Kóshbasshy jastar klýby jumysyn bastady

Sýma Chakrabartı kezdesý kezinde ózi­niń eńbek joly, qazirgi atqaryp júrgen ju­mysy týraly egjeı-tegjeıli baıandap, kósh­basshylyq týraly paıymdaryn ortaǵa saldy, klýb músheleriniń suraqtaryna jaýap berdi.

Prezıdent keńesshisi áńgime barysynda eldegi jańǵyrý prosesterindegi jastardyń róline kóbirek toqtal­dy. «Sizder – búginniń ózinde kóshbas­shy­syz­dar. Odan da mańyzdysy – keleshektiń kósh­bas­shysysyzdar», dep bastady áńgi­mesin Sýma Chakrabartı.

Ser Chakrabartıdiń usynystarynyń biri Prezıdenttik jastar kadrlyq rezervi músheleriniń arasynan mobıldi ózgeris komandalaryn qurýmen baılanysty. Atal­ǵan komandalar qyzmettiń naqty sala­lary boıynsha usynystardy taldaý jáne ázirleý arqyly memlekettik júıeni reformalaýǵa jáne ózgertýge úles qosa alady. Belgili bir ýaqyt ishinde (mysaly, 100 kún) komandalar belgili bir aımaqtyń damýyna pikirlerin usynady.

Eki saǵatqa sozylǵan suhbat barysynda Sýma Chakrabartı klýb músheleriniń saýaldaryna jaýap berip, strategııalyq josparlaý, aýmaqtyq damý, memlekettik basqarý júıesi, Qazaqstan ekonomıkasyna ınvestısııalardyń ulǵaıýy jáne basqa da taqyryptar tóńireginde áńgime órbitti.

Prezıdenttik jastar kadrlyq rezer­viniń músheleri Ser Chakrabartıdiń sarap­ta­malyq pikirin qorytyp, talqylanǵan máse­leler men usynystardy iske asyrý tetigin qosymsha qarastyryp, daıyndaýdy josparlap otyr.

«Prezıdenttik jastar kadrlyq rezerviniń músheleri – Qazaqstannyń patrıot azamattary. Qoǵamnyń ál-aýqa­tyn arttyrý jáne ómir súrý sapasyn jaq­sar­týdy, memlekettik qyzmet kórsetýdiń tıim­diligin qamtamasyz etýdi birinshi orynǵa qoıamyz. Ol úshin biz barlyq qolje­timdi syndarly alańdardy ashyq dıalog retinde paıdalanýǵa daıynbyz. Bizdiń rezervtegi áriptesterimiz óskeleń urpaq pen aldyńǵy býyn arasyndaǵy, memle­ket pen bıznes arasyndaǵy baılanys­ty­rýshy býynnyń rólin atqaryp otyr. Memlekettik qyzmettiń alańynda júr­gen­dikten, prosesterdegi, strategııalardaǵy qıyn­dyqtardy kórip, túsinip otyrmyz jáne osy ózgeristerge óz úlesimizdi qosa alamyz», deıdi klýb moderatory Aıdyn Baıedılov.

Klýb músheleri de bul kezdesý kókeıdegi kóptegen saýalǵa jaýap bergenin aıtady. «Jalpy, ashyq jáne taǵylymdy áńgime órbidi. Munda aıtylǵan negizgi ıdeıalar bolashaqta qabyldanatyn sheshimderge negiz bolady. Bul bizdiń rezerv múshelerin yntalandyrady jáne shabyttandyrady», deıdi jas maman Ásel Sársenbaeva.

Rezervtiń taǵy bir múshesi Almat Ah­matolla da óz oıyn aıtty. «Prezıdenttik jastar kadrlyq rezervi bastamashyl jas­tardy biriktirip, olarǵa Qazaqstandaǵy úderister men turaqty damýdy odan ári jetildirý úshin baılanys, pikir almasý alańyn usynyp otyr», deıdi ol.

Uıymdastyrýshylar is-sharany koronavırýs ınfeksııasynyń taralý qaýpin azaıtýdy qarastyratyn barlyq sanıtarlyq-profılaktıkalyq sharany saqtaı otyryp ótkizgenin aıta ketken jón.