Oblysta jumys istep turǵan 325 dári­hanaǵa departament tarapynan ýaq­tyly monıtorıg jumystary júrgi­zilip turady. Tekseris barysynda osy jyldyń mamyr-tamyz aılary aralyǵynda kóter­me saýda qoımalaryna bakterııaǵa qarsy preparattardyń 1 761 217 qoraby kelip, onyń 1 021 545-i satylǵany anyqtaldy.

Spıkerdiń aıtýynsha, satylǵan dáriniń barlyǵy – dárigerdiń nusqaýymen ǵana beriletin preparattar. Bıyl jazda aılarda pandemııa órship, kóbine áleýmettik jelilerde, ǵalamtorda tara­ǵan túrli ádistermen emdelip júrdi. Bul – úlken qatelik. Osy oraıda jýyrda ǵana oblystyq ákimdikte dárihanalarda dárigerdiń nusqaýynsyz dárilik preparattardy satpaý týraly jıyn ótken bolatyn.

– Budan bylaı dárihanalarda maman­dardyń reseptisiz eshqandaı preparat berilmeıdi. Basqasha bolǵan jaǵ­daıda mindetti túrde departamentke habar­lasý­laryńyz qajet, – dedi R.Qubataev.

Densaýlyq saqtaý mınıstriniń 2017 jylǵy 29 tamyzdaǵy №666 buıryǵyna sáıkes – 138 belgili bir aýrýlary (jaı-kúıi) bar azamattardyń jekelegen sanat­tarynyń tegin medısınalyq kómek­tiń kepil­dik berilgen kólemi sheń­berinde jáne mindetti áleýmettik medı­sınalyq saq­tandyrý júıesinde dárilik zattar men me­dısınalyq buıymdar qamtamasyz etilýde. Onyń ishinde COVID-19 ınfeksııasyn emdeý úshin ambýlatorııalyq jaǵ­daıda tegin beriletin dárilik zattar bar.

– Vırýs eshqashan antıbıotıkpen emdelmeıdi. Qaıta ózińizdiń aǵzańyzdyń vırýsqa qarsy turatyn kúshin tómendetip, aýyr jaǵdaıǵa shaldyǵýdyń qaýpi óte joǵary bolmaq, – dedi R.Qubataev.

Densaýlyq saqtaý mınıstrliginiń tapsyr­masyna sáıkes Mańǵystaý obly­synyń kóterme qoımalary men dári­hanalarynda 41 ataý boıynsha dárilik zattardyń bolýyn qadaǵalaıtyn monıtorıng júrgiziledi. Osy oraıda mamandar medısına qyzmetkeriniń arnaıy zańnamada belgilengen, dárilik zattardy ótkizý qaǵıdalaryn jáne resepter jazyp berý jónindegi talaptardy buzǵan jaǵdaıda ákimshilik jaýapkershilikter qarastyrylǵanyn eskertedi.

Jalpy, departamentke tirkelmegen dárilik zattardy satý, sondaı-aq bólshek saýda baǵalarynan asyp ketý faktileri boıynsha 179 ótinish túsken bolsa, onyń ishinde áleýmettik jelilerden kelip túsken 95 shaǵym Mańǵystaý oblysy­nyń polısııa departamentine jedel shara­lar qabyldaý úshin jiberildi. Al mem­lekettik organdardan 71 shaǵym túsip, atalǵan materıaldar boıynsha 33 hat­ta­ma toltyrylǵan jáne eki dárihana sottyń sheshimimen 15-30 kúnge qyzmetin ýaqytsha toqtatqan.

17 qarashadan bastap departament ma­man­darynyń jáne Mańǵystaý obly­sy ákimdiginiń ekonomıkalyq jáne bıýd­jettik bóliminiń basqarma mamandarymen birge turaqtandyrý qoryna bólingen 300 mln tengege satyp alynǵan dárilik zattardyń tizimge sáıkestigi jáne qaldyǵyna monıtorıng júrgizilýde. Mańǵystaý oblysynda KVI ınfeksııasyn jáne saldaryn emdeý maqsatynda dárilik zattardyń turaqtandyrý qory jasaqtalyp jatyr. «Kaspıı» ÁKK men «Ada-Farm Aktaý» JShS, «FAIZ-2016» JShS jáne jeke kásipker J.Iskakova sııaqty Mańǵystaý oblysynyń kásipker­leri arasynda 300 mln teńgege kelisim jasaldy. Búginde «ADA-Farm Aqtaý» JShS 128 mln teńgege dári-dármekter satyp aldy. «FAIZ-2016» seriktestigi 100 mln teń­gege, jeke kásipker J.Iskakova 50 mln teń­gege antıbıotıkter, dárýmender, vı­rýs­qa qarsy, qyzý túsiretin, qan su­ıyl­tatyn, gormondyq dárilik zattar aldy.

R.Qubataevtyń aıtýynsha, KVI men onyń saldaryn emdeýge arnalǵan dári-dármektermen halyqty qamtamasyz etý úshin biryńǵaı dıstrıbıýtor «SK –Farmasııaǵa» 30 mln teńgege qan suıyl­tatyn, gormondyq dári-dármekter, antıbıotıkter, vırýsqa qarsy preparattar satyp alyndy jáne qosymsha 200 mln teńgege suranys berildi. Sonymen qatar dári tapshylyǵyn boldyrmaý maqsatynda kásipkerler dárilik zattardy bir rettik engizýge lısenzııa alyp, óz qarajatyna da ákelýde. Departament dárilik zattardyń qaldyqtaryn, shekti baǵadan aspaýyn, qorǵanys quraldaryn kóterme jáne bólshek saýda jelisinde kúndelikti telefon arqyly baqylaýda.

Qazir Mańǵystaý oblysynda kóterme saýdada 659 myń medısınalyq betperde, bólshek saýdada 469 myń medısınalyq betperde, bólshek jáne kóterme jelilerde 35 243 jup medısınalyq qolǵap bar. Dárilik zattardyń qajettiligi komıssııa otyrysynda apta saıyn talqylanady. Dárilik zattar alýǵa qosymsha 150 mln teńge qarjy bólinbek.

– Qazir – kúzdiń kezi, tumaýdyń kúshe­ıetin ýaqyty. Osy kezde jaı tumaýǵa ma, álde koronavırýsqa shaldyqtyń ba, bil­meı qalasyń. Sol sebepti eger sal­qyn tıse, birden emhanaǵa habarla­syp, aldyn alǵan jaqsy. О́zińizdiń, otba­sy­ńyzdyń, jaqyndaryńyzdyń densaý­lyǵyna muqııat bolyńyz. Mindetti túrde oqshaýlanyp, jıi-jıi bólmeniń aýasyn tazartyp turyńyz, –dedi R. Qubataev.

Sondaı-aq ol «Dari.kz» mobıldik qosymsha iske qosýly turǵanyn, atalǵan qosymshada memlekettik tirkeýden ótken 7 myń dárilik preparattardyń tizimi men baǵasy da kórsetilgenin atap ótti.

Baspasóz konferensııasynda «PHARMA PLUS AKTAU» JShS dırektory Gúlnar Mýsına da qatysty. Onyń málimetinshe, bıyl jazda dáriler de, qorǵanysh zattary da jetkilikti boldy. Alaıda turǵyndar bir kelgende dárilerdi toltyryp satyp alyp júrdi. Osy sebepti kóptegen preparattyń tapshylyǵy baı­qala bastady.

– Qazir dárihanalarda dári jetki­likti. Úıimizge toltyryp alamyz dep álek­tenbeseńizder bolady. О́ıt­keni jer­gi­likti fırmalarymyzda da, qoıma­lary­myzda da dáriler tolyq. Eshqandaı qorqynysh, ýaıym bolmasyn, – dedi G.Mýsına.

Sonymen Mańǵystaýda dári-dármek pen qorǵanysh quraldary qory jetkilikti delinedi. Biraq indettiń qarqyny qalaı bolaryn eshkim bilmeıdi.

Mańǵystaý oblysy