Sport • 23 Tamyz, 2021

Basty maqsat – el úmitin aqtaý

81 ret kórsetildi

Erteń Japonııanyń bas shahary – Tokıoda XVI jazǵy Paralımpııa oıyndarynyń jalaýy jelbireıdi. Tórtjyl­dyqtyń basty dodasynda elimizdiń atynan 25 sportshy 7 sport túrinen synǵa túsedi. Bul – Qazaqstannyń Paralımpıada tarıhynda eń kóp sportshy qatysatyn oıyny bolmaq. Enshi­mizdegi 25 joldamanyń altaýyn para dzıýdoshylarymyz jeńip alǵan. Sporttyń bul túrimen kórý qabileti nashar nemese kózi kórmeıtin sportshylar aınalysady.

Tokıo tórindegi tatamıde Qa­­­zaqstan quramasynan halyq­ara­lyq dodalardyń jeńim­paz­da­rynan quralǵan elimizdiń eń myq­ty degen balýandary altyn júl­de úshin beldesedi. Atap aıtar bolsaq, erler básekesin­de 73 kılo salmaqta byltyr Grý­zııa astanasy – Tbılısıde ót­ken Álem kýbogynyń jeńim­pa­zy – Dáýlet Temirjan, Rıo Pa­ra­lımpıadasynyń qatysý­shysy – Ánýar Sarıev (60 kg) jáne Ǵ­alymjan Smaǵululy (81 kg) bel­desse, qyzdar arasyndaǵy bel­desýde túrli halyqaralyq jarys­tardyń júldegerleri – Janbota Amanjol (90 kg), Daıana Fedosova (57 kg) jáne Zarına Baıbatına (+70 kg) el namysyn qorǵaıdy.

Para dzıýdodan ulttyq qura­ma komandasynyń bas jattyq­tyrýshysy Jandos Qııanov Pa­ra­­lımpııa oıyndarynda ár shá­kir­ti­nen zor úmit kútetinin jetkizdi.

– Bizdiń basty maqsaty­myz – Paralımpııa oıyndarynda Qa­zaq­stan Týyn kókke kóterip, elimiz­diń Ánuranyn shyrqatý. Jalpy, Paralımpıadaǵa joldama alýdyń jáne oǵan qatysýdyń ózi úlken mártebe. Osy oıyndarǵa joldama alý úshin sportshylarymyz talaı syndardan ótip, birqatar baıraqty dodada ózderiniń myqtylyqta­ryn dáleldedi. Shákirtterimniń tek osy jylǵy jetistikterin aıtar bolsam, Janbota Aman­jol, Ǵalymjan Smaǵululy jáne Daıana Fedosova Ulybrıtanııada ót­ken Gran-prı jarystaryna qaty­­syp, júldeli oryndarǵa ıe bol­dy. Baký (Ázerbaıjan) qalasyn­da ótken Gran-prı kezeńinde Ánýar Sarıev pen Janbota Aman­jol úzdik óner kórsetip, jarystyń qola júldelerin jeńip aldy. Al Zarına Baıbatına men Ǵalymjan Smaǵululy Antalııa (Túrkııa) qalasynda ótken halyqaralyq týrnırden altyn jáne kúmis ­medal oljalap, elge abyroımen oraldy. Bul tek osy jyl­dyń ishindegi iri jetistikterdiń bir parasy ǵana. Buǵan deıingi jetis­tikterimiz de jetip jatyr. Son­dyqtan aldaǵy Paralım­pııa oıyndarynda baq synaıtyn shákirtimniń árqaısysyna artatyn úmitim zor, – deıdi bas jattyqtyrýshy.

Para dzıýdo Qazaqstan qura­ma komandasy Tokıo-2020 Para­lımpııa oıyndaryna tyńǵylyq­ty daıyndaldy. Sportshylary­myz sońǵy daıyn­dyǵyn aldy. Qazirgi tańda sport­shylardyń densaýlyǵyna erekshe kóńil bólinip, sanıtarııa talaptaryn qatań saqtalýda.

– Qazirgi tańda para dzıýdo barlyq elde qarqyndy damyp keledi. Sondyqtan eshqandaı eldi bólip-jaryp ataı almaımyn. Jalpy Paralımpııa oıyndaryna álemdik reıtıng boıynsha eń myqty degen sportshylar ǵana qatysatyny belgili, olardyń osaly joq. Doda tartysty bolary sózsiz. Eń bastysy bizdiń sportshylar eshkimnen de kem emes jáne jospar boıynsha jaqsy daıyndalyp jatqandyǵyn ǵana aıta alamyn, – deıdi Jandos Qııanov.

Keıingi jyldary elimizde pa­ra dzıýdo salasy qarqyndy damyp keledