Aımaqtar • 31 Naýryz, 2020

Zaısanǵa aqqýlar kelip qonyp jatyr

Shyraıly Shyǵystyń aına kóli – aıdyndy Zaısannyń mańyna aqqýlar kelip qonyp jatyr, dep habarlaıdy jergilikti turǵyndar.

Jergilikti turǵyndardyń aıtýynsha, Zaısan aýdanyna qarasty Birjan aýylynyń irgesindegi Shegen fermasynyń janyndaǵy kólshikterge kesheli beri eki jup aqqý qonǵan. Qonyp qana qoımaı, emin-erkin erkeleı júzip júr. Al bul eldi meken Zaısan kóline quıatyn Ertis ózeninen de, kólden de birneshe shaqyrym ǵana qashyqta ornalasqan, kólshikter men ózenderdiń bári Ertisti toltyra kelip, Zaısan kóline quıady. Kóldiń ózi Birjan aýyldyq okrýgine qarasty Aqaral aýylynan 15 shaqyrym jerde ǵana.

Eske salsaq, osydan biraz kún buryn kóldiń ekinshi jaǵyndaǵy Tarbaǵataı aýdanyna qarasty Qandysý ózenine de aqqý qonǵanyn aqjarlyq aǵaıyndar súıinshilep jetkizgen bolatyn. Endi mine, Zaısannyń jaǵalaýlaryn qus erkesi aqqýlar mahabbat dýmanyna bólep jatyr.

Kóktem shyqqanymen, qystyń yzǵary áli qaıta qoımaǵan aımaqqa mahabbat sımvoldarynyń erte kelýin koronavırýs qysqan qazirgideı qıyn ýaqytta zaısandyq jurt jaqsylyqtyń nyshanyna balap otyr. Tipti, bul sırek qubylysqa arnap qazir Nur-Sultan qalasynda turatyn birjandyq aqyn Baqytbek Qyzyruly arnaıy jyr da jazǵan eken.

Tórt aqqý!

Tórt aqqý ushyp aýylymnyń shetinen.
Toptalyp kúzde, jyly jaqqa ketip eń...
Kóktemde kelip qaldyń ba jerdi saǵynyp?
Tabylypsyńdar Shegende kólshik betinen?!

Nege keldińder qar áli durys ketpegen?
Ertisim aǵyp, Zaısan kólge jetpegen.
Saýyr - Saıqan muz bolyp tur ǵoı qozǵalmaı.
Yzǵar jel soǵyp, ótpesin salqyn ókpeden.

Alty aı ýaqyt, qalaı ótti eken ol jaqta?..
Amalsyzdyqtan, júrdińizder-aý kún qaqta.
Jyly jaqtardyń, qaldary qalaı jaqsy ma?
Jiberip oıdy, ar jaǵyn óziń jumbaqta...?!

Tilińdi bilmeım, átteń aı sózge tartar em?
Tań atyryp, kól jaǵalap jatar em!
О́mirge kerek, kóp nárse men de jazyp ap.
Kúnmen batyp, tańmen birge atar em!

Qus ekesh qustyń, sulýysyń arlanǵan!
Júzińdi kórip, adamzat sirá tańdanǵan.
Mahabbatqa da beriktik jaǵy sizderde...
Tabıǵatqa da ádemi bolyp tańdalǵan!

Qýanyp jatyr, el jurtym sizder kelgenge!
Saǵynysh oty bastalady aý jerdende...
Ár adamnyń bul ómirde armany.
Qartaıyp baryp, týǵan jerde ólgenge!

Otyryńdar, sharshap keldińder, ushpańdar!
Jan-jaqqa qara, kelip qalmasyn dushpandar?
O adamdar, sert bershi aqqýdy atpaýǵa?
Sóz berseńder tastamaı ony ustańdar!