Qaraǵandy oblysyna koronavırýsty anyqtaıtyn ekspress-testiler jetkiziledi

Aımaqtar • 18 Naýryz, 2020

Qaraǵandy oblysyna koronavırýsty anyqtaıtyn ekspress-testiler jetkiziledi

Qaraǵandy oblystyq densaýlyq saqtaý basqarmasynyń basshysy Erjan Nurlybaev óńirge koronavırýs ınfeksııasyn anyqtaýǵa arnalǵan ekspress-testilerdiń alǵashqy partııasyn ákelýdiń josparda bar ekenin málimdedi.

Qaırat Ábilda

Vırýstyń bar-joǵyn bir tamshy qan saraptamasynan anyqtaıtyn jedel-testiler dárihanalarda satylatyn bolady. Mundaı taldaýdyń dáldigi 80% quraıdy. Jedel-testiler ınkýbasııalyq kezeń barysynda vırýstyń bar-joǵyn anyqtamaıdy, al teris nátıje bolǵan jaǵdaıda egjeı-tegjeıli tekserýden ótý kerek bolady.

– Qazir koronavırýstyq ınfeksııany anyqtaý jónindegi zerthanalardy uıymdastyrý basty mindetterdiń biri bolyp otyr. Jaqyn arada biz eki nemese sondaı úsh zerthana ashýdy josparladyq. Bul oblystyń qajettiligin óteý úshin jetkilikti bolady, – dedi densaýlyq saqtaý basqarmasynyń basshysy.

Erjan Nurlybaevtyń aıtýynsha, búgingi tańda oblysta táýlik boıǵy karantınde 113 adam bar. Alǵashqy bolyp túskender qazir úılerine qaıtaryla bastaǵan. 16 naýryz kúni karantınniń tolyq merzimin ótegen alty adam stasıonardan shyǵaryldy. Saraptama nátıjesi boıynsha olardyń qanynan koronavırýs tabylǵan joq. Úı karantıninde 39 adam otyr. Taǵy 284 adam – medısınalyq baqylaýda, 273-i qashyqtan baqylaýǵa alynǵan. Olardyń eshqaısysynda koronavırýs belgileri joq.

Sondaı-aq, Qaraǵandy oblysynda jedel járdem shaqyrýlar sany artqan joq, barlyq stansa shtattyq rejimde jumys isteýde.

Oblysta medısınalyq maskalardyń jetispeýshiligine qatysty másele sheshimin taýyp jatyr. Jergilikti «MF Mereı» JShS kompanııasy táýligine 400 myń maska óndirip, olar Qaraǵandy, Temirtaý, Balqash, Jezqazǵan jáne basqa qalalardyń dárihanalaryna jetkizilýde.

– Qazir oblystyń arnaıy medısınalyq jabdyqtaý bazasynda 173 myń metr dáke bar. Biz medısınalyq qyzmetkerlerge, polısııaǵa, HQKO qyzmetkerlerine jáne adamdarmen tikeleı baılanysta bolatyn basqa da qyzmet ıelerine arnalǵan tańǵyshtardy tigýdiń joldaryn qarastyryp jatyrmyz, – dedi Erjan Nurlybaev.

Sondaı-aq, densaýlyq saqtaý basqarmasynyń basshysy baǵany negizsiz kótere otyryp, jeke qorǵaný quraldaryn satýda alypsatarlyqqa barǵandar úshin jaýapkershilik qarastyrylatynyn eske saldy. Monıtorıng kún saıyn júrgiziledi, onyń ishinde ınternet-saýda qadaǵalanady.

Erjan Nurlybaev adamnyń ózin-ózi oqshaýlaýy aldyn alýdyń eń tıimdi sharasy ekendigin atap ótti. Adamdar jappaı jınalatyn jerlerge barýdan bas tartqan abzal. Azyq-túlik alýǵa otbasy músheleriniń birin ǵana jiberip, qaýyrt ýaqytta qoǵamdyq jerlerden aýlaq bolǵan jón. Mundaıda jetkizip beretin qyzmetterdi paıdalanǵan durys. Sondaı-aq, medısınalyq maska kıip, antıseptıkalyq quraldardy paıdalanýdy umytpaý kerektigin eske salady dárigerler.

Qaraǵandy oblysynyń aǵymdaǵy jaǵdaıy men koronavırýstyq ınfeksııanyń aldyn alý is-sharalary týraly suraqtardy oblystyq densaýlyq saqtaý basqarmasynyń call-ortalyǵynyń (8-7212) 955-559 nómiri boıynsha qoıýǵa bolady.

Qaraǵandy oblysy

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz