Reseılik vaksınaǵa suranys kóp

Pikir • 28 Qańtar, 2021

Reseılik vaksınaǵa suranys kóp

2021 jylǵy 1 aqpannan bastap el aýmaǵynda Reseıde shyǵarylǵan Gam-KOVID-Vak («Spýtnık V») vaksınasyn paıdalana otyryp, KVI-ǵa qarsy vaksınalaý bastalady. Odan ári 15 aqpannan bastap vaksınalaý prosesine Qaraǵandy farmasevtıkalyq kesheniniń bazasynda óndirilgen Gam-KOVID-Vak vaksınasy qosylady. 2021 jyldyń 2 toqsanynan bastap vaksınalaýǵa otandyq ónim – QazCovid-In preparatyn qosý josparlanyp otyr. Otandyq vaksına qazirgi ýaqytta klınıkalyq synaqtardyń 3-kezeńinen ótýde.

Egemen Qazaqstan

«Spýtnık V» vaksınasyn 18 jasqa deıingi balalarǵa qoldanýǵa bolmaıdy, sáıkesinshe ony tek kámeletke tolǵan Qazaqstan azamattary ǵana ala alady. Atalǵan vaksına Reseı Federasııasynda memlekettik tirkeýden ótti jáne birneshe aı boıy halyqtyń osal toptaryn ımmýndaý úshin qoldanylyp keledi. Reseı Federasııasynyń Tikeleı ınvestısııalar qorynyń málimetteri boıynsha, bul vaksınany satyp alýǵa 50-ge jýyq memleket ótinish bergen, al keıbir elder (Belorýssııa, Argentına, Serbııa) qazirdiń ózinde ony sátti qoldanyp jatyr.

Qoldanystaǵy zańnamalarǵa sáıkes Qazaqstan Respýblıkasynyń aýmaǵyna tirkelmegen dárilik zattardy ákelý kezinde dárilik zattyń sapasyn rastaıtyn óndirýshiniń qazaq nemese orys tilderine aýdarmasy bar qujatynyń elektrondyq kóshirmesi (taldaý sertıfıkattary nemese synaq esebi ıakı sapany baǵalaý kórsetkishteri bar sapa pasporty) bolýy qajet. Qazirgi ýaqytta Qazaqstan Respýblıkasy Úkimetiniń 2020 jylǵy 15 jeltoqsandaǵy №850 qaýlysymen Qazaqstan Respýblıkasynda óndirilgen COVID-19 koronavırýsyna qarsy vaksınalardy ýaqytsha memlekettik tirkeý erejeleri bekitildi.

Al qazir qoldanysqa engizilip úlgergen vaksınalardyń nelikten erte daıyn bolǵanyn qolda bar ázirlemege súıenip jasaǵanymen baılanystyrýǵa bolady. Máselen, «Spýtnık V» vaksınasyn ázirlegen N.Gamaleıa atyndaǵy Epıdemıologııa jáne mıkrobıologııa ulttyq zertteý ortalyǵy pandemııaǵa deıin SARS-CoV-2 koronavırýsy da jatqyzylǵan RNQ bar qabyqty vırýstarǵa qarsy vaksınalar men preparattar jasaýdyń tehnologııalyq platformasyn ashqan edi. Demek, álemdegi birneshe memleket jasap shyqqan vaksınalardyń tez arada daıyn bolýy kompanııalardyń qaýipsizdik hattamalarynan aınalyp ótkenin bildirmeıdi.

Osy rette tutynýshylarǵa, el azamattaryna qaýipti indetke qarsy ekpeniń tek Reseıden ǵana ákelinbeıtinin aıta ketken joq. Densaýlyq saqtaý mınıstrligi qazirgi tańda «Sinovac», «Sinopharm» (Qytaı), «Phizer» (AQSh) qosa alǵanda, koronavırýs ınfeksııasyna qarsy vaksına óndirýshi birqatar memleketpen kelissózder júrgizýde.

Erjan BAITANAEV,

Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń resmı ókili

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz