Álem • 08 Sáýir, 2021

Nazar – Arktıkada

13 ret kórsetildi

Reseı úkimeti jaqynda eldiń Arktıkalyq aıma­ǵyn áleýmettik-ekono­mı­­kalyq damytýdyń mem­lekettik baǵdarlamasyn bekitti. Qujatta 2024 jylǵa deıingi strategııany iske asyrý úshin 19,5 mıllıard rýblden astam qarajat bólý josparlanǵany aıtylǵan. Memlekettik baǵdarlamanyń maqsattaryna Reseıdiń Arktıkalyq aımaǵynyń quramyna kiretin aýmaqtardyń ekonomıkalyq damýyn jedeldetý, olardyń memlekettiń ekonomıkalyq ósýine qosqan úlesin arttyrý, sondaı-aq makroóńirdiń turaqty áleýmettik-ekonomıkalyq damýy­na jaǵdaı jasaý kiredi.

Arktıka óńirine qyzyǵýshylyq tanytatyn elder qatary kóp. Solardyń ishinde Reseı áreketterin jiti baqylap otyrǵany – AQSh ekeni belgili. Bul joly da Pentagon qorǵanys máselesine kelgende únsiz qalmady. Brıfıngterdiń birinde AQSh-tyń Qorǵanys mınıstrligi Reseıdiń Arktıkadaǵy belsendiligin muqııat baqylap otyrǵany aıtyldy. «Arktıka aımaǵynyń áskerı mekenge aınalǵanyn eshkim qalamaıdy» degen Pentagon ókili Djon Kerbı aımaqtyń amerıkalyq qorǵanys júıesinde taktıkalyq turǵydan mańyzdy ról atqaratynyn atap ótti. Onyń aıtýynsha, Ulttyq qaýipsizdik turǵysynan alǵanda aımaq AQSh úshin asa mańyzdy.

Osyǵan deıin Reseıdiń Arktıkada buryn-sońdy bolmaǵan áskerı kúsh jınap, jańa qarý túrlerin synap jatqany aıtylǵan-dy. Reseıdiń qorǵanys salasyndaǵy áreketterine alańdaýshylyq tanytyp otyrǵan mamandar aldaǵy jaǵdaıdy boljaý qıyn ekenin alǵa tartady. «Orystar ádette jańa qarý-jaraq túrlerin synaý, GPS sıgnaldaryn óshirý, jattyǵý úshin áýe jáne teńiz joldaryn jaýyp tas­taý nemese Arktıkanyń ústinen bombalaýshylardy ushyrý arqyly habarlama jetkizýge tyrysady», deıdi AQSh-tyń bılik ókilderi.

Alaıda Reseı barlyq áreketteri beıbitshilik pen ekonomıkalyq damýǵa baǵyttalǵan degennen qaıtpaıdy. Kúni keshe Reseı basshysynyń baspasóz hatshysy Dmıtrıı Peskov eldiń Arktıkadaǵy áreketine áskerı qurylystyń bir elementi degen baǵa berdi. Ol aımaqtyń ekonomıkalyq áleýeti jyl sa­ıyn artyp kele jatqanyn aıtyp, óńirdi damytýdyń keshendi jospary oryndalyp jatqanyn jetkizdi.

Sondaı-aq ol amerıkalyq áriptesteriniń alań­daýshylyǵyna qatysty «AQSh-tyń ózi Arktıkadaǵy áskerı baqylaýyn azaıtqan emes» dep jaýap berdi. Peskov Reseıdiń qazirgi áreketi AQSh-tyń Arktıkaǵa degen erekshe nazaryna saı keletinin alǵa tartty.

 

Sońǵy jańalyqtar

Eldanaǵa el rıza

Sport • Keshe

Jumekenniń «Balaýsasy»

Rýhanııat • Keshe

«Sálemetsiz be, Baqtııar!»

Rýhanııat • Keshe

Sortóbeniń baǵy eselenip keledi

Rýhanııat • Keshe

Aldaǵy apta kún jylynady

Aýa raıy • Keshe

Súıispenshilik sabaǵy

Aımaqtar • Keshe

Uqsas jańalyqtar