Aımaqtar • 20 Tamyz, 2021

Qoıtastar mańynda saıabaq salynady

Sarqan aýdanynda tabıǵattyń erekshe syıy – qoıtastar kóptep kezdesedi. Ártúrli pishinderimen erekshelenip turatyn tastarǵa kóz tastap qarar bolsań, keń jaılaýdyń eteginde jaıylyp júrgen otarly qoı tárizdi sýret túziledi. Sondyqtan bul tastardy sarqandyqtar «Qoıtas» atap ketken. Mundaı qoıtastardy Jetisý ólkesinde, tek saıaly Sarqanda ǵana kezdestirýge bolady.

Qalmahanbet MUQAMETQALI

Endi osy Sarqan aýdanynda qoıtas arasynda jaıǵasqan erekshe saıabaq ashylmaq. Aýmaǵy 6 gektardy quraıtyn saıabaqta jaıaý júrginshiler joly, zamanaýı fýtbol, skeıdbord, strıt vorkaýt jáne balalar alańdary bolmaq. Sondaı-aq kúrkeler, oryndyqtar jáne túrli jaryq shamdar boı kótermek.

– Qoıtas saıabaǵyn salý eki kezeńmen júzege asyrylady. Bıyl jol, aryq, jaryq júıelerin retke keltiretin bolsaq, sodan keıingi jumystar, ol árıne kóshetter otyrǵyzý, tas arasyna qosymsha demalys oryndaryn jasaý. Sonymen qatar bolashaqta saıabaq ortasynda ornalasqan jasandy kólshikti jańa qalypqa keltirip, arnaıy jaz aılarynda sýǵa shomylý ornyn ashýdy qolǵa alamyz, – deıdi Sarqan qalasynyń ákimi Amantaı Muqanov.

Qaıta jandandyrý jumystaryn mamyr aıynda bastaǵan «Han Tengrı» seriktestigi atalǵan demalys ornyn qazan aıynda el ıgiligine usynbaq. Qazir qurylys aýmaǵynda jıyrma beske jýyq qala turǵyny maýsymdyq jumyspen qamtylǵan. Solardyń biri 18 jastaǵy Nurken Erjanuly.

– Bizder úshin jasalynyp jatqan saıabaqtyń bir tasyn bolsyn qalap jatqanyma qýanamyn. Saıabaq ashylǵan soń osy jerde sportpen aınalysyp, bos ýaqytymyzdy dostarymyzben ótkizetin orynǵa aınalady dep senemin, – deıdi jas qurylysshy.

Sonymen qatar saıabaqty retke keltirý kezinde qulaýǵa az qalǵan eski aspaly kópir de qaıta jasalyp jatyr eken. Buǵan Sarqan qalasynyń turǵyndary dán rıza. Aıtpaqshy, Qoıtas saıabaǵy qurylysynyń birinshi kezeńine jergilikti bıýdjetten 62 mln teńge qarajat bólingen.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz