Tennıs • 15 Qyrkúıek, 2020

US Open márege jetti

7 ret kórsetildi

Nıý-Iorkte ótken AQSh-tyń ashyq birinshiligi óz máresine jetti. Bul jarysta Qazaqstannyń bes tennısshisi baq synady. Solardyń arasynda Iýlııa Pýtınseva eń úzdik nátıjege qol jetkizdi. Bul kúnderi álemniń 35-raketkasy atanyp otyrǵan jerlesimiz shırek fınalǵa deıin jetip, óz jankúıerlerin bir qýantyp tastady. Mıhaıl Kýkýshkın úshinshi kezeńde óner kórsetse, sońǵy kezderi aıshyqty ónerimen kózge túsip júrgen Elena Rybakına ekinshi aınalymnan asa almady. Al Aleksandr Býblık pen Zarına Dıas ózderiniń tusaýkeser kezdesýlerinde súrindi.

Tennısshiler arasynda «Úlken dý­lyǵa» sanatyna jatatyn týrnırlerdiń mártebesi asa joǵary. AQSh pen Aýstra­lııanyń ashyq birinshilikteri, Rolan Garros pen Ýım­bldonda tabysty óner kórsetý osy sport túrin serik etken ár oıynshynyń ar­many. Sonymen qatar olardyń júlde qory da óte qomaqty. Al eń bastysy, aıtýly ja­rystarda tabys­ty óner kórsetseń, álemdik reıtıngtegi jaǵdaıyń da kúrt jaq­sarady.

О́tkenge zer salsaq, «Úlken dýlyǵa» doda­larynda Qazaqstannyń sanaýly ǵana tennısshileri aýyz toltyryp aıtarlyqtaı tabystarǵa qol jetkizgenin anyq ańǵarýǵa bolady. Máselen, Iаroslava Shvedova (2010, 2012) men Iýlııa Pýtınseva (2016, 2018) eki retten Rolan Garrostyń shı­rek fınalyna shyqty. 2018 jyly Ýım­bl­donda Shvedova dál sol mejege deıin jetti. Mine, bar tabysymyz osymen ǵana shekteledi.

Kúni keshe ǵana aıaqtalǵan AQSh-tyń ashyq birinshiliginde Pýtınsevanyń joǵarydaǵy nátıjeni jaqsartýyna jaq­sy múmkindigi boldy. Nıý-Iorktegi jarys­tyń alǵashqy aınalymdarynda ame­rıkalyq Robın Montgomerı, belo­rýssııalyq Vera Lapko men Alek­sandra Sosnovıchti san soqtyrǵan jer­lesimiz tórtinshi kezeńde álemniń 15 raketkasy, horvatııalyq Petra Martıchten mereıi ústem boldy. Sóıtip Iýlııa alǵash ret US Open týrnırdiń shırek fınalyna joldama aldy.

Shırek fınalda Iýlııanyń joly ame­rıkalyq Djennıfer Bredımen qıysty. Ekeýi de 1995 jyly dúnıege kelgen. Osy mejeden súrinbeı ótken jaǵdaıda Pý­tın­sevanyń esimi «Úlken dýlyǵa» sana­tyndaǵy jarystardyń jartylaı fı­nalynda óner kórsetken tuńǵysh qazaq­standyq tennısshi retinde tarıhta qalatyn edi. Dál solaı bolatynyna biz de kámil sendik. Sebebi soǵan deıin AQSh ókilimen eki márte sheberlik baı­qasqan otandasymyz ekeýinde de basym tústi jáne de Djennıferdiń baǵyn­dyrǵan pálendeı belesteri de joq. Ká­dimgi qatardaǵy kóp oıynshylarynyń biri. Qazirgi kezde WTA reıtınginde Bre­dı Pýtınsevadan alty saty tómen tur. Biraq bul joly Iýlııaǵa tarıhta iz qaldyrý baqyty buıyrmady. Qos qurby arasyndaǵy báseke amerıkalyqtyń paıdasyna sheshildi.

О́zge oıynshylarymyz jaıynda aıtsaq, tusaýkeser kezdesýde Aleksandr Býblık ulybrıtanııalyq Kaıl Edmýnten jáne Zarına Dıas amerıkalyq Bernarda Peradan utyldy. Alǵashqy aınalymda ýkraınalyq Katarına Zavaskaıanyń tas-talqanyn shyǵarǵan Elena Rybakına kelesi oıynda AQSh-tyń ókili Shelbı Rodjersten jeńildi. Olarǵa qaraǵanda Mıhaıl Kýkýshkın biraz táýir oınady. Bas­tapqyda ol majarstandyq Atılla Balaj ben chılılik Krıstıan Garınnen basym tústi. Alaıda úshinshi kezeńde aýstralııalyq Djordan Tompsonnyń osal tusyn taba almady.

AQSh-tyń ashyq birinshi­liginiń júlde qory bıyl 53 400 000 dollardy qurady. Qazaqstannyń tennısshileri arasynda eń úzdik nátıjege qol jetkizip, shırek fınalda óner kórsetken Iýlııa Pýtınsevanyń esepshotyna 425 000 dollar aýdaryldy. Eger jerlesimiz jankeshtilik tanytyp, taǵy bir kezdesýde jeńiske jetkende 800 myń dollardy «ámııanyna» salatyn edi. Bul – jartylaı fınalǵa jetken sportshylarǵa beriletin syıaqy mólsheri. Al fınalǵa shyqqandary 1,2 mıllıondy enshilese, jeńimpaz atanǵandardyń baılyǵy 3 mıllıon dollarǵa artady. Sondaı-aq jarty jolda qalyp qoıǵandar bylaı tursyn, bastapqy básekelerde súringenderdiń ózderi AQSh-tan qur qol qaıt­paıdy. Olar mynadaı kólemde qar­jyǵa ıelik etedi: birinshi kezeń – 61 myń, ekinshi kezeń – 100 myń, úshinshi kezeń – 163 myń jáne tórtinshi kezeń – 250 myń dollar.

Sonymen, 15 kúnge sozylǵan US Open týr­nıri óz máresine jetti. Bul jarys­ta áıelder arasynda aqtyq synda belorýs­sııa­lyq Vıktorııa Azerenko men japonııalyq Naomı Osaka kezdesti. Bul báseke 1:6, 6:3, 6:3 esebimen Kúnshyǵys eli ókiliniń paıdasyna sheshildi. Bul – onyń AQSh-tyń ashyq birinshiligindegi ekinshi jeńisi. Osaka osydan eki jyl buryn dál osy týrnırde top jardy. Al asa tartysty ótken erler saıysynda aýstrııalyq Domınık Tım germanııalyq Aleksandr Zverevten 2:6, 4:6, 6:4, 6:3, 7:6 esebimen aıla­syn asyryp, óziniń sporttyq karerasynda tuńǵysh ret «Úlken dýlyǵa» dodasynyń jeńimpazy atandy.

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar