Prezıdent Reseıdiń Syrtqy ister mınıstrin qabyldady

Prezıdent • 08 Sáýir, 2021

Prezıdent Reseıdiń Syrtqy ister mınıstrin qabyldady

Memleket basshysy Qasym-Jomart Toqaev Nur-Sultan qalasyna jumys saparymen kelgen Reseı Federasııasynyń Syrtqy ister mınıstri Sergeı Lavrovty qabyldady, dep habarlaıdy Egemen.kz.

Janbolat Kenjeǵul

Qasym-Jomart Toqaev memleketter arasyndaǵy ózara qarym-qatynastar men yntymaqtastyqqa tyń serpin berý turǵysynan mınıstrdiń bul saparynyń mańyzdy ekenin aıtty.

– Qazaqstan men Reseı – odaqtas ári strategııalyq seriktester. Yntymaqtastyǵymyzdyń kún tártibi óte tyǵyz jáne qol jetkizgen ýaǵdalastyqtardy júzege asyrý úshin kóp jumys atqarýdy qajet etedi. Sondyqtan sizdiń saparyńyz barysynda jáne vedomstvo basshylary deńgeıindegi, sondaı-aq, eń joǵary deńgeıdegi kezdesýler barysynda alǵa qoıǵan maqsattarymyzǵa qol jetkizemiz dep oılaımyn. 23 naýryzda Vladımır Pýtınmen óńiraralyq kezdesý ótkizýdiń mańyzdylyǵy týraly sóılestik. О́kinishke qaraı, pandemııa saldarynan keıinge shegerildi. Biz kez kelgen formatta, múmkindiginshe betpe-bet kezdesýge ýaǵdalastyq. Eger munyń sáti túspese, onda atalǵan kezdesýdi vıdeo konferensııa rejıminde mindetti túrde ótkizemiz. О́ıtkeni bul asa mańyzdy, – dedi Memleket basshysy.

Qasym-Jomart Toqaev Qazaqstanǵa vaksınanyń qosymsha bóligin jiberý máselesine qoldaý kórsetkeni úshin Vladımır Pýtınge rızashylyǵyn bildirdi.

– Biz pandemııaǵa qarsy birlesken kúreste túsinistik tanytyp, kómek kórsetkeni úshin Reseı basshylyǵyna, Reseı Federasııasynyń Prezıdentine rızashylyǵymyzdy bildiremiz. 23 naýryzda sóılesken kezde Reseıden qosymsha 4 mıllıon mólsherde vaksına alý jóninde másele kóterdim. Meniń ótinishimdi túsinistikpen qabyldady. Buǵan deıin biz Qaraǵandy fabrıkasynda birlesip vaksına óndirýge ýaǵdalasqan edik. Qazir óndiris jolǵa qoıyldy. Jaqynda ǵana men ózim de Qazaqstanda óndirilgen «Spýtnık V» vaksınasyn saldyrdym. Jýyrda Úkimettiń keńesin ótkizip, halyqty jappaı vaksınalaýdy jedeldetýdi tapsyrdym. Bul mindet, birinshiden, naryqqa vaksınany tıisti mólsherde jetkizýge, ekinshiden, halyqqa vaksına salýdyń mańyzdylyǵyn túsindirý jumystaryn júrgizýge baılanysty. Qazir jurttyń kópshiligi bul sharanyń mańyzdylyǵyn tolyq túsinbeı jatyr. Árıne, biz vaksınany tegin salamyz. Sondyqtan men ózim de vaksına egýden basqa jol joq ekenin únemi aıtyp kelemin, – dedi Memleket basshysy.

О́z kezeginde Sergeı Lavrov Prezıdent Vladımır Pýtınniń sálemi men iltıpatyn jetkizip, Reseı tarapy vaksına jetkizý máselesin sheshetinin aıtty.

Kezdesý barysynda ekijaqty yntymaqtastyqtyń negizgi aspektileri, onyń ishinde, saýda-ekonomıkalyq jáne mádenı-gýmanıtarlyq baılanystar, ǵarysh salasyndaǵy ózara is-qımyldy odan ári damytý máseleleri talqylandy.

– Kelesi aıda vıdeo konferensııa formatynda Joǵary eýrazııalyq ekonomıkalyq keńestiń otyrysyn uıymdastyrý josparlanyp otyr. Bul bizdiń koronovırýs indetinen keıingi kezeńdegi yntymaqtastyǵymyzdy jalǵastyrýǵa baǵyttalǵan ortaq kúsh-jigerimizdi jumyldyrý jolyndaǵy mańyzdy kezeń. О́zińiz atap ótkendeı, biz Prezıdentterdiń qatysýymen ótetin 17-aımaqaralyq forýmdy ótkizemiz. Biraq onyń qandaı formatta bolatyny epıdemıologııalyq jaǵdaıǵa baılanysty. Bizdiń qarym-qatynastarymyz óte jaqsy. Saýda-ekonomıkalyq yntymaqtastyq máseleleri boıynsha premer-mınıstrler eki ret kezdesti, vıse-premerler odan da jıi baılanys jasap turady. Qarym-qatynastar pandemııa kezinde de úzilgen joq. Iý.Gagarınniń ǵaryshqa ushqanyna 60 jyl tolýyn atap ótemiz. Bul – bizdiń ǵaryshty beıbit ıgerýge qosqan ortaq úlesimiz. Baıqońyrdaǵy bizdiń ózara is-qımylymyzdy odan ári órkendetý jáne Qazaqstannyń ǵaryshtyq áleýetin damytý jónindegi birlesken jumystarymyz qarqyndy júrip jatyr, – dedi Sergeı Lavrov.