Aımaqtar • 01 Shilde, 2021

Elordalyq kóshpeli brıgada eńbek ujymdaryn aralady

Nur-Sultanda qala turǵyndaryn KVI-ge qarsy vaksınasııalaý qarqyny artyp keledi. Qaladaǵy 100-den astam egý pýnktinen basqa, eńbek ujymdaryn vaksınasııalaýdy kóshpeli brıgadalar da júrgizedi. Kúnine orta eseppen bir brıgada 100-ge jýyq adamdy vaksınasııalaıdy, dep habarlaıdy elorda ákimdiginiń resmı saıty.

Aqmaral AǴZAMQYZY

Búgin mobıldi vaksınasııa toby Sine Tempore saýda úıine shyqty. Munda qyzmetkerlerden bólek, saýda ortalyǵynyń jalǵa alýshylary da kelip jatty.

«Vaksına alǵanyma biraz ýaqyt boldy, tıisinshe qyzmetkerlerimdi de úgittep keldim. Mobıldi vaksınasııa toptarynyń arqasynda ımmýndaýdan óttik. Bul óte yńǵaıly, jumys ýaqytymyz bólinbeıdi, eshkim eshqaıda ketpeıdi», dedi «Sine Tempore» AQ prezıdenti Tatıana Soı.

Vaksına alǵandar ózderin jaqsy sezinip otyrǵanyn aıtty. Olardyń kópshiligi ekpe alý týraly sheshimdi oılanyp baryp qabyldaǵan eken.

«SOO-ǵa mobıldi vaksınasııa keledi dep habarlady. Oılanbastan tirkeldim. Sebebi, bul ınfeksııany ózim juqtyrǵanmyn, qanshalyqty qaýipti ekenin de jaqsy bilemin. Bul qaýipten qorǵanǵan jón», dedi elorda turǵyny Saırangúl.

Aıta keterligi, vaksınasııalaýǵa belsendi túrde shaqyratyndar arasynda koronavırýspen aýyrǵandar kóp. Sebebi olar vırýspen ǵana emes, onyń saldarymen de kúresý qanshalyqty qıyn ekenin biledi.

«Vaksınasııadan keıin ózimdi jaqsy sezinemin. Bul indetti osydan tórt aı buryn juqtyrǵanmyn. Ekinshi ret juqtyrǵym kelmeıdi. Elimizdiń barlyq azamatyn vaksına alýǵa shaqyramyn. Bul bizdi koronavırýstan qorǵaıdy», dedi saýda úıiniń qyzmetkeri Arben Djorı.

Vaksınasııa – bul ujymdyq ımmýnıtetti damytýdyń jáne ádettegi ómirge oralýdyń jalǵyz tásili. Eýropa elderi men fýtboldan ótip jatqan Eýropa chempıonatynyń (jartylaı jankúıerge tolǵan stadıondar) tájirıbesi indetti jeńýge bolatynyn kórsetedi. Vaksınasııalanǵan azamattardyń sanyn kóbeıtý kerek. Medısına qyzmetkerleri elorda turǵyndarynyń vaksınasııaǵa daıyn ekenin aıtty.

«Naýryz aıynan bastap vaksınasııalaý úshin eńbek ujymdaryna baryp júrmiz. Kúnine eki ret baratyn kezimiz bolady. Ortasha eseppen 50-ge jýyq adam vaksına alýǵa keledi. Keıde odan da kóp bolyp jatady. Bizdiń emhananyń ózinde úsh mobıldi top bar. О́tinimder iri zaýyttardan, áýejaılardan jáne vokzaldardan, sondaı-aq shaǵyn kompanııalardan túsip jatady. Vırýstyń jańa qaýipti shtammy paıda bolǵanyn, onyń mýtasııalanǵanyn eskerer bolsaq, vaksınasııadan bári ótýi qajet. Bul halyqtyń azamattyq boryshy», dedi №14 emhana bólimshesiniń meńgerýshisi Esbol Omarov.

Onyń aıtýynsha, elorda ákimdigi júrgizgen jumystyń nátıjesinde vaksına alýǵa keletin jurttyń qatary kóbeıe bastady. Qala turǵyndary vaksınasııa máselesinde ózderiniń azamattyq ustanymdaryn belsendi túrde kórsetip, ımmýndaýdan ótip jatyr.

Eske sala keteıik, buǵan deıin elorda ákimi Altaı Kólginov vaksınasııalanǵandar arasynda eki bólmeli páterdiń utys oıyny ótkiziletinin habarlaǵan. Oǵan vaksınanyń birinshi komponentin 25 maýsym men 31 tamyz aralyǵynda alǵan azamattar ǵana qatysa alady.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz