Karantındik sharalar kúndelikti baqylaýda

Epıdemııalyq jaǵdaıdy baǵa­laý­dyń óńirlik tizbesine sáı­kes Pavlodar, Aqsý jáne Ekibastuz qalalary men 9 aýdany áli de «qyzyl aımaqta», al Baıanaýyl aýdany «sary aımaqqa» endi. Bul jaǵdaı, epıdemıologtardyń baǵalaýy bo­ıynsha «Qoldanystaǵy karantındik sharalardy saqtaýdy jáne olardyń saqtalýyn baqylaýdy kúsheıtýdi» talap etedi. Sondyqtan onlaın baılanys arqyly indettiń taralmaýyna oraı jasalatyn is-qımyl sharalary jónindegi jedel shtabtyń otyrysy ótti.

Sanıtarlyq-epıdemıologııalyq baqylaý departamentiniń basshysy Batyrbek Álıevtiń habarlaýynsha, Aqsý qalasynda apta saıyn syrqattardyń kóbeıýi baıqalýda. Qaladaǵy 100 myń turǵynǵa shaq­qanda kórsetkish joǵary sanalady. Jelezın aýdanynda, sondaı-aq Aqqýly jáne Tereńkól aýdandarynda da 100 myń turǵynǵa shaqqan­da aptalyq kórsetkish oblystyq deńgeıden eki ese joǵary.

Otyrys barysynda atalǵan qalalar men aýdandardyń ákim­derine epıdemııalyq ahýaldy jaq­sartý úshin túbegeıli sharalar qabyldaý tapsyryldy. Shtab otyrysynda jyl basynan beri 237 naýqas tirkelgen óńirdiń iri óner­kásip kásiporyndary qyz­met­kerleriniń arasyndaǵy syr­qattanýshylyq deńgeıi de tal­qylandy. О́ıtkeni Aqsý qala­syn­da epıdemııalyq jaǵdaı qoǵam­dyq kóliktegi áleýmettik qashyq­tyqtyń saqtalmaýynan ýshyq­qan. Sondyqtan qoǵamdyq kólik­tegi jolaýshylar sanyn azaıtý úshin jergilikti kásiporyndar basshylyǵy zaýyttyń birneshe avtobýsyn qalalyq marshrýttarǵa jiberý týraly sheshim qabyldady.

Al Kásipkerlik jáne ındýstrııa­lyq-ınnovasııalyq damý basqar­masynyń basshysy Aıbek Tursyn­ǵalıevtiń málimetinshe, byltyr 10 330 reıd júrgizilip, 26 703 kásipkerlik nysandary tekserildi, 2 693 ereje buzýshylyq anyqtalyp, 986 kásipker ákimshilik jaýapkershilikke tartyldy. Bıyl jyl basynan beri 7 kásipkerge aıyppul salyndy. Oblys boıynsha 661 reıd júrgizilip, 6 041 nysan tekserildi. Jyl basynan beri 41 mekemede karantın talaptaryn buzý anyqtaldy. Basqarma basshysynyń aıtýynsha, kásipkerlik nysandary monıtorıng toptarynyń jumystaryna kedergi keltiredi. Olar ózderiniń tásilderin qoldanady. Esikterin, terezelerin jaýyp tastaıdy. Jabyq telegram kanaldaryn ashyp, kelýshilerge aldyn ala tapsyrys berýge, oryn alýǵa múmkindik jasaıdy.

Oblystyq polısııa departa­mentiniń basshysy Nurlan Másimov búginde oblysta quramynda 176 polısııa qyzmetkeri bar monıtorıng toptary jumys isteıtinin atap ótti.

– Jyl basynan beri tirkelgen 22 buzýshylyq 18 oıyn-saýyq orynynyń jáne 4 saýda nysany­nyń jumys ýaqytyna, al 19 tártip buzýshylyq betperde kııý erejesine baılanysty, – dedi Nurlan Másimov.

Densaýlyq saqtaý basqarmasynyń basshysy Aıdar Seıitqazınov Densaýlyq saqtaý mınıstrliginiń tapsyrysy boıynsha oblysqa «Spýtnık V» vaksınasynyń 80 myń dozasy bólingenin aıtty.

– Ǵ.Sultanov atyndaǵy oblys­tyq aýrýhananyń tońazytqysh jabdyqtarynyń kólemi vaksınany saqtaý talaptaryna saı. Qosymsha kólemi 1,2 tekshe metr 3 muzdatqysh kamera satyp alynady. Qan ortaly­ǵynyń saqtaý qoımasy da iske qosy­lady, – dedi A.Seıitqazınov.

Jalpy erikti túrde ekpe jasaýdy óńir boıynsha 90 egý kabınetinde júrgizý josparlanyp otyr. Den­saýlyq saqtaý basqarmasynda 1 125 medısına qyzmetkeri oqytyldy. Preparattyń alǵashqy partııasyn jetkizgennen keıin vaksınany eń aldymen ınfeksııalyq stasıonarlarda, jedel járdem qyzmetin­de, karantındik stasıonarlarda jáne stasıonarlyq kómek kórsete­tin basqa da uıymdarda jumys isteıtin medısına qyzmetkerleri alady.

Erikti vaksınalaý muǵalimder, kúshtik qurylymdar, quqyq qorǵaý organdarynyń qyzmetkerleri, stýdentter, medısınalyq-áleýmettik saraptama mekemeleri, sozylmaly aýrýlary bar naýqastar arasynda júrgiziledi.

– Jalpy oblysta vaksınany 85 704 adam alýy múmkin. Bul naqty san emes. Sondyqtan ózgerýi yqtımal. Vaksınany ýaqytynda egý vaksınaǵa qatysty klınıkalyq kórsetkishterge, adamdardyń óz erki­men egilýine, egiletinderdiń epıde­mıo­lo­gııalyq mártebesine baılanys­ty, – dedi A.Seıitqazınov.

Aqpan aıynda jetkiziletin vaksına medısına qyzmetkerlerine egiledi. Jospar boıynsha 9 myńǵa jýyq medısına qyzmetkeri tizimge alynǵan. Bastysy, qazir vaksı­nalaýǵa, ıaǵnı ekpe jasaýǵa daıyndyq úshin oblysta aldyn ala túsindirý, aqparattandyrý jumystaryn júr­gizý kerek. Oǵan qosa, turǵyndar su­raq­taryna jaýap alý úshin «Jedel jeli» qurý qajet.

Oblys ákimi Ábilqaıyr Sqaqov túsindirý jumystaryn júrgizý qa­jettigin, erejeler qaıtalanyp buzylǵan oryndarda aıyppul salý kerektigine toqtaldy.

– Aldymen monıtorıng top­tarynyń jumysyn jaqsartý qajet. Kóptegen tekserýdiń keregi de joq. Biraq naqty buzýshylyqtarǵa jol bermeýimiz kerek, – dedi oblys ákimi.

Pavlodar oblysy