Saıasat • 18 Qarasha, 2020

Ákimder bar ár alýan...

41 ret kórsetildi

Memleket basshysy Qasym-Jomart Toqaev bıylǵy Qazaqstan halqyna Joldaýynda «Ákimderdi halyq ózi saılaıdy, bul úshin Úkimet jergilikti ózin-ózi basqarýdyń jańa tujyrymdamasyn ázirleý kerek» degen bolatyn. Bul – ákimderge júktelgen jaýapkershilik. Osy oraıda «Bolashaqta halyq saılaıtyn ákim qandaı bolý kerek?» degen suraq mazalaıdy.

 

Jýyrda ǵana Maı aýdany Aqjar aýylynyń ákimi Serik Qu­saıynov qyzmetinen bosatyldy. Mem­le­kettik qyzmet isteri agenttiginiń oblys­taǵy Ádep jónindegi keńesi qyz­met­tik kólikti mas kúıinde basqarǵan aýyl ákiminiń qyzmetine tolyq sáıkes emestigi týraly sheshimdi usynypty.

Oqıǵa bylaı bolǵan: 10 qazan, senbi kúni saǵat 19:45-te Shyǵys Qazaqstan oblysy Kýrchatov qalasynda jol-patrýl­dik polısııa qyzmetkerleri Maı aýdany Aqjar aýyly ákiminiń appa­ratyna tıesili memlekettik tirkeý nómiri S 176 DM Lada 21214 markaly avtokóligin toqtat­qan. Polısııa Qusaıynovtyń avto­kólikti ortasha dárejede mas kúıin­de basqarǵanyn anyqtaıdy. Son­daı-aq júr­gizýshiniń avtomobıldi bas­qarýǵa tıe­sili qujattary bolmaǵan. Sheneý­nik­tiń qan quramyndaǵy alkogol onyń orta dárejede mas bolǵanyn kórsetken.

Oblystyq sybaılas jemqorlyq­qa qarsy kúres departamentiniń habar­laýynsha, Baıanaýyl aýdanynyń buryn­ǵy ákimi Orazgeldi Qaıyrgel­dınov­ke qatys­ty qylmystyq is qozǵalyp, qazir tergeý júrgizilýde. Burynǵy ákim «Paıdalaný talaptaryna saı kel­meı­tin nysandy oblystyq bıýdjet qarjysy esebinen zańsyz satyp aldy» degen kúdikke ilindi.

Burynǵy oblys ákimi Bolat Ba­qaýov­tyń Baıanaýylda qysqy týrızm aımaǵyn jasamaqshy bolǵany belgili. Biraq «Myrzashoqy» taý-shańǵy kesheni jobasynyń júzege asyrylýy bastalǵan kezden-aq kúmándi bolǵan-dy. Shaǵyn avıasııaǵa arnalǵan aerodrom salyndy. Baıanaýyl aýdanynyń burynǵy ákimi Orazkeldi Qaıyrgeldınovke «paıdalaný talaptaryna saı kelmeıtin nysandy oblystyq bıýdjet qarjysy esebinen zańsyz satyp aldy degen» kúdik osy. Aerodrom qurylysy arnaıy sertıfıkattaýdan da ótpegen kórinedi.

B.Baqaýov basqarǵan 2016-2019 jyldar aralyǵynda oblys ákimdiginiń resmı aqparaty «shaǵyn aerodrom Astana-Baıanaýyl, Qaraǵandy-Baıan­aýyl jáne Pavlodar-Baıanaýyl baǵyt­tarynan shaǵyn ushaqtardy qabyldap, jumysyn bastaıdy. Astana-Baıanaýyl, Qaraǵandy-Baıanaýyl baǵyty respýb­lıkalyq bıýdjetten, al ishki reıster oblys bıýdjetinen sýbsıdııalanady» dep málimdegen bolatyn. Biraq ushqan ushaq kórinbedi.

Al endi shańǵy kesheni týraly áńgime áýeni bólek. Tipti, shańǵy keshe­­­nine deıin sý jetkizip (aýyldary áli sýsyz otyr), osy sýdan jasan­dy qar jasaıtyn boldy. Arnaıy qural-jabdyqtar aldyrtyp, jasandy qar jasaý, qar toqtatý tásili de jasala­dy. О́ıtkeni, tabıǵaty qupııaly Myr­zashoqynyń basyna qar túspeıdi.

«Qoldan qar jasaý úshin Qarajar aýylynan keshenge deıingi 2 shaqyrym­daı aralyqqa sý qubyryn tartý kerek. Bul úshin aýylǵa sý tartý maqsatynda respýblıkalyq bıýdjetten 268 mln teńge bólý qarastyrylmaq» delindi resmı aqparatta.

«Myrzashoqy» keshenine qajetti jabdyqtar jetkizildi. Qurastyrylyp jatyr. Qardy tegisteıtin qurylǵylar da bar. Qarajat jetkilikti bólindi. Infraqurylym jasalýda. Búginde bazaǵa elektr jelisi tartyldy. Shaǵyn konteınerler ornatylýda...» degen málimetter buqaralyq aqparat qural­darynda jarııalandy.

Baıanaýyl aýdanynyń ákimi Qanat Kárimovtiń aıtýynsha, «Myrzashoqy» taý-shańǵy kesheni «Qarajar-Myrza­shoqy» JShS senimgerlik basqarýy­na be­rilgen. Epıdemııalyq jaǵdaı qalyp­ty bolsa, bıyl baza bas­shy­lyǵy jumys isteýge nıetti. Týrıs­ter úshin avtostansadan taý-shańǵy bazasyna jetkizý jumystaryn uıymdas­tyrylady.

Budan basqa, ákim Baıanaýyl aerodromynyń aldaǵy taǵdyryn sot sheshetinin atap ótti.

– Qazir aýdan ákimdigi keshenniń aýmaǵy men múlkin kúzetetin kúzetshi­lerdi qamtamasyz etýde. Sebebi keshen ákim­diktiń balansynda. Tergeý shara­lary jalǵasýda, keshenniń barlyq qujaty­ alynǵan, – deıdi Qanat Kárimov.

Endi «Myrzashoqy» keshenine ketken qyrýar qarajattyń esebin kimnen, qalaı óndirip almaq? Bar másele osynda.

«Kótere almaıtyn shoqpardy belińe baılama» deıdi qazaq. Aýyldaǵylarǵa «jany ashıtyn» ákimderdiń arasynda orman sharýashylyǵynyń qyzmetkeri bolǵan Ajdar Júsipovti aıtýǵa bolar. 2016-2018 jyldary oblys ortalyǵyna qarasty Pavlodar aýylynda, aýdan ortalyǵy Tereńkól aýylynyń ákimi bolǵan A.Júsipov osy jerdiń tur­ǵyn­darynyń esinde «syılyqqa átesh, eshki syılaǵan ákim» retinde qaldy.

Ákim Pavlodar aýylynda «Úzdik aýla» baıqaýyn ótkizip, jeńimpazdarǵa átesh, laq, qozy, toraı syıǵa tartqan. Mas­lenısa merekesinde aspazdarǵa úlken tort ázirletip, aýyldyń búkil tur­ǵyny men qonaqtaryna tegin dám tatyrǵan.

Aýyl ákiminiń ótinishimen, kondıter Olga Gýlıaeva týǵan aýyly beı­nelengen salmaǵy 70 kılo tort pisi­redi. Baǵasy – 60 myń teńge. Bar­lyq shyǵyndy aýyl ákimdigi tapqan demeýshiler jabady delindi.

Ajdar Saǵyntaıuly Tereńkól aýylynda ákim bolyp júrgende de oqýshylar arasynda baıqaý ótkizilip, belsendi oqyrman, №2 mekteptiń 5-synyp oqýshysy Oleg Aıtbaevqa syılyq retinde eshkini jetektetip jiberdi.

Zeınetkerler men jastar arasyn­daǵy belsendi oqyrmandarǵa bir qorjyn azyq-túlik tartý etipti. Aýyl­darda osyndaı qyzyqty baıqaýlar ótki­zip, turǵyndarǵa «erekshe qamqor­lyq» kórsetkisi kelgen ákim Tereńkól aýylynda bar-joǵy 20 kún jumys istep, qyzmetimen jyldam qoshtasty.

Ajdar Júsipov ákimdik qyzmetten ketken soń, mamandyǵyna saı qaıtadan oblystyq Orman jáne janýarlar dúnıesin qorǵaý mekemesiniń basshysy qyzmetin atqarýda.

Árıne, «Ákimderdi halyq ózi saılaıtyn bolady» degen Memleket basshysynyń sózi aýyl halqyn qýantyp otyr. Iаǵnı, halyqqa jaqpaıtyn minez-qulyq kórsetetin, san túrli shoý jasaı­tyn, ishimdikke úıir, aýylǵa, aýdanǵa berilgen bıýdjet qarajatyn jymqyratyn ury-qary ákimderdiń jolyn kesý qajet.

Memleket basshysynyń ákimderge qoıyp otyrǵan basty talaby – aýyl­dyń áleýmettik-ekonomıkalyq jaǵdaıyn jaqsartý. Qazir aýyldyq aýmaqtardyń bıýdjeti ózderine berildi. Tek qarjyny maqsatqa saı jumsap, jumysty júıeli túrde uıymdastyryp, qazirgi ózgermeli naryqqa beıimdelýi tıis. Jańasha kózqaras qalyptasý qajet. Aýyl ákim­deri árbir turǵynnyń sıfrly saýatty bolýy jolynda jumys isteýge tıis.

Aýylda maldy asyldandyrý, ha­lyqty sıfrlyq turǵyda saýattan­dyrý, granttar men nesıeler alǵy­zyp, kásipkerlik nysandar ashý, aýyldy kógaldandyrý, kóp balaly otbasy­lar­dyń jaǵdaıyn jasap otyrsa, ońtús­tik­ten soltústikke qaraı keletin ishki kóshi-qon sharýasynda belsendi bolsa, halyq ta ákimdi qoldaıtyny anyq.

 

Pavlodar oblysy

 

Sońǵy jańalyqtar

Uqsas jańalyqtar