Aımaqtar • 15 Sáýir, 2021

Shilikti aýylyn sý basty

35 ret kórsetildi

Pavlodar oblystyq tótenshe jaǵdaılar departamentiniń málimetinshe, 9-10 sáýirde Shilikti aýylyndaǵy oblystyq mańyzy bar jol men birneshe úıdi aýlasyn sý basty. Qazir departament mamandary qum salynǵan qaptarmen qarǵyn sýdy bógep, sýdy sorý jumystaryn júrgizýde.

– Bir apta buryn ǵana sý basý qaýpi bar aýyldardy aralap shyqtyńyzdar. Biraq keler qaýipti eskermedińizder. Jaǵdaıdy baqylaýǵa almaǵany úshin orynbasaryńyzdyń jaýapkershiligine qatysty shara qoldanyńyz. Shilikti aýy­lyndaǵydaı jaǵdaı endi qaıta­lanbaýy qajet. Jumysty baqylaýǵa alyńyzdar, – dedi oblys ákimi Ábilqaıyr Sqaqov departament basshysy Ernur О́tegenovke.

Osy oqıǵanyń aldynda ǵana departament basshylyǵy men mamandary aýdandardaǵy kóktemgi sý basý yqtımaldyǵy joǵary aýmaqtardy tik­ushaqpen aralap ótip, avtokólikpen júrý múmkindigi joq jerlerdegi sý deńgeıin teksergen edi. Biraq sol kezde shaǵyn ǵana Shilikti aýyly tikushaqtan kórinbeı qalǵan sııaqty. Aýyl aýdan ortalyǵynan 110 shaqyrym qashyqtyqta ornalasqan.

– Jol joq. Jolboldydan Shiliktige deıingi  20 shaqyrymdyq jol ábden tozyp bitti. Biz basqa eshteńe suramaımyz, tek joldy jóndep berseńizder eken. Kóktemde  aýdan men oblys ortalyǵyna barý  qıyndaıdy. Mı batpaq, jol ma, ne ekeni belgisiz. Osyǵan jyldar boıy tózip kelemiz, – deıdi turǵyndar.

Sý basqan sebebi sý ótkizý qubyrlary jasalmaǵan, eki kún boıy jaýǵan jań­byrdyń sýy tasqynǵa ulasqan. Aqtoǵaı aýdany ákimdiginiń málimetinshe, Jol­boldy aýyldyq aýmaǵyna qaraıtyn Shilik­tidegi 20 úıde 108 adam turady.

Aýdandaǵy Sholaqsor, Jalaýly aýyl­daryna jyl saıyn Aqmola ob­ly­syn­daǵy sý qoımasynan Sileti ózeniniń arnasymen tasqyn sý keledi. Jylda birneshe bóget jasalyp, azyq-túlik jáne eń qajetti taýarlar qory ákelinedi. Turǵyndar bul jaǵdaıǵa ábden úırenip ketken. Tipti buǵan deıin oblysqa Tótenshe jaǵdaılar mınıstriniń birinshi orynbasary Ibragım Qulshymbaev kelip, arnaıy jıyn ótkizgen-di. Iаǵnı, «Kóktem» respýblıkalyq komandalyq-shtabtyq oqý-jattyǵýlarynyń bas­talǵanyn, bıyl bul shara adamdardy shoǵyrlandyrmaı ótkizilip, mamandar quramyn sapqa turǵyzýdan jáne tehnıkany jınaýdan bas tartylǵanyn málim etken-di. Biraq sý basýǵa ushy­raǵan ýchaskelerde tasqyn saldary jer­gilikti ákimdikter men departament mamandarynyń halyq arasynda kóktemgi sý tasqyny kezeńindegi tártip týraly aqparattandyrý-profılaktıkalyq jumystaryn ótkizý qajettigin eskertti. Bul daıyndyq jumystary qandaı da bir shaǵyn aýyldardyń oqshaýlanyp qalýyn boldyrmaý úshin sý tasqyny jaǵdaıyna is júzinde daıyn bolýy kerektiginiń aldyn alýǵa jasalǵan shara edi.

– Oblysta sý tasqyny qaýpi boıyn­sha jaǵdaı turaqty jáne baqylaýda. Aqtoǵaı, Jelezın, Ertis aýdandarynda áli de qar bar. Qys boıy 800 myń tonnadan astam qar shyǵaryldy. Barlyq sý ótkizý qubyrlary tazartyldy. Aq­toǵaı aýdanyndaǵy Sholaqsor aýyl­y erekshe baqylaýda. Bul aýyl Sileti ózeniniń boıyn­da ornalasqan. Sileti sý qoımasynan 36 saǵat ishinde 64 mln tekshe metrden astam sý jiberilse, búginde sý jiberý kólemi azaıdy. Endi aldaǵy ýaqytta sý qoı­malarynan sý jiberýdiń ekinshi kezeńi bastalady. Sondyqtan jerg­ilikti ákimdikter baqylaýdy kúsheı­týi tıis, – dedi E.О́tegenov.

Al Baıanaýyl aýdanynda Qaraǵandy oblysynan keletin sý erekshe baqylaýǵa alynǵan. Qazir  Qalqaman – Baıanaýyl – Úmitker – Ýlıanov tas jolynyń 101-105-shi shaqyrymdarynyń aralyǵy baqylaýda. Joldyń 101-shaqyrymynda 2 sý jiberý qubyry ornatylǵan.

Qaraǵandy oblysyndaǵy Aqjar qoı­masynan jiberiletin sý kóleminiń tas joldy shaıyp ketý yqtımaldyǵy jo­ǵary bolǵandyqtan, barlyq qajetti teh­nıka men jabdyqtar, mashınalar daıyn tur. Onsyz da joly joq Shor­man, Kókdombaq jáne Jańatilek aýyl­daryndaǵy jaǵdaı qıyn, joldardy sý basyp ketse aýyldyqtarǵa tipten aýyr. Jańajol, Eskeldi aýyldary arasyn qosatyn oblystyq mańyzy bar avtomobıl jolyn da jyl saıyn sý basady. Sondaı-aq Baıanaýyl aýdanynda joldy sý basý qaýpi bola qalǵan jaǵdaıda «Qazavtojol» AQ jergilikti fı­lıaly tarapynan Qalqaman – Qara­ǵandy ara­lyǵyndaǵy tas jol boıyna aýyr júk kólikteri jiberilmeıtini esker­tildi.

Jalpy, oblysta sý tasqynynyń aldyn alý úshin 800 myń tonna qar shyǵa­rylyp,

1 365 sý ótkizý qubyry tazalanypty.

 

Pavlodar oblysy,

Aqtoǵaı aýdany

 

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar