Oblystar kóktemgi egin naýqanyna daıyn

Qazaqstan • 08 Sáýir, 2020

Oblystar kóktemgi egin naýqanyna daıyn

Bıylǵy egin jumystary úshin dızel otynyna usynylatyn baǵa tonnasyna 194 myń teńgeni qurady. Jetkizý men saqtaýdy esepke alǵanda sharýalar úshin boljamdy baǵa lıtrine shamamen 165 teńgeni quraýy tıis. Jalpy kóktemgi dala jumystaryn júrgizýge 387 myń tonna dızel otyny bólindi.

Erkejan AITQAZY

Búgingi egin alqaptaryndaǵy jumystyń barysy jaıynda Prezıdent janyndaǵy Ortalyq kommýnıkasııalar qyzmeti alańynda ótken brıfıngte Aýyl sharýashylyǵy mınıstrliginiń birinshi vıse-mınıstri Aıdarbek Saparov aıtyp berdi. Belgili bolǵandaı, bıyl aýyl sharýashylyǵy daqyldarynyń jalpy egis kólemi 22,5 mln ga quraıdy. Dándi jáne dándi-burshaqty daqyldardyń alańy 15,2 mln ga, sonyń ishinde bıdaıdyń alańy – 11,4 mln ga quraıdy.

̶ Memleket basshysynyń tapsyrmalaryn oryndaý maqsatynda egis alqaptaryn ártaraptandyrý jáne joǵary rentabeldi daqyldar ósirýge kóshý boıynsha jumystar jalǵasýda. Osylaısha, maıly daqyldardyń josparlanǵan alańy 3 mln tonna ga quraıdy. Bul kórsetkish ótken jylmen salystyrǵanda 122 myń tonna ga kóp. Kókónis-baqsha daqyldary men kartoptyń alańy 19 myń tonna, azyqtyq daqyldaryń alańdary 309 myń ga quraıdy dep josparlanýda, ̶ dedi A.Saparov.

Sonymen qatar, eldegi tuqym daıyndaý júıeli túrde júrgizilýde. Qazirgi tańda 2 jarym mln tonna tuqym egilgen. Osy oraıda oblystardyń jergilikti bıýdjetterinde tuqym sharýashylyǵyn damytýdy sýbsıdııalaýǵa 11,3 mlrd teńge qarastyrylǵan. Qosymsha respýblıkalyq bıýdjet qarajatynan shamamen 29,4 myń tonna tuqym jáne 838,7 myń dana elıtalyq kóshetter satyp alýǵa 2,5 mlrd teńge bólindi. Buǵan qosa, 480 myń tonnaǵa jýyq mıneraldy tyńaıtqyshtar satyp alýǵa 23,3 mlrd teńge qarastyrylǵan.

Kóktemgi dala jumystaryna aýyl sharýashylyǵy tehnıkalarynyń daıyndyǵy 98%-dy quraıdy. Bul aqparatty oblys ákimdikteri taratqan.

̶ Agroónerkásiptik keshen sýbektilerin qoldaý boıynsha is-sharalardy júrgizý úshin «Agrarlyq nesıe korporasııasy» AQ-na respýblıkalyq bıýdjetten 70 mlrd teńge kóleminde bıýdjettik kredıt bóldi. Bul ádettegiden 10 mlrd teńgege artyq. Sońǵy qaryz alýshylar úshin syıaqy mólsherlemesi jyldyq 5%-dan aspaıdy, ̶ dedi Aýyl sharýashylyǵy mınıstrliginiń birinshi vıse-mınıstri.

Qazirgi ýaqytta egis naýqany ońtústik óńirlerde bastalyp ketti. Osylaısha Jambyl oblysynda 249,5 myń ga nemese jazdyq egis alańynyń 67%-y, Túrkistan oblysynda – 167,5 myń ga (25,5%), Almaty oblysynda – 97,1 myń ga (15,6%), Qyzylorda oblysynda - 23,9 myń ga (17,6%) alqapta egý júzege asyryldy.

Sonymen qatar, Prezıdenttiń tapsyrmasymen «Qarapaıym zattar ekonomıkasy» baǵdarlamasy aıasynda kóktemgi egis jumystaryn júrgizýge qosymsha 100 mlrd teńge bólindi. Sýbsıdııalaýdy esepke ala otyryp, sońǵy syıaqy mólsherlemesi qaryz alýshylar úshin jyldyq 6% quraıdy.

Bul sharýalardy tuqym, tyńaıtqyshtar, ósimdik qorǵaý quraldarymen, qosalqy bólshektermen qamtamasyz etýge múmkindik beredi.

Birinshi vıse-mınıstrdiń aıtýynsha, karantınge jabylǵan óńirlerde barlyq sanıtarlyq-epıdemıologııalyq normalardy saqtalǵan. Sharýashylyqtar men servıstik kompanııalar qyzmetkerlerdi jeke qorǵanys quraldarymen jáne antıseptıkalyq quraldarmen qamtamasyz etilgen.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz