Karantındegi karıkatýralar

«Koronavırýs», «Karantın» degen sózder qazirgi tilmen aıtqanda trendte turǵany ótirik emes. «Báleden mashaıyq qashypty», «Atyń óshkirdi sóz etpeıik!» degenimizben alańdatyp otyrǵan aýyr ahýaldy aınalyp ótý múmkin bolmaı otyr. Árıne, sizderden áýlıe emespiz, bir ǵana aıtarymyz, eger saqtanyp otyrǵandaryńyz ras bolsa, onda sary ýaıymǵa salynyp, taza saryla berýdiń qajeti joq sııaqty.

Basynda beısaýat qaterdi qısynsyz qaljyńǵa aınaldyrǵandarǵa qattyraq aıtqanymyz ras. Alaıda salaýatty ómirdi nasıhattap, syrqatty sarkazmmen soıyldap jatqandardy shyǵarmashylyq turǵydan aqtaýǵa tıispiz. Aıtqymyz kelip otyrǵany karantındegi karıkatýralar tuman basqan tuldyr oıymyzdy sál de bolsa seıiltetinin baıqadyq.

Ýkraınalyq karıkatýra sheberi Valerıı Momot karantın rejimine arnalǵan karıkatýralar serııasyn shyǵaryp úlgeripti. Baspasóz quraldaryna bergen suhbatynda ol «Bastysy, árıne, densaýlyq. Adamdarǵa aıtarym, ázil-ospaq sezimin joǵaltpańyzdar, optımıst bolyńyzdar, osynyń bári qazirgi kezdegi qıyn jaǵdaıdy jeńýge kómektesedi» deıdi.

Reseılik sýretshi Sergeı Elkınniń de saıası astary salmaqty syqaq sýretteri kúndelikti Deutsche Welle medıa kompanııasynyń ınternet-betterinde shyǵyp jatyr. «Svoboda.org» portaly atalǵan qylqalam sheberiniń karıkatýralaryn kún saıyn berip otyr.

Koronavırýsty  otandyq sýretshiler de qylqalamdarymen túırelep jatyr. Jyǵylatyn jaý kórinbeıdi, átteń...

Belgili karıkatýra sheberi Ǵalym Smaǵul óziniń feısbektegi paraqshasyna urada tyǵylyp aman qalǵan adamdy beınelep: «Soǵysta kóp shoshańdamaı okopta jatyp, eline aman kelgen atamyzdyń taktıkasyna kósheıik» dep jymıyp qoıypty.

Ǵalekeńniń «Nege.kz» saıtyna budan bólek birneshe karıkatýrasy jarııalanyp úlgerdi. Bir sýrette ánshi Marat Omarov kúısandyqtyń aldynda «Koronavırýs, ket, ket, ket!» dep ańyratyp án aıtyp jatyr. Aldyńǵy shepte jap-jasyl vırýstardyń áskeri de, ánshiniń tylynda aq halatty dárigerlerdiń qosyny qol jıyp tur.

Belgili sýretshi, dızaıner Ańsaǵan Mustafa da atalǵan aty joq indettiń qaterin eskertip, óz kózqarasyn bildiripti.

Ańsaǵannyń «Úıde otyr!» degen sýreti shynymen de qaterdiń qolyndaǵy shalǵy saqtanbasaq kez kelgenimizdiń jelkemizdi qıyp túsýi múmkin ekenin eskertedi.

Al «Vırýspen oınama!» sýreti balalardy aýlaǵa shyǵaryp, átkenshekpen oınatýǵa bolmaıtynyn qaperimizge salady.

Bir sózben aıtqanda sýretshiler de adamzatty qylqalamdarynyń ushyndaǵy názik qııaldarymen qorǵaý at salysýda.

Al, siz qandaı áreket etýdesiz?