Qazaqstan • 24 Shilde, 2020

Sátbaevtaǵy ahýal turaqty, jaǵdaı baqylaýǵa alynǵan

211 ret kórsetildi

Budan buryn habarlaǵanymyzdaı, Qaraǵandy oblysyndaǵy Sátbaev qalasynda jergilikti polısııa bólimshesine bes jasar qyz balanyń joǵalyp ketkeni týraly aryz túsken bolatyn, – dep jazady Egemen.kz.

Dabyldan keıin ile-shala jedel-tergeý toby qurylyp, izdestirý is-sharalary uıymdastyrylǵan bolatyn. Bul iske jergilikti polısııa bóliminiń barlyq jeke quramy men eriktiler jumyldyryldy. Birneshe saǵattan keıin izdeýshiler joǵalǵan qyz balany kóp qabatty úıdiń tómenindegi páterlerdiń birinen taýyp aldy. Sol jerde kúdikti retinde 1958 jyly týǵan er adam ustaldy.

Jantúrshigerlik bul oqıǵa Sátbaev qalasynyń turǵyndaryn dúr silkindirdi. Ashý-yzaǵa boı aldyrǵan olar qylmys bolǵan úıdiń janynan jıylyp, azǵyndy óz qoldaryna berýdi talap etti. Sol jerde qoǵamdyq tártipti saqtaýǵa jáne zańsyzdyqqa jol bermeýge kelgen polısııa qyzmetkerleri bolmaǵanda, istiń nasyrǵa shabatyny anyq edi.

Sonyń ózinde, rastalmaǵan keıbir derekterge qaraǵanda, ashýly top avtokólikterge zaqym keltirip, zańǵa tompaq keletin basqa da buzaqy áreketterge barǵan. Degenmen, der kezinde uıymdastyrylǵan is-sharalardyń nátıjesinde jappaı tártip buzkshylyqqa jol berilmedi.

Sátbaevtaǵy sumdyq oqıǵanyń qoǵamdy dúr silkindirgeni sonshalyqty, tipti Ishki ister mınıstri Erlan Turǵynbaevtyń ózi tikeleı efırge shyǵyp, málimdeme jasady.

"Atalǵan fakti boıynsha sotqa deıingi tergeý bastaldy. Tergeý áreketteri júrgizilýde, qajetti saraptamalar taǵaıyndaldy. Kúdiktiniń áreketteri qylmystyq kodekstiń eki baby – "Adamdy urlaý", "Jas balalardy zorlaý" boıynsha saralanady. Bolǵan oqıǵaǵa qatysty qala turǵyndary ashý shyǵaryp, narazylyq bildirdi. Olar oqıǵa ornyna jınaldy. Keıbir tulǵalar buzaqylyq áreketter jasaýǵa, múlikti qasaqana búldirýge áreket etti. Qoǵamdyq tártipti buzǵandardy polısııa zańǵa sáıkes anyqtap, jaýapkershilikke tartady", – dedi ol.

Qazir Sátbaev qalasynda ómir óziniń qalypty arnasyna túsken. Ishki ister organdary qoǵamdyq tártipti saqtaýdy qamtamasyz etý boıynsha qajetti qosymsha sharalar qabyldaǵan.

Ázirge rastalmaǵan habarǵa qaraǵanda, zorlyq kórgen qyz bala úıinde, anasynyń janynda eken.

Qazirgi ýaqytta oblys ákimi Jeńis Qasymbek oqıǵa bolǵan Sátbaev qalasynda júr. Ondaǵy ahýal turaqty, jaǵdaı baqylaýǵa alynǵan.

Qaraǵandy oblysy

 

Sońǵy jańalyqtar

Uqsas jańalyqtar