Teatr • 02 Naýryz, 2021

Dárigerlerge tartý

6 ret kórsetildi

«Astana Opera» memlekettik opera jáne balet teatry 1 naý­ryzda Mádenıet jáne sport mınıstrligi jáne Nur-Sultan qalasy ákimdigimen birlesip, elordalyq dárigerlerge arnap qaıyrymdylyq aksııasyn ótkizdi.

P.Chaıkovskııdiń «Evgenıı Onegın» spektakliniń premerasy teatr sahnasynda 2019 jyly 8, 9 aqpan kúnderi ót­ken edi. Operalyq týyndy «As­tana Opera» solısteri men orkes­triniń, hory men baletiniń, son­daı-aq balalar stýdııasynyń qa­tar qatysýymen qundy. Qoıý­shy dırıjeri – teatrdyń bas dırıjeri, Qazaqstannyń eńbek sińirgen qaıratkeri, Memlekettik syılyqtyń laýreaty Alan Bóri­baev. Bas hormeısteri – Qazaq­stannyń eńbek sińirgen qaıratkeri Erjan Dáýitov, qoıýshy horeografy – Elena Sherstneva.

«Evgenıı Onegın» operasy álemdegi eń iri repertýarlyq qo­ıy­lymdardyń biri sanalady. «Astana Opera» sahnasyna bul týyndy qoıýshy-rejısser Davıde Lıvermordyń biregeı tu­jyrymdamasymen usynylǵany málim. Oqıǵa jelisi egde jastaǵy Tatıananyń Evgenıı Onegınmen ótkizgen jastyq shaǵyn eske alýymen óriledi. Otandyq óner sańlaqtary ázirlegen qoıy­lymnyń ereksheligi sseno­grafııalyq áser­lerden de aıqyn ańǵarylady: hıkaıa keıipkerleri qas pen kózdiń arasynda sahna astyna jasyrynyp, avtomatty platformada sahnanyń túkpirinen paıda bolady, al 3D-proeksııalar tabıǵattyń ásem kórinisin, keıipkerler beı­nesiniń qosarlanýyn aıshyqty bederleıdi. Qazaqstannyń eń­bek sińirgen qaıratkerleri, bel­gili sýretshiler Sofıa Tas­ma­­ǵambetova men Pavel Dra­gý­nov­tyń sharýalardyń túrli-tústi kostıýmderin, sol dá­ýirdiń sán­di stılin, Peter­býrg baly men La­rınder úıin­degi me­rekeni jetkizýdegi shyǵar­ma­shyl izdenisi aıryqsha atap ótýge turarlyq.

– Alǵys aıtý kúni 2016 jy­­ly Qazaqstannyń Tuńǵysh Prezı­denti – Elbasy Nursultan Nazarbaevtyń bastamasymen ja­­rııalanǵan bolatyn. Elor­dalyq medısına mekemeleri qyz­metkerlerine Alǵys aıtý kúni qurmetine merekelik tartý retinde usynylatyn P.Chaıkovskııdiń «Evgenıı Onegın» qoıylymy arqyly álemdik klassıka jaý­haryna birtaban jaqyndaı túsýdi maqsat tuttyq. Adamdardyń bir-birine qolushyn sozýy, qoldaý kórsetýi men qaıyrymdylyǵy, meıirimdiligi men jomarttyǵy sııaqty adamzatqa ortaq asyl qun­dylyqtar barlyq qazaq­standyqtyń kóńiline jarqyn bolashaqqa nyq senimmen qaraýǵa senim uıalatady, – dedi «Astana Opera» teatrynyń dırektory, Qazaqstannyń eńbek sińirgen qaıratkeri Ǵalym Ahmedıarov.

Eske sala ketetin taǵy bir jaıt, teatr 2019 jyldyń qazan aıyn­da Dmıtrıı Hvorostovskııdiń birinshi festıvaline qatysyp, reseılik kórermender tarapynan da joǵary baǵalanǵan bolatyn. О́ner sheberi qurmetine ótkizilgen mádenı shara kórnekti ánshiniń mádenı murasyn saqtaýǵa jáne qoldaýǵa arnalǵan. Qazaqstandyq ártister D.Hvorostovskıı atyn­daǵy Krasnoıar memlekettik opera jáne balet teatrynyń sahnasynda uly kompozıtordyń 180 jyldyǵy qurmetine P.Chaı­kovskııdiń jaýhar týyndysyn usynǵan edi.

Sońǵy jańalyqtar

Aısberg aqıqaty

Ádebıet • Keshe

Joq kitapty izdeý

Ádebıet • Keshe

Krest-kedergi...

Ádebıet • Keshe

Zaısanda mal qyrylyp jatyr

Aımaqtar • Keshe

Uqsas jańalyqtar