Aımaqtar • 25 Qańtar, 2021

Elordada qylmys sany 20%-ǵa azaıǵan

5 ret kórsetildi

Nur-Sultan qalasynyń Polısııa departamenti ótken jyldyń qorytyndysyn jarııalady, dep habarlaıdy ákimdiktiń resmı saıty.

Polıseılerdiń aqparatyna sáıkes, 2020 jyly qoldanylǵan sharalardyń nátıjesinde qylmys sany 30%-ǵa azaıdy. Urlyq 54%-ǵa, tonaý 56%-ǵa azaıdy.

Qoǵamdyq oryndarda, kóshelerde, mas kúıinde jasalatyn qylmys jáne kámeletke tolmaǵandar arasynda qylmys sany edáýir azaıdy. Qylmystyń barlyq túri boıynsha isti ashý jaqsardy. Sondaı-aq jol-kólik oqıǵalarynyń sany 17,2%-ǵa, olarda zardap shekkender 24,9%-ǵa, qaza bolǵandar 13,9%-ǵa azaıdy. Mas kúıinde kólik júrgizgeni úshin 1000-ǵa jýyq júrgizýshi ákimshilik qamaýǵa alyndy.

О́tken jyly esirtki qylmysynyń 903 faktisi anyqtaldy. Zańsyz aınalymnan 264 kg esirtki zaty tárkilendi. Joǵary qoǵamdyq qaýipti eskere otyryp, esirtkiniń taralý arnalaryn jáne sıntetıkalyq esirtkilerdi daıyndaý jónindegi jasyryn esirtki zerthanalarynyń qyzmetin anyqtaýǵa jáne jolyn kesýge basa nazar aýdarylady. Polısııaǵa qala turǵyndary belsendi túrde kómektesýde. Olardyń qyraǵylyǵynyń arqasynda bas-aıaǵy 109 jarnamalyq saıt buǵattalǵan.

Pandemııa jaǵdaıynda Nur-Sultan polıseıleri karantındik sharalardy saqtaý boıynsha úlken jumys júrgizdi, ol búginge deıin jalǵasýda. 2020 jyly monıtorıngtik mobıldik toptar sanıtarlyq normalardyń eki jarym myńnan astam buzylýyn anyqtady.

«Polısııa jumysy quqyqtyq tártipti, qoǵamdyq qaýipsizdikti qamtamasyz etýge, otbasylyq-turmystyq quqyq buzýshylyqtar men jasóspirimder qylmysynyń aldyn alýǵa, sondaı-aq azamattardyń senim deńgeıin arttyrýǵa baǵyttalatyn bolady», dep málim etti elordalyq polısııa departamentiniń bastyǵy general-maıor Erjan Sádenov.

Elordanyń bas polıseıi 2021 jyl «quqyq buzýshylyqtardyń aldyn alý jyly» dep jarııalanǵanyn atap ótti. Sondyqtan elordalyq tártip saqshylarynyń jumysy otbasylyq-turmystyq qatynastar salasyndaǵy quqyq buzýshylyqtardyń aldyn alýdy kúsheıtýge basa nazar aýdara otyryp, «polısııa qadamdyq qoljetimdilikte» qaǵıdatyna negizdeletin bolady.

Sońǵy jańalyqtar

Uqsas jańalyqtar