 38 upaıymen 6-orynǵa túsip, chempıondyqtan alystaı bastasa, Galatasaraı 45-upaımen birinshi oryndy bólisip tur. Osylaısha, Galatasaraı syrt alańda 1999 jylǵy 22-jeltoqsanda sońǵy márte jeńgen qarsylasyn araǵa 20 jyl salyp baryp qaıtadan jeńip, tarıhı jeńiske jetti. Sodan beri Shúkrú Sarachoglý stadıonynda oınalǵan 23 oıynnyń 15-inde jeńilip, 8 oıyn teń bitken edi.

Galatasaraıdyń 7368 kúnnen keıin kelgen bul tarıhı jeńisi týraly materıaldy Galatasaraıdyń ańyz qaqpashysy Farıd Mondragonnyń sózimen aıaqtaıyn:

Galatasaraıda 2001-2007 jyldar arasynda 6 jyl qaqpashy boldym. 2 márte chempıon boldym, bir márte kýbok jeńip aldyq, biraq Fenerbahchemen Shúkrú Sarachoglý stadıonynda oınaǵan oıyndarda jeńis kórmedim. Tek jeńilis kórdim. Bireý maǵan kelip, «Fenerbahcheni syrt alańda jeńý úshin bir chempıondyǵyńdy pıda et» dese, men qýana-qýana keliser edim.

Ashat Shotaev

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz