Saıasat • 14 Sáýir, 2021

Front-keńseler qyzmeti tıimdi me?

8 ret kórsetildi

Pavlodar oblysy ákimi apparatynyń málimetinshe, bıyl óńir turǵyndarynan 3 myńnan astam aryz-shaǵym kelip túsken. Bul sannyń artýy jergilikti oryndar men jurtshylyq arasyndaǵy baılanystyń álsiz ekenin ańǵartady. Aýyl-aýdandarda ótinishterine naqty jaýap ala almaǵan turǵyndar amalsyz oblystyq memlekettik organdarǵa barýǵa májbúr.

Oblys ortalyǵyndaǵy «Astana» kóshesi, №59 mekenjaıynda óńir turǵyn­daryna naǵyz qajetti oblys­tyq densaýlyq saqtaý, jumys­pen qamtýdy úılestirý jáne áleýmettik baǵdarlamalar basqarmalary men eńbek jáne áleýmettik qorǵaý jáne kóshi-qon departamenti ornalasqan.

Densaýlyq saqtaý basqarmasy 4-qabatta, qalǵan mekemeler de osy deńgeıles qabattarda ornalas­qan­dyqtan, halyqqa bul mekemelerge baryp, joǵaryǵa kóterilip, óti­nish-aryzdaryn jetkizý qansha­lyq­ty qıyn ekeni aıtpasa da túsinikti.

Jaqynda osy ǵımarattyń birin­shi qabatynda «Áleýmettik front-keńse» ashyldy. Bul keńse óńir tur­ǵyndaryna joǵary qabatqa kóte­rilmeı-aq, memlekettik qyzmet kór­setýge múmkindik beredi. Dál osy jerde basqarma mamandary turǵyn­dardyń aryz-shaǵymdary men óti­nishterin tyńdap, qajetti keńes­ter beredi.

Keńse Sybaılas jemqorlyqqa qarsy is-qımyl agenttigi óńirlik departamentiniń bastamasymen ashyldy. Jańadan taǵaıyndalǵan departament basshysy Ernar Baıan­ǵazın turǵyndarǵa qoljetimdi osyn­daı keńselerdi ashý Memleket bas­shysynyń «Halyq únine qulaq asa­tyn memleket» tujyrymdamasy aıasynda júrgizilip otyrǵanyn atap ótti.

«Ǵımaratta ornalasqan úsh organ memlekettik qyzmettiń kóp bóligin usynady. Keńse halyqtyń sol qyzmetterdi alýyn jeńildetý úshin ashyldy. Halyq búkil kabı­net­terdi aralamaı-aq qyzmetti bir jer­den ala alady. Eń bastysy, jem­qorlyqty, sheneýnik pen qyzmet alýshy arasyndaǵy tikeleı baılanys­ty azaıtady. Munyń bar­lyǵy halyqtyń jaǵdaıyn jaq­sartý úshin jasalýda», degen Ernar Baıanǵazın jaqynda bul jerde departamenttiń tegin quqyq­tyq kó­mek beretin «Adal kómek» joba­lyq keńsesi ashylatynyn habarlady.

Al oblystyq densaýlyq saqtaý basqarmasy basshysynyń orynbasary Gúlnár Býrataeva front-keńse turǵyndar tarapynan jıi qoıylatyn suraqtarǵa jaýap berýge, túsken ótinishterge saraptama jasaýǵa kómektesetinin aıtyp, múmkindigi shekteýli jandar úshin de óte yńǵaıly ekenin jetkizdi.

О́ńir halqy basqarmaǵa emdelý, dárimen qamtamasyz etý, múge­dektikke qatysty máseleler boıyn­sha óte jıi keledi. Mysaly, jyl basynan beri 19 ótinish túsip, onyń 16-syna jaýap berilgen.

