Aımaqtar • 24 Qarasha, 2020

Eraly Toǵjanov Qordaı aýdanynyń turǵyndarymen kezdesti

29 ret kórsetildi

Qazaqstan Respýblıkasy Premer-Mınıstriniń orynbasary Eraly Toǵjanov bastaǵan úkimettik delegasııa jumys saparymen Jambyl oblysynda bolyp, Qordaı aýdany, Sortóbe aýylynda aýdan turǵyndarymen kezdesti. Kezdesýge aýdannyń Qarakemer, Masanchı, Sortóbe jáne Aýqatty aýyldarynyń qarııalary men zııaly qaýym ókilderi qatysty, dep habarlaıdy Egemen.kz.

Jıynda Úkimet basshysynyń oryn­basary Eraly Toǵjanov pen Jambyl obly­synyń ákimi Berdibek Sapar­baev jer­gilikti turǵyndarmen birge ózekti máse­lelerdi jáne memlekettik baǵdarlama­lardyń iske asyrylý barysyn talqylady.

– Bıyl kóptegen áleýmettik máseleler sheshildi. Aýyldar gazben, sýmen, ınternetpen qamtamasyz etilýde. Joldar jóndelip, áleýmettik nysandar salynýda. Beıbitshilik pen kelisim bolmasa, munyń bárine qol jetkizý múmkin emestigin turǵyndar jaqsy túsinedi. Aǵa býyn óz tarapynan ultaralyq kelisim máselelerine aıryqsha kóńil bólinip, jastardy halyqtyq dástúrler men syılastyq negi­zinde tárbıeleýdemiz, – dedi Qordaı aýdan­dyq «Qoǵamdyq kelisim» qoǵamdyq keńesiniń tóraǵasy Ábdibek Seıilhanov.

 – Tuńǵysh Prezıdent – Elbasy N.Nazar­baevtyń bastamasymen qurylǵan Qazaqstan halqy Assambleıasy elimizde turatyn kóptegen etnostar arasyndaǵy beıbit jáne úılesimdi qarym-qatynasty nyǵaıtýǵa kómektesti. Osy biregeı model­siz eldiń turaqty damýy múmkin emes edi. О́s­keleń urpaqqa osy qundylyqtardy saqtaý jáne jetkizý – árbir adamnyń min­deti. «Memleket basshysynyń tapsyrmasy boıynsha Qordaı aýdanyn damytýǵa bıyl 35 mlrd teńge bólindi. Munyń bári halyqtyń ıgiligi úshin, ómir súrý sapasy men deńgeıin arttyrý maqsatynda jasalýda. Bizdiń arman-tilegimiz ortaq, bárimiz beıbitshilikte ómir súrýdi qalaımyz, –dedi E.Toǵjanov.

Sortóbe aýylyndaǵy kezdesýde Mem­leket basshysy Qasym-Jomart Toqaev­tyń tapsyrmasy boıynsha aýdanda júzege asyrylǵan «Beıbitshilik pen kelisim» jo­basynyń nátıjeleri saralandy. Beıbit­shilik pen kelisimdi saqtaý men nyǵaıtýǵa baǵyttalǵan joba aıasynda qoǵamdyq-saıası ahýalǵa monıtorıng júrgizilip, jergi­likti turǵyndardy mazalaıtyn máse­leler anyqtalyp, sheshimin tapqan. Jumys toptary myńnan astam kez­desý ótkizip, onda 30 myńǵa jýyq tur­ǵyn qamtyl­ǵan. О́ńirge sapary barysynda Eraly Toǵ­janov Masanchı aýylyn­daǵy aǵymda­ǵy jyldyń aqpan aıynda oryn alǵan tár­tipsizdikterden keıin qaı­ta qalpyna kelti­rilgen birqatar kommersııa­lyq nysandar men turǵyn úılerdi aralady. Aýyl tur­ǵyndary kórsetken qoldaýy úshin Mem­leket basshysyna alǵystaryn jetkizdi.

Delegasııa Qordaı aýdanynyń Gvar­deıskıı aýylyndaǵy Bıologııalyq qaýip­sizdik problemalaryn ǵylymı-zertteý ınstıtýtynyń janyndaǵy otandyq ımmýndyq preparattar shyǵaratyn zaýyt­tyń qurylysyn baryp kórdi. Atalǵan zaýyt Memleket basshysy Qasym-Jomart Toqaevtyń tapsyrmasyna sáıkes salynýda. Vıse-premerge zaýyttyń qurylys-mon­tajdaý jumystarynyń bıyl aıaqta­latyndyǵy, qazir barlyq ınjenerlik kommýnıkasııalar júrgizilgeni baıandaldy. Zaýyt óz jumysyn kelesi jyldyń birin­shi toqsanynda bastaıdy dep jos­parlanýda. Munda álemdik standarttarǵa sáıkes ımmýnobıologııalyq preparattar, onyń ishinde koronavırýs ınfeksııasyna, tumaýǵa, týberkýlezge, brýsellezge, nodýlıarlyq dermatıtke jáne basqa da ınfek­sııalyq aýrýlarǵa qarsy vaksınalar shyǵarylatyn bolady. Jyl saıyn bıo­preparattardyń 30-60 mıllıon dozasyn óndirý josparlanǵan. Úkimet basshy­synyń orynbasary ınstıtýt qyzmet­ker­lerimen kezdesip, olarmen áńgimelesti.

  Jambyl oblysynyń ákimi Berdibek Saparbaev atalǵan iri zaýyttyń salynýy aımaq ekonomıkasynyń damýyna jańa serpin beretinin atap ótti. Budan soń E.Toǵjanov ınstıtýt  qyzmetkerlerine ar­nalǵan 60 páterlik úıdiń qurylys bary­symen tanysty. Nysan kelesi jyldyń basynda paıdalanýǵa beriledi. Taǵy eki turǵyn úıdiń qurylysy josparlanýda. Instıtýt jumysymen tanysqan soń delegasııa Qordaı aýdanynyń damýy, sondaı-aq ǵylymı-zertteý ınstı­tý­ty­nyń ózekti máselelerin sheshý jónin­de keńes ótkizdi.

 Sonymen qatar, E.Toǵjanov oblystyq jedel járdem stansasynyń bas dárigeri Venera Balqybekovaǵa jedel járdem kólikteriniń kiltin tabys etti.

– Jambyl oblysyna jumys saparymdy Qordaı aýdanynan bastadym. Prezıdent Qasym-Jomart Toqaevtyń tapsyrmasyna sáıkes, beıbitshilik jáne kelisim jobasy aıasyndaǵy kún tártibinde turǵan máseleler onda júz paıyz oryndalǵanyn kórdim. Jergilikti halyqpen, árbir etnos ókilderimen kezdesip, pikirlestim. Koronavırýstyń áserinen medısına salasynda kóptegen qıyndyqtar týyndaǵanyn bilesizder. Ol kezeńdi birliktiń arqasynda búkil el bolyp birge eńserdik. Ondaı qıyndyq endi bolmasyn dep tileıik. Mine, búgin óńirdiń densaýlyq salasyn ilgeriletetindeı materıal­dyq-tehnıkalyq bazasy jaraqtandyrylyp otyr. Álemdi jaılaǵan osy indettiń aldyn alý sharalaryna baıla­nysty naqty tapsyrmalar da berildi. Sonyń birazy júzege asyrylǵan. Dári-dármektiń eki aılyq qory tolyqtaı qamtamasyz etilgen. Sonymen qatar árbir oblysta arnaıy turaqtylyq qorlary qurylǵan bolatyn. Jambyl oblysy da bul isti standartqa saı oryndap otyr, – dedi vıse-premer.

Úkimettik delegasııa aımaqtyń koronavırýs indetine yqtımal jańa tolqynyna daıyndyǵyn tekserip, Taraz qalalyq 200 tósektik kópbeıindi aýrýhanasynyń ınfeksııalyq bóligine bardy. Bul rette E.Toǵjanov medısına qyzmetkerlerine naýqasqa ókpeni jasandy jeldetý qajet bolatyn asqynýlardyń aldyn alý jáne boldyrmaý qajettigin tapsyrdy.

О́ńirge sapary barysynda E.Toǵjanov Jambyl aýdanyna da bardy.Ol óndiris jelisin, dári-dármekter men medısınalyq buıymdardyń qoımasyn aralap, serik­testiktiń jumysyn joǵary baǵalady. Sonymen qatar dárigerlerge eren eńbegi úshin alǵys aıtyp, Memleket basshysy koronavırýsqa qarsy is-qımyl boıynsha Úkimet pen dárigerlerdiń aldyna naqty mindetter qoıǵanyn atap ótti.

– Bizdiń mindetimiz – osy tapsyrma­lardyń barlyǵyn oryndaý. Bul úshin dári-dármekterdiń eki aılyq qory qa­lyp­tasty, densaýlyq saqtaý mekemeleriniń materıaldyq-tehnıkalyq bazasy jańar­tylýda. Jambyl oblysynyń shalǵaı eldi mekenderin sapaly medısınalyq kómekpen qamtamasyz etý úshin segiz mobıldi keshen alyndy. Jedel járdem stansasynyń avtoparki jańartylýda. Munyń bári kómekti der kezinde kórsetýge múmkindik beredi, – vıse-premer. Budan keıin oblystyq ákimdikte beıne-baılanys arqyly úkimettik delegasııanyń óńirge jumys saparynyń qorytyndysy saralandy.

 

Jambyl oblysy

 

Sońǵy jańalyqtar

Semeıge Saqtaǵanov ákim boldy

Taǵaıyndaý • Keshe

Birneshe oblysta jol jabyldy

Qazaqstan • Keshe

Uqsas jańalyqtar