Koronavırýs • 22 Shilde, 2021

Toı da, naýqas ta azaıar emes

644 ret kórsetildi

Qazir koronavıýrs ınfeksııasy órship turǵan óńirlerdiń qatarynda Atyraý da bar. Sońǵy kúnderi munda qaýipti vırýsty juqtyrý deregi qaıta kóbeıdi. Munaıly óńirdegi osyndaı alańdatarlyq ahýal karantındik shekteý sharalaryn kúsheıtýge májbúr etti. Sol sebepten oblystyń bas memlekettik sanıtar dárigeri Mádenıet Tanaýovtyń jańa qaýlysy 17 shildede kúshine endi. Soǵan sáıkes Ashyq jobasyna qatysatynyna qaramastan, birneshe nysannyń jumysyn toqtatýǵa sheshim qabyldandy.

«Kópshilik is-sharalardy, sondaı-aq otbasylyq, estelik is-sharalardy, onyń ishinde úıde jáne jappaı adamdar jınalatyn ózge de is-sharalardy ótkizý, oıyn-saýyq obektileriniń, banket zaldarynyń, jabyq úı-jaıdaǵy, qoǵamdyq tamaqtaný obektilerindegi balalar oıyn-saýyq ortalyqtary men attraksıondardyń, oıyn alańdarynyń (aýladaǵylardy qospaǵanda), kalıan, býkmekerlik keńselerdiń, oıyn klýb­tarynyń, túngi klýbtardyń, merekelerdi uıymdastyrý qyzmeti toqtatylsyn», delingen qaýlyda.

Sondaı-aq kórermenderi bar sport­tyq is-sharalardy ótkizýge, ashyq aýa­daǵy attraksıondardyń (demalys saıa­­­baqtarynda, alańdarda), basseın­deri bar akvaparkterdiń jumysyna, alań­dardaǵy, saıabaqtardaǵy, skverler­degi, jaǵa­laýdaǵy balalardyń, eresek­ter­­diń jyljymaly oıyn quraldarynyń usaq bólshek saýdasyna, jalǵa berýge, qalaaralyq, oblysaralyq, qalalyq júıeli jáne júıeli emes avtobýs jáne shaǵyn avtobýs tasymalyna, jına­lys­tar, keńester, semınarlar, kon­feren­sııa­­lardy oflaın rejimde ótki­zýge ty­ıym salyndy.

Osyndaı kúsheıtilgen shekteý sharalary engizilgenine qaramastan, 20 shildede 348 adam qaýipti vırýsqa shal­dyqqany anyqtaldy. Oblystyq densaýlyq saqtaý basqarmasynyń baspasóz qyzmeti usynǵan málimetine qara­ǵanda, sońǵy táýlikte Atyraý qala­synda 212 naýqas tirkeldi. Teńiz ken ornynda 34 jumysshy indet juq­tyrdy. Jylyoı aýdanynda – 43, Qurmanǵazyda – 14, Isataıda – 13, Inderde – 11, Maqatta – 10, Mahambette – 10, Qyzylqoǵa aýdanynda bir adamnan koro­navırýs ınfeksııasynyń belgisi tabylyp otyr.

«О́ńirdegi ınfeksııalyq stasıonarlarda 1 105 naýqas em qabyldap jatyr. Onyń ishinde aýdandardaǵy stasıonarlarda – 271, №2 oblystyq
aýrýhanada – 203, modýldik aýrýhanada – 188, temir jol aýrýhanasynda – 107, kardıologııalyq ortalyqta – 101, ftızıo­pýlmanologııa ortalyǵynda 96 naýqas bar. Jylyoı aýdanynda ornalasqan Teńiz ken ornyndaǵy ın­feksııalyq stasıonarda 139 pasıent,­ óz úıinde emdelý úshin 2 399 adam oqshaýlandy. Infeksııalyq stasıo­nar­lardyń 113 oryndyq jan­saq­taý bólimderinde jatqan 65 naýqastyń jaǵdaıy aýyr ekeni belgili bolyp otyr. Naýqastardyń on biri ókpeni jasandy jeldetý apparatyna qosylǵan. Qazir mundaǵy júkteme 57,5%-dy qurady», dep málimdedi basqarmanyń baspasóz qyzmetinen.

Atyraýdaǵy №2 oblystyq ınfek­sııalyq aýrýhananyń dırektory Maǵ­jan Sıdjanovtyń aıtýynsha, júkti analar qaýipti vırýsty kóp juqtyrǵan. Máselen, 20 shildede modýldik aýrýha­nanyń ınfeksııalyq stasıonarynda koronavırýs ınfeksııasymen jatqan naýqastar arasynda 87 júkti, bosanǵan 10 áıel men jańa týǵan 7 náreste bolǵan.

– Bıylǵy naýryzdan beri modýldik aýrýhanada 88 sábı dúnıege keldi. Sábılerden koronavırýs ınfeksııasyna qarsy alynǵan PTR-test teris nátıje kórsetti. Alaıda júkti áıelderde qaýip­ti vırýsty juqtyrý qaýpi joǵary ekeni baı­qalyp otyr. Sondyqtan ómirge sábı ákelýdi josparlaǵan nemese júkti áıel­derge qaýipti ınfeksııadan barynsha qorǵanýǵa shaqyramyn, – deıdi M.Sıdjanov.

Oblystyq densaýlyq saqtaý bas­qarmasy baspasóz qyzmetiniń aqpa­ratyna qaraǵanda, modýldik aýrýhanada jatqan emdelýshi ózin kúshtep ustap otyrǵany týraly vıdeo jarııalaǵan. Tipti emdelýshiniń anasy aýrýhana ishine basa-kóktep kirip, dárigerlerdiń jumysyna kedergi keltirgen. Sóıtip ózge emdelýshilerdiń mazasyn alyp, shý shyǵarǵan.

«Emdelýshiniń anasy aýrýhana dári­gerleriniń emdik sharalary kórsetilip jatqany týraly aıtqanyna qulaq aspady. Sondaı-aq emdelýshiniń ózi Bas memlekettik sanıtarlyq dárigeriniń buıryǵyn buzyp, aýrýhananyń ishin vıdeoǵa túsirgen. Osyǵan baılanysty №2 oblystyq aýrýhananyń ákimshiligi jal­ǵan aqparat taratyp, ony jarııa etkeni úshin isti sotqa berýge daıyn», dep málim etti aýrýhananyń ákimshiligi.

Atalǵan aýrýhanaǵa túskende emdelý­shide koronavırýs ınfeksııasynyń bel­gisi anyqtalǵan. Sondaı-aq ekijaqty pnevmonııa dıagnozy qoıylǵan eken.

«Anasy men kúıeýi ekijaqty zańdy kýágerlerdiń qatysýymen qolhat jazyp, emdelýshi úıine jiberildi. Endi Maham­bet aýdany turǵynynyń densaýlyǵy ýchas­kelik dárigerlerdiń baqylaýynda bolady», dep habarlady aýrýhana ákim­shiligi.

Al oblystyq polısııa departamen­tiniń bastyǵy Qamza Úmbetqalıevtiń málimetinshe, karantındik shekteýdiń kúsheıtilýine baılanysty monıto­rıngtik toptardyń jumysy shıratyldy. Top músheleri qalada bir kúnde karantındik shekteý talaptaryn buzǵan 9 kásipkerlik nysandy anyqtady. Monıtorıngtik top 17 shildede Beıbarys kóshesinde orna­lasqan Continental Gold meıramhanasynda ótip jatqan toıdyń ústinen tústi. Bul meıramhanadaǵy toıǵa 50-den asa adam qatysqan.

Sondaı-aq sol kúni Atyraý shaǵyn aýdanyndaǵy «Akvaraı» akvaparki karantın talaptaryn buzyp, jumys istegen. Zheka’s doner house kafesi tún ortasynda kelýshilerdi qabyldaǵan. Alaıda bul nysannyń ıesi túsinik berýden bas tartqan.

Mine, «qyzyl aımaqtaǵy» Atyraý­dyń búgingi ahýaly osylaı qubylyp tur. Demek, jurt jaqynyna janashyr bolý­dy áli túsinbegen sekildi.

 

Atyraý oblysy

 

Sońǵy jańalyqtar

Shymkentte taǵy bir aýdan qurylady

Qoǵam • Búgin, 16:58

Almatyda qant qymbattap barady

Qoǵam • Búgin, 16:45

Dollar baǵamy ósti

Qarjy • Búgin, 16:12

Dollar qymbattady

Qarjy • Búgin, 10:59

Elordada áýe shary qulady

Oqıǵa • Búgin, 10:37

Qarjy mınıstriniń orynbasary taǵaıyndaldy

Taǵaıyndaý • Búgin, 10:24

EQYU Bas hatshysy Qazaqstanǵa keledi

Parlament • Búgin, 09:31

Uqsas jańalyqtar