Arna basshylyǵy atap ketkendeı, habardyń maqsaty – kishkentaı kórermenderge densaýlyqqa qatysty mańyzdy aqparatty oıyn túrinde bere otyryp, salaýatty ómir saltyn nasıhattaý. Pandemııa kezinde tutas álem koronavırýspen kúresip, densaýlyqty kútý birinshi orynǵa shyqty. Joba kishkentaı kórermenderge «densaýlyq – zor baılyq» ekenin uǵyndyrýdy maqsat etedi. Kógildir ekranǵa jańa shyqqan tyń aıdar karantın rejiminde qaýipsizdik sharalaryn saqtaýdyń mańyzy týraly túsindirip, sportpen dos bolýǵa shaqyrady.
Buǵan deıin «Maýsym aıynan bastap «Qazaqstan» telearnasynan bes kún boıy tikeleı efırde «Teledáriger» jobasy shyǵa bastaǵany da aıta ketken jón. Jalpy, bul pandemııa kórsetip bergendeı dál qazirgi kezeńde el turǵyndaryna, ásirese shalǵaı aýyl-aımaqtaǵy kórermenge qazirgi kúrdeli ahýalǵa baılanysty kúndelikti medısınalyq keńes berý óte ózekti bolyp otyr. Joǵarydaǵy jańa jobalar arqyly dárigerler tikeleı efır barysynda COVID-19 vırýsy men ózge de aýrýlardan saqtaný men aldyn alý sharalary, emdeý tásilderi týraly nusqaýlyq beredi.
Alaıda bul turǵyda balalardyń da kókeıinde túrli suraqtardyń týyndaıtyny sózsiz. Úlkender óz aldyna, balalardy indetten qorǵaý – basty másele. Ol ata-analardyń jaýapkershiligimen qatar, kishkentaılardyń ózine aýrýdyń qaýpin túsindire otyryp júzege asyrylatyny sózsiz. «Balapan» arnasy osy iske atsalysýdy kózdeıdi. «Bul joba «Qazaqstan» teleradıokorporasııasynyń osy baǵyttaǵy aqparattandyrý sharalarynyń jalǵasy», dep habarlaıdy Teleradıokorporasııanyń Baspasóz qyzmeti.
«Saý bolaıyq!» telejobasy efırge aptasyna úsh ret dúısenbi, sársenbi, juma kúnderi saǵat 12:00-de jáne 19:25-te shyǵady. Baǵdarlamanyń «Kerek derek» aıdarynda medısına salasyna qatysty termınder jeńil tilmen túsindirilse, «Shymyr bol!» aıdarynda túrli jattyǵýlar kórsetiledi. «Jatta, este saqta!» bólimi baǵdarlama qorytyndysy retinde suraq-jaýap túrinde ótedi.
Jańa jobanyń ereksheligi, baǵdarlamaǵa ekran aldynda otyrǵan kórermender de atsalysa alady. Ol úshin jattyǵý jasap, arnanyń resmı paraqshasyn belgilep, áleýmettik jelige júkteý qajet. Eń úzdik beıne jattyǵý «Shymyr bol!» aıdarynda kórsetiledi.
Joba «Balapan» arnasynyń efırinen jyl sońyna deıin jalǵaspaq.
