Prezıdent • 14 Sáýir, 2021

Memleket basshysy Máýlen Áshimbaevty qabyldady

35 ret kórsetildi

Qasym-Jomart Toqaevqa Parlamenttiń joǵarǵy Palatasynyń zań shyǵarýshylyq qyzmeti týraly málimet berildi, dep habarlaıdy Egemen.kz Aqordanyń baspasóz qyzmetine silteme jasap.

Máýlen Áshimbaev Senattyń qaraýynda jatqan zań jobalary jóninde habarlady. Olardyń ishinde Memleket basshysynyń bastamasymen engizilgen jer qatynastaryn retteıtin túzetýler erekshe oryn alady.

Spıker Májilis maquldaǵan zań jobasy osy aıdyń aıaǵyna deıin Senattyń otyrysyna engiziletinin, sodan keıin qujat Prezıdentke qol qoıýǵa jiberiletinin aıtty.

Al saılaý zańnamasyna engiziletin ózgeristerge keler bolsaq, senatorlar atalǵan zań jobasynyń Májilis qaraýynan ótýin kútýde. Máýlen Áshimbaevtyń aıtýynsha, Senat bul máseleni mamyr aıynyń birinshi onkúndiginde qarap, tıisti zań jobasyn qabyldaýdy josparlap otyr.

Sonymen qatar Senat Tóraǵasy Parlamenttiń jyl basynan beri Eýrazııalyq ekonomıkalyq odaq aıasynda qol qoıylǵan 8 halyqaralyq shartty ratıfıkasııalaǵanyn jetkizdi. Qazirgi ýaqytta Armenııa men Qyrǵyzstannyń Eýrazııalyq ekonomıkalyq odaqqa qatysýyna baılanysty keıbir máselelerdi aıqyndaıtyn kelisimderdi ratıfıkasııalaý jumystary júrgizilip jatyr.

Máýlen Áshimbaev Qasym-Jomart Toqaevqa Senatta múmkindigi shekteýli jandar úshin ınklıýzıvti qoǵamdyq orta qalyptastyrý máselesi boıynsha jumys toby qurylǵany týraly aıtty. Bul jumys toby Ulttyq qoǵamdyq senim keńesiniń besinshi otyrysynyń qorytyndysy boıynsha Memleket basshysynyń tapsyrmasymen quryldy. Spıkerdiń aıtýynsha, zańnamaǵa engiziletin tıisti ózgerister men tolyqtyrýlar bıyl Eńbek jáne halyqty áleýmettik qorǵaý, Densaýlyq saqtaý mınıstrlikterimen birlesip ázirlenedi.

Senat Tóraǵasy Memleket basshysyna senatorlardyń qatysýymen ótetin aldaǵy birqatar halyqaralyq is-sharalar jóninde málimet berdi.

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar