Aımaqtar • 11 Sáýir, 2021

«Kıik jappaı qyrylyp jatyr»..

54 ret kórsetildi

«Soltústik Qazaqstanda kıik jappaı qyrylyp jatyr» dep dúrliktirgen habardy otandyq BAQ-ta jerden jeti qoıan tapqandaı jarııalap, jurttyń bárin eleń etkizdi. Biz osy habardy anyqtamaq bolyp, Soltústik Qazaqstannyń tıisti qyzmetterine júgindik.

Ras, kıiktiń áli tolyq jetilmegen byltyrǵy laqtary toıa tamaq jemegendikten kóktemge álsirep shyǵyp, onyń ústine qazir qar astynan jemazyq taba almaı, birli-jarym ólip jatyr eken. Bul ýaqytta jerdiń qary ketip, jol aıaǵy keńip, kıiktiń tumsyǵy byltyrǵy qaýǵa tııýge tıisti edi. Biraq bıylǵy qalyń qar kete qoımaı, onyń ústine bir erip, bir qatyp, tuıaǵy álsiz jándikter kóktaıǵaqty jara almaǵandyqtan, azyq taba almaı jatyr eken. Keıde baıǵustar qalyń qary ketken joldyń jıegine deıin kelip, astynan byltyrǵy qaýdy túrtetin kórinedi. Ondaıda keıbir sanasyz júrginshiler qyzyqtap, olardy ne atyp alyp nemese soǵyp ketetin kórinedi.

«Kıik jappaı qyrylyp jatyr» degen daqpyrttyń anyq-qanyǵyn biz orman sharýashylyǵy jáne janýarlar álemi aýmaqtyq ınspeksııasynan bildik.  Bizge osy qyzmettiń bólim bastyǵy Oleg Bespalov bylaı dep jaýap berdi: «Kıik jappaı qyrylyp jatyr degen pikirler shyndyqqa janaspaıdy. Eger ondaı bolsa, biz tótenshe jaǵdaı jarııalar edik. Birli-jarym ólip jatqandar qar astyndaǵy azyqqa jete almaı, ashtan ólip jatqandar. Sonymen birge jol apatyna ushyrap jatqandar da bar. Onyń ústine qańǵyrǵan ıtterdiń qýǵynyna túsip jatqandar da ushyrasyp qalady. Ań-qustyń kóktem kezinde ólip jatýy bizdiń úırengen kórinisimiz. Qystan álsirep shyqqan kóptegen ań-qus azyq-túlik az bolǵan soń ólip qalady. Biz óz tarapymyzdan olarǵa shóp, jem shashyp jatyrmyz. 30 naýryzǵa deıingi málimet boıynsha ańshylyq sharýashylyqtary 600 tonnadaı shóp, 714 tonna jem, 774 tonna jem qaldyqtaryn shashty. Sonymen birge 236 tonna býylǵan japyraq (venık) shashyldy. 14 tonnadaı tuz jaıyldy», dedi bizge O.Bespalov.

Shynynda, kıiktiń qyrylýy eshqandaı apattyń sebebinen emes. Joǵaryda aıtqanymyzdaı onyń basty sebebi – bul ýaqytta áli de ketpeı siresip jatyp alǵan qalyń qar. Jer de áli qatyp jatyr, sýdy sińire qoımaıdy. Sondyqtan apy kirip, kúpi shyqqandaı laýlatýdyń qajeti joq dep sanaımyz.

 

Soltústik Qazaqstan oblysy  

 

Sońǵy jańalyqtar

Araq satylmaıtyn aýdan

Aımaqtar • Keshe

Erlikke toly sýretter

Rýhanııat • Keshe

Uqsas jańalyqtar