Kóktal aýylynda kósheli is te, keleli másele de bar

Aımaqtar • 22 Naýryz, 2020

Kóktal aýylynda kósheli is te, keleli másele de bar

56 ret kórsetildi

Kóktal aýyly Talas aýdanynyń ortalyǵy Qarataý qalasynan 18 shaqyrym qashyqtyqta ornalasqan. Munda 884 úı bar. Turǵyndary negizinen mal sharýashylyǵymen aınalysady.

Hamıt ESAMAN

«Buryn aýyl kólemi 88 gektar ǵana bolatyn. Negizi Kóktal Qarataýdan bólinip shyqqaly jeri bolmaǵan. Osy bar jerge ótken jyly 3300 gektar jer qosyp aldyq. Bul jerler Qyzyláýit aýylyna qaraıtyn. Búginde tıesili jerimizdi mal jaıylymyna paıdalanyp otyrmyz. Halyq ta mal sharýashylyǵyn órkendetip, tirligin tiktep otyr», deıdi aýyl ákimi Roman Qyryqbaev.

Jalpy, Kóktal aýylynda el ıgiligi úshin atqarylyp jatqan sharýalar kóp. Talas aýdanynyń ákimi Baqyt Qazanbasovtyń aıtýynsha, aýylda Elbasynyń «Týǵan jerge týyńdy tik!» baǵdarlamasy boıynsha birqatar jumystar atqarylǵan. Jergilikti halyqtyń ıgiligine aýyldyń túlegi, kásipker Alpamys Baqytuly óz esebinen 5 mıllıon teńgege jańa meshit salyp bergen. Buryn bireýdiń jeke úıin meshit retinde paıdalanyp kelgen kópshilik bul saýapty iske rızashylyǵyn bildirýde. Sonymen qatar, ol «Týǵan jerge týyńdy tik!» baǵdarlamasy sheńberinde 35 mıllıon teńgege aýyldan sport keshenin de turǵyzypty. Búginde aýyl jastary sportqa bet buryp, salamatty ómir saltyn ustanady eken. Aýyl turǵyny, ardager ustaz Ýaıs Qoıshyman aýylda sońǵy jyldary birde-bir qylmys tirkelmegenin, aýyl azamattarynyń uıymshyldyǵynyń ári tártibiniń jaqsy ekenin aıtady. Sol sııaqty aýyl túlegi, kásipker Maıra Jarova da «Týǵan jerge týyńdy tik!» baǵdarlamasy aıasynda 1 mıllıon teńgege demeýshilik jasap, aýyldyń kireberisine arka ornatypty.

Al, kezinde baldyr basyp, qaraýsyz qalǵan «Kóktal-Pıoner kóli» kóline 17 myń balyq jiberilipti. Atalǵan kóldiń 2 mıllıon kýb syıymdylyǵy bar eken. Bul jumys alǵashqy nátıjesin de berip úlgeripti. Endi jergilikti sharýalar qus sharýashylyǵymen aınalysýda. Degenmen, aýylda sheshimin kútken birqatar máseleler de bar. Aýyl ákimi Roman Qyryqbaevtyń aıtýynsha, aýdan ortalyǵy Qarataý qalasy men Kóktal aýylynyń arasyndaǵy 18 shaqyrym joldyń nasharlyǵy turǵyndardyń negizgi máselesi eken. «Eki ortadaǵy joldyń sapasy nashar. Bul jol 2019 jylǵa deıin «Qazfosfat» mekemesiniń joly bolǵan. Kezinde joldy óz menshigine alyp qoıǵan. Biraq byltyr aýdanǵa qaıta ótken», deıdi aýyl ákimi. Alaıda joldyń jobalyq-smetalyq qujaty daıyn eken. Joba quny 325 mıllıon teńgeni quraıdy.

Turǵyndar úshin ózekti taǵy bir másele – kógildir otyn. Talas aýdanynda 13 aýyldyq okrýg bar bolsa, búginde onyń 5-eýine gaz kirmegen. Olar Qarataýdyń taýly aımaǵynda ornalasqan Kóktal, Qasqabulaq, Eseıhan, Berikqara aýyldary. Aýdannyń kóptegen aýyldaryna gaz kirgenimen, Kóktalǵa áli jetpepti. Jergilikti turǵyndar osy bir kógildir otyn máselesi sheshilse degen nıette. Jol men gaz tirshiliktiń negizgi kózi bolǵandyqtan, aýyl halqy úshin bul máseleler ózektiligin joımaıdy. Dese de, turǵyndar talaı jyldan beri qordalanyp kele jatqan keleli máseleler aldaǵy ýaqyttarda sheshilip qalar degen úmitte.

Jambyl oblysy