Aqtoǵaı taý-ken baıytý kombınaty óndiris kólemin arttyrady

Qazaqstan • 27 Naýryz, 2020

Aqtoǵaı taý-ken baıytý kombınaty óndiris kólemin arttyrady

IIDD baspasóz qyzmeti Aqtoǵaı taý-ken baıytý kesheninde óndiris aıasyn keńeıtý jobasynyń iske asyrylý ústinde ekendigin habarlady. Joba Aqtoǵaı mys ken ornynyń jumys istep turǵan ashyq kenishinen shıkizatty qaıta óńdeý kólemin 2 ese ulǵaıtý úshin qosymsha baıytý fabrıkasyn salýdy kózdeıdi.

Suńǵat ÁLIPBAI

Aqtoǵaı - álemdegi eń iri mys ken oryndarynyń biri. Munda shamamen 5 mln tonna mys bar. Mys qazirgi ınfraqurylymnyń barlyq baǵyttarynda, elektr qýatyn óndirý men taratýda, kólikte, kommýnıkasııalarda, ónerkásiptik jabdyqtar men elektr quraldaryn óndirýde mańyzdy ról atqarady. Sondyqtan mys óndirisiniń kólemin ulǵaıtý - ózekti másele.

Boljam boıynsha, jańa zaýyttaǵy óndiris kólemi 2022-2027 jyldary aralyǵynda 80 myń tonnaǵa jýyq konsentrattaǵy mys óndirý múmkindigin beredi. Kenishtiń odan ári jumys isteý kezeńinde jylyna qosymsha 60 myń tonna óndirý qýatyna ıe bolady, ol kezde mystyń ortasha quramy mıneraldyq resýrstarda ustaý sheginde – 0,34% bolady.

Sondaı-aq Aqtoǵaı-II kezegi paıdalanýǵa berilgennen keıin sýlfıdti kennen jyl saıynǵy mys óndirisi 2022-2027 jyldar aralyǵynda 170 myń tonnaǵa deıin jetip, sonan keıingi ýaqyttary qosymsha 130 myń tonna mys óndirýge deıin artýy tıis. 2027 jylǵa deıin taza aqshalaı ózindik qunnyń josparly kórsetkishi bir fýnt úshin 100-120 AQSh senti mólsherinde saqtalady. Osylaısha atalmysh joba ındýstrııa baǵytyndaǵy az shyǵyndy jobalardyń biri sanalady.

Búgingi tańda sýlfıd fabrıkasynyń ǵımaraty boıynsha qurylys-montaj jumystary júrgizilip jatyr: irgetasty qalaý aıaqtaldy, metall qurylymdary salyndy, barlyq úsh dıirmen boıynsha tirek plıtalary ornatyldy. Qurylys jumystaryna 2,5 myń adam tartyldy. Jospar boıynsha jańa baıytý fabrıkasyndaǵy birinshi ken 2021 jyly óńdelmek. Sondaı-aq, óndiristi iske qosyp, jobalyq qýatqa shyqqannan keıin kásiporynda qosymsha jumys oryndarynyń sany 700-ge jýyqtaıdy.

Atalǵan jobany júrgizýshi KAZ Minerals kompanııasy - Qazaqstandaǵy mys óndirý men jańa taý-ken óndiristerin damytýǵa baǵyttalǵan mys óndiretin iri kompanııalardyń biri. Onyń quramyna: Pavlodar oblysyndaǵy Bozshakól jáne Shyǵys Qazaqstan oblysyndaǵy Aqtoǵaı ashyq túrdegi ken oryndary, Shyǵys Qazaqstandaǵy 3 jerasty kenishi jáne Qyrǵyzstandaǵy ashyq túrdegi Bozymshaq altyn jezdi kenishi kiredi.

2017 jyldyń jeltoqsanynda KAZ Minerals tobynyń Dırektorlar keńesi 2021 jyldan bastap sýlfıdti kendi qaıta óńdeý qýatyn eki esege, 50 mln tonnaǵa deıin arttyrý maqsatynda quny 1,2 mlrd AQSh dollaryn quraıtyn Aqtoǵaı kenin keńeıtý jobasy týraly jarııalady. Osylaısha, óńdeý kóleminiń artýyna baılanysty sýlfıd rýdasyn óńdeý merzimi 28 jylǵa deıin qysqarady. Jobany iske asyrý óńir ekonomıkasynyń qarqyndy damýyna qosymsha serpin berip, aımaqtyq jáne respýblıkalyq bıýdjetterge salyq jáne basqa da túsimderdiń ulǵaıýyna septigin tıgizedi. Sondaı-aq, joba qosymsha jumys oryndaryn ashýǵa múmkindik berip, osyǵan oraı qazir qolǵa alynyp otyrǵan ulttyq kadrlardy oqytý jáne olardyń biliktiligin arttyrý sharalaryn jalǵastyratyn bolady.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz