Aımaqtar • 16 Qazan, 2020

Gúlshara Ábdiqalyqova qutqarýshylardy kásibı merekesimen quttyqtady

45 ret kórsetildi

Búgin oblys ákimi Gúlshara Ábdiqalyqova Azamattyq qorǵaý organdarynyń qurylǵanyna 25 jyl tolýyna oraı jáne 19 qazan "Qutqarýshylardyń kásibı kúni" merekesi qarsańynda aımaqtaǵy qutqarýshylar men sala ardagerlerin quttyqtady, dep habarlaıdy Egemen.kz.

О́ńir basshysy aldymen №1 mamandandyrylǵan órt sóndirý bólimine kelip, zamanaýı qutqarý jabdyqtary men tehnıkalardyń jaǵdaıymen tanysty. Odan soń saltanatty sharaǵa qatysyp, halyqtyń tynys-tirshiligi men aýmaqtyń qaýipsizdigin qamtamasyz etýde qutqarýshy mamandardyń mańyzy erekshe ekendigin atap ótti.

"Búgingi kúni azamattardy tabıǵı qubylystar men tehnogendik sıpattaǵy apattardan qorǵaý, zilzalalardyń qaýip-qaterin azaıtý máselesi memlekettiń basty nazarynda. Qutqarýshy mamandyǵynyń eń basty mindeti - adam ómirin qutqarý, bul joǵary jáne jaýapty mıssııa. Apat aıtyp kelmeıtini ras. Tosynnan bolǵan apat kezinde azamattarǵa birinshi bolyp kómekke keletin tótenshe jaǵdaı qyzmetiniń qutqarýshylary. Bul is kez kelgenniń qolynan kele bermeýi múmkin. О́ıtkeni, oǵan myqty júrek, mashyq jáne tájirıbe kerek. Qıyn da kúrdeli qyzmetterińizge tabys, denderińizge saýlyq, shańyraqtaryńyzǵa qut-bereke, amandyq tileımin! Sizderdi kásibı merekelerińizben jáne Azamattyq qorǵaý organdarynyń mereıli kúnimen quttyqtaımyn!" - dedi oblys ákimi G.Ábdiqalyqova.

Merekelik jıynda Azamattyq qorǵaý organdarynyń ardagerleri Qorǵanbek Qaırýllaev, Murat Musaev, Sultan Shyntaev, "Volontery Kyzylordy" qoǵamdyq qorynyń jetekshisi Olga Chebakova, Azamattyq qorǵaý aǵa serjanty, Qazaly aýdany № 9 órt sóndirý bóliminiń aǵa órt sóndirýshisi Ońtalap Jolmahanov, Azamattyq qorǵaý starshınasy, Syrdarııa aýdany № 12 órt sóndirý bóliminiń órt sóndirý avtokólikteriniń júrgizýshi-qyzmetkeri Maqsut Myrzaǵalıev jáne Azamattyq qorǵaý praporshıgi, Jalaǵash aýdany № 11 órt sóndirý bóliminiń bólimshe komandıri Shyńǵys Taıshaev oblys ákiminiń "Alǵys hatymen" marapattaldy. Sondaı-aq aımaq basshysy jergilikti bıýdjet esebinen alynǵan 2 órt sóndirý avtokóligin №1 jáne №7 órt sóndirý bólimderine tabys etti.

Sharada sóz alǵan Azamattyq qorǵaý organdarynyń ardageri Qorǵanbek Qaırýllaev pen Tótenshe jaǵdaılar departamentiniń qyzmetkeri Aqmaral Sermaǵambetova memlekettiń qoldaýy arqasynda qutqarý salasynyń áleýeti edáýir óskendigin aıtty. Sonyń arqasynda óńirde oryn alǵan oqys oqıǵalar men tótenshe jaǵdaılardy der kezinde joıý múmkindigi artty deıdi. Qutqarýshylardy kásibı merekesimen quttyqtap, eńbekti elegen aımaq basshysyna alǵysyn jetkizdi.

Sońǵy úsh jyldyń ózinde óńirdiń órtke qarsy qyzmet bólimsheleri, jedel-qutqarý jasaǵy men apattar medısınasy ortalyǵynyń qutqarýshylary 2 myńnan asa apattyq-qutqarý jumystaryn júrgizip, 200-ge jýyq adamdy aman alyp qaldy. Sondaı-aq myńnan asa órt sóndirilgen. Aıta ketý kerek, memleket basshysy Qasym-Jomart Toqaevtyń Jarlyǵymen elimizdegi tótenshe jaǵdaılar men oqys oqıǵalardyń aldyn alý maqsatynda aǵymdaǵy jyldyń 9 qyrkúıeginde Tótenshe jaǵdaılar mınıstrligi qaıta quryldy.

Sońǵy jańalyqtar

Tergeýshilerdiń ustazy ulyqtaldy

Aımaqtar • Búgin, 19:35

Reseı ınvestorlary Atyraýǵa bet burdy

Aımaqtar • Búgin, 16:56

Erteń Úkimet otyrysy ótedi

Úkimet • Búgin, 15:17

Qýatty qurylymnyń shýaqty merekesi

Qazaqstan • Búgin, 14:15

Naýryz aıynda aýa raıy qandaı bolady?

Aýa raıy • Búgin, 13:30

Uqsas jańalyqtar