Táýelsizdiktiń 30 jyldyǵy • 05 Tamyz, 2021

«Ordaly otyz is»

134 ret kórsetildi

О́ńirlik kommýnıkasııalar qyzmeti alańynda ótken brıfıngte Ishki saıa­sat basqarmasynyń basshysy Erlan Qusaıyn Qaraǵandy oblysynda Táýelsizdiktiń 30 jyldyq torqaly toıyna arnalǵan is-sharalar men basqa da mańyzdy sharýalardy uıymdastyrýdyń jaı-japsary týrasynda egjeı-tegjeıli aıtyp berdi.

– Osy jyldyń eń basty oqıǵasy – el Táýelsizdiginiń otyz jyldyǵy. Mereıtoıdy eń aldy­men azamat­tarymyzdyń ál-aýqa­tyn jaq­sartýǵa baǵyttalǵan ıgi ister­men atap ótýdi basty maqsat retinde qarastyryp otyrmyz, – degen spıker bul baǵytta merekelik sıpattaǵy qandaı da bir saltanatty is-sharalardyń josparlanbaıtynyn atap ótti.

Mysaly, oblysta Táýelsizdiktiń 30 jyldyǵyna arnalǵan óńirlik josparǵa 187 is-shara engizilgen eken. Onyń ishinde bes halyqaralyq, alty respýblıkalyq, 13 oblystyq jáne 163 qalalyq jáne aýdandyq is-sharalar bar. Budan bólek, «Ordaly otyz is» arnaıy jobasynyń da ázirlengenin aıta ketken lázim.

Osy oraıda spıker Táýelsizdik mereıtoıyn oblystyń laıyqty tartýlarmen qarsy alatynyn atap ótti. О́ńir kartasynda Yutong avtobýstar men arnaıy tehnıkalar shyǵaratyn «Saran» ındýstrııalyq aımaǵynyń paıda bolǵanyna toqtaldy. Sondaı-aq, ol munda jylyna jeńil jáne júk kólikterine arnalǵan 3,5 mln dana shına óndiretin zaýyt qurylysynyń bastalǵanyn da aıtyp ótti.

Sonymen qatar Táýelsizdik jyldary oblysta Qaz Carbon syndy asa iri kómir baıytý kompanııasy­nyń ashylǵanyn, Saran qalasyn­daǵy qýaty 100 MVt bolatyn kún elektr stansasynyń el ıgiligi úshin jumys isteı bastaǵanyn da oblys ekonomıkasyndaǵy oń ózgeristerdiń mysaly retinde ataı ketti.

Merekeli jylda qaıyrymdylyq is-sharalaryna aıryqsha kóńil bólinbekshi. Onyń ishinde respýb­lıkalyq deńgeıdegi «Qaıyrymdy ister marafony» jalpyulttyq jobasyn aıtýǵa bolady. Aksııa aıasynda jyl basynan beri oblys­ta 21233 adam qatysqan 2642 is-shara ótkizilipti. Qarttarǵa, jalǵyz basty analarǵa, kópbalaly, az qamtylǵan otbasylarǵa azyq-túlik sebetteri berilip, basqa da kómek kórsetilgen.

– Sonymen qatar kóptegen kásip­ker­ler, sharýa qojalyqtary, úkimet­tik emes uıymdar medısı­nalyq meke­melerdi qajetti qural-jab­dyq­tarmen jáne dári-dármektermen qam­tamasyz etý boıynsha úlken jumys atqardy. Bul iske oblys turǵyndary, eriktiler de óz úlesterin qosty, – dep atap ótti E.Qusaıyn.

Qazirgi ýaqytta oblysta erik­tiler uıymynyń óte belsendi ju­mys is­tep júrgendigi atap ótildi. Mysaly, óńirde áreket etetin 97 volonterlik uıym men topqa jeti myńǵa jýyq jas múshe eken. Bul jerde bıznes-qoǵamdastyqtyń jeke volonterlik bastamalardy qoldap otyraty­nyn basa aıta ketken jón. Mysaly, «Qaıyrymdy urpaq» qaıyrymdylyq aksııasy aıasynda 137 bala jalpy somasy bes mıllıon teńgeden astam kómek alǵan.

Osy oraıda «El tiregi – Elbasy» ıgi ister aksııasy boıynsha iske asqan sharýalardy da erekshe ataýǵa bolady. Atalǵan is-sharaǵa oblystyń 1500-den astam eriktisi qatysyp, bıylǵy jyldyń birinshi jartysynyń ózinde áleýmettik jaǵynan az qamtylǵan otbasylarǵa 23 tonna azyq-túlik, sondaı-aq 769 birlik jeke qorǵanysh qural­dary taratylypty. Munyń ózi pandemııa kezinde qınalyp qalǵan turǵyndardyń eńse tikteýine kádimgi­deı ıgi áserin tıgizgen.

Sonymen qatar atalǵan brı­fıngte oblystaǵy ekologııa máse­lesi týraly da az-kem áńgime boldy. Ishki saıasat basshysy ekologııalyq ahýaldyń burynǵydan da ózektirek bola túskenin atap ótti.

– Qazirgi ýaqytta «Taza tabıǵat» ulttyq jobasy iske asyrylýda. Oblysta ózender men sý qoımalaryn tazartý, aǵash otyrǵyzý boıynsha úlken jumystar atqaryldy. Jyl basynan beri óńirde osyndaı bes myń­nan astam is-shara ótkizildi. Bul jumys odan ári jalǵasatyn bolady, – dedi ol.

Brıfıngte Erlan Qusaıyn al­daǵy qarasha aıynda Qasym Aman­jolovtyń mereıtoıyna oraı «Qasym» úıiniń ashylatyndyǵy týraly qýanyshty habardy jetkizdi. «Bul – zııaly qaýym úshin, jalpy, barsha qaraǵandylyqtar úshin erekshe tartý bolmaq», dep atap ótti oblystyń ishki saıasatyna jaýapty maman. 

Jalpy, oblysta daýylpaz aqyn­nyń 110 jyldyq mereıtoıyna arnalǵan is-sharalar josparly túrde ótkizilýde. Mysaly, osydan biraz buryn «Qasym álemi: poezııa, tulǵa, tarıh» taqyrybynda onlaın-semınar uıymdastyrylǵan. Al E.Bóketov atyndaǵy Qaraǵandy ýnıversıtetinde «Qasymtanýdyń qazirgi máseleleri» taqyrybynda  halyqaralyq dóńgelek ústel ótti.

Sonymen birge oblysta Alash qaıratkerleri – Álıhan Bókeıhannyń 155, Jaqyp Aqbaevtyń 145, Álimhan Ermekovtiń 130 jyldyq mereıtoılary da umyt qalmaı, túrli deńgeıdegi basqosý, dóńgelek ústel jáne konferensııalar negizinde atalyp ótkenin aıta ketken jón.

Sonymen qatar spıker bıyl Álıhan Bókeıhan esimin kenshiler astanasyndaǵy Oktıabr aýdanyna berý jumystarynyń qolǵa alynǵanyn málim etti. Bul mańyz­dy is-shara eldegi ulttyq sanaq ju­mysy aıaqtalǵan soń, el Táýel­siz­­diginiń 30 jyldyq merekesi qar­sa­ńynda tolyq aıaqtalady dedi ol.

Sondaı-aq Erlan Qusaıyn brıfıng barysynda bıylǵy jyldyń basty oqıǵasy – Ulytaý óńiri­n­de «Joshy han» tarıhı-máde­nı kesheniniń ashylatynyn málim etip, bul aıtýly oqıǵanyń ulttyq qun­dylyqtardy nasıhattaý jolyndaǵy mańyzyn erekshe atap ótti.

 

Qaraǵandy oblysy

 

Sońǵy jańalyqtar

Kabýlda jarylys boldy

Oqıǵa • Búgin, 17:08

Otandyq fılmderdiń úlesi artady

Qazaqstan • Búgin, 16:20

Almatyda baqylaý kúsheıtildi

Koronavırýs • Búgin, 14:08

Aqsha emes, abyroı qymbat

Boks • Búgin, 13:04

Kúrshim ózeni de lastana bastady

Ekologııa • Búgin, 12:38

Tiliksiz ota jasaldy

Medısına • Búgin, 12:20

Uqsas jańalyqtar