Sondaı-aq, keńsede úsh basqar­manyń mamandary, bólim basshylary, basqarma basshylarynyń orynbasarlary jáne basqarma basshylary arnaıy keste boıynsha turǵyndarǵa jeke qabyldaý kúnderin ótkizedi. Aldaǵy ýaqytta aımaqtaǵy aýyl sharýashylyǵy basqarmasynyń ǵımaratynda da front-keńse ashý usynylyp otyr. О́ıtkeni  ótken jyl ishinde oblystyń aýyl sharýashylyǵy salasynda 33 qylmystyq is qozǵalǵan. Sol sebepti Ernar Baıanǵazın óńirdegi aýyl sharýashylyǵy salasyn sybaılas jemqorlyq táýekelderinen aryltý, memlekettik qyzmetshiler men tutynýshylar arasynda kez kel­gen buzýshylyqtarǵa tózbeý­shilikti qalyptastyrý qajet dep sanaıdy. Al aýyl sharýashy­lyǵy basqarmasynda memlekettik qyz­mettiń 18 túri kórsetiledi. Onyń biri – sýbsıdııalaý. Basqarma arqyly ótetin bul qarjylaı memlekettik qoldaý úlken jaýapkershilikti talap etedi. Iаǵnı memleket bólgen árbir teńge fermerge jetýge tıis.

Turǵyndardyń deni servıstik ákimdikter arqyly jer, jaıylym máselesi, Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasy boıynsha aqyl-keńes alǵylary keledi. Al basqarmaǵa qarasty Maı, Ýspenka, Aqqýly aýdandary aýyl sharýashylyǵy bólim­deri mamandarynyń servıstik ákimdikterde bolmaıtyndyǵy baı­qalǵan. Bul is júzinde servıstik ákimdikterdiń keıbireýleriniń qyz­meti kózboıaýshylyq ekenin ańǵar­tady.

Memlekettik qyzmetshilerdiń turǵyndarǵa memlekettik baǵdar­lama­lardyń iske asyrylýyn du­rys túsindire almaýy da úlken máse­lege aınalǵan. Sebebi aýdan ortalyqtary men aýyldarda bilimdi, bilikti mamandar tapshy. Taǵy bir másele memlekettik tilge kelip tireledi. О́ıtkeni servıstik ákimdikter men front-keńselerde esikten kirgennen bastap qabyldaý tili – oryssha. Sondyqtan, eń aldymen, basshylar qazaq tiline janashyr bolýlary kerek.

Mysaly, Aıdar Seıitqazınov basqaratyn oblystyq densaý­lyq saqtaý basqarmasy qyzmetker­leriniń arasynda qazaq tilinde sóıleı alatyn basshylar bar ma? Basqarma mamandary aldaryna aýyl­dan kelgen qarııalarǵa qazaq tilinde qyzmet kórsete ala ma? Qala turmaq, aýyl­darda qazaq tilinde mán-jaıdy túsindirip bere alatyn mamandar az.

Qazir elimizde ashylyp jat­qan servıstik ákimdikter, front-keńseler júıesi sybaılas jem­qorlyqtan arylýdyń jáne óńir tu­r­ǵyndaryna tez jáne sapaly qyzmet kórsetýdiń tıimdi bir tásiline aınalýda deımiz. Al olardyń qyzmeti talapqa saı ma? Árıne, talapqa saı, bári jarqyrap tur, barlyq tehnıkalyq qural-jabdyq, ústel, oryn­dyq, balalar alańy bári de bar. Biraq másele basqada. Endi she­neýnikter de joǵarydan tómenge túsip, keńselerde qarapaıym júrip-turyp, adamdarmen til tabysyp sóılesýge úırengeni jón.

 

Pavlodar oblysy

 

Sońǵy jańalyqtar

Shýchede jańa sport kesheni salynady

Aımaqtar • Búgin, 18:59

Erlikke toly sýretter

Rýhanııat • Búgin, 13:05

Kıikterdiń tóldeý kezeńi bastaldy

Fotogalereıa • Búgin, 12:07

Qazaqstannyń altyn-valıýta qory ósti

Ekonomıka • Búgin, 12:02

Pavlodarda avtobýs baǵanǵa soǵyldy

Oqıǵa • Búgin, 09:54

Batys Qazaqstanda kıikter ólip jatyr

Aımaqtar • Búgin, 09:44

Uqsas jańalyqtar