«Qazaqstan Respýblıkasynyń halyqaralyq sharttary týraly» zańnamalyq túzetýler maquldandy

Parlament • 20 Qańtar, 2021

«Qazaqstan Respýblıkasynyń halyqaralyq sharttary týraly» zańnamalyq túzetýler maquldandy

Búgin Májilis Spıkeri Nurlan Nyǵmatýlınniń tóraǵalyǵymen ótken jalpy otyrysta depýtattardyń aldaǵy zań shyǵarý jumysynyń basymdyqtary týraly aıtylyp, birqatar zań jobalary maquldandy.

Aqmaral AǴZAMQYZY

Jıynda Májilis Tóraǵasy kún tártibine kirispes buryn VII shaqyrylymdaǵy I sessııanyń ashylýynda Memleket Basshysy Qasym-Jomart Kemeluly Toqaevtyń depýtattyq korpýsqa júktegen naqty mindetteri týraly aıtty. Nurlan Nyǵmatýlın atap ótkendeı, VII shaqyrylym Qazaqstan táýelsizdigine 30 jyl, Parlamenttiń qurylǵanyna 25 jyl tolatyn erekshe kezeńde óz jumysyn bastap otyr.

Osyǵan baılanysty, Memleket Basshysy sessııanyń ashylýynda búgingi jetken jetistikterimizdi saqtap, odan ári damytý jolyndaǵy jańa maqsattar týraly aıtty. Onyń ishinde, áleýmettik-ekonomıkalyq, quqyqtyq, saıası baǵyttarǵa basa nazar aýdarylatynyn jetkizgen Májilis Tóraǵasy:

-Olardyń barlyǵyn tıisti zańdarmen qamtamasyz etetin ol, árıne, bizdiń Parlament. Sol úshin Memleket Basshysy Qasym-Jomart Kemeluly Toqaev sessııanyń ashylýynda depýtattardan sapaly zańdar talap etetinin erekshe atap ótti. Ol zańdar, eń aldymen, halyqtyń ómir sapasyn, bilim, densaýlyq salalaryn jaqsartýǵa, áleýmettik qamtamasyz etýge, shaǵyn jáne orta bıznesti qoldaýǵa yqpal etýge tıis. Sondyqtan, bizdiń basty maqsatymyz – josparǵa sáıkes, óz ýaqytynda, halyqqa qajetti, paıdaly zańdar qabyldaý, - dedi Nurlan Nyǵmatýlın.

Otyrys barasynda Palatanyń komıtetteri birneshe jańa jobalaryn jumysqa aldy. Olar: «О́nerkásiptik saıasat týraly», «Kvazımemlekettik sektordyń jekelegen sýbektileriniń satyp alýy týraly» jáne «О́simdikter dúnıesi týraly» zańdar jáne olarǵa ilespe túzetýlerimen, sondaı-aq, «Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly», «Qazaqstan Respýblıkasynyń keıbir zańnamalyq aktilerine áskerı qyzmet jáne arnaýly memlekettik organdar qyzmetkerleri men áskerı qyzmetshilerdiń turǵyn úı qatynastary máseleleri boıynsha ózgerister men tolyqtyrýlar engizý týraly» jáne «Kaspıı teńiziniń teńiz ortasyn qorǵaý jónindegi negizdemelik konvensııaǵa qorshaǵan ortaǵa transshekaralyq turǵydan jasalatyn áserdi baǵalaý jónindegi hattamany ratıfıkasııalaý týraly» zań jobalary bar.

Sonymen qatar, otyrys barysynda depýtattar «Qazaqstan Respýblıkasynyń halyqaralyq sharttary týraly» Qazaqstan Respýblıkasynyń Zańyna ózgerister men tolyqtyrý engizý týraly» zań jobasyn maquldady. Zań jobasynyń negizgi normalary basqa memleketter men halyqaralyq uıymdar halyqaralyq sharttardy jasaý kezinde alǵan óz mindettemelerin buzǵan jaǵdaıda, Qazaqstan Respýblıkasynyń osy halyqaralyq sharttardy oryndaýdy toqtata turý nemese qoldanysyn toqtatý túrinde qarymta sharalar (qarsy sharalar) qabyldaýyna, ratıfıkasııalanǵan halyqaralyq sharttardyń Qazaqstan Respýblıkasynyń zańdarynan basymdyǵyn belgileýge jáne halyqaralyq sharttardy oryndaýdy toqtata turý nemese qoldanysyn toqtatý týraly aqparatty Qazaqstan Respýblıkasy Syrtqy ister mınıstrliginiń saıtynda jarııalaýǵa baǵyttalǵan.

Zań jobasymen jumys isteý barysynda depýtattar kúshine engen, sondaı-aq ýaqytsha qoldanylatyn halyqaralyq sharttar týraly aqparatty Syrtqy ister mınıstrliginiń ınternet-resýrsynda jarııalaý boıynsha da túzetýler engizdi. Jalpy otyrysta depýtattar Qazaqstan men Koreıa arasyndaǵy sottalǵan adamdardy berý týraly ratıfıkasııalyq zań jobasyn maquldady. Otyrys sońynda Májilis depýtattary memlekettik organdar basshylaryna depýtattyq saýaldar joldady.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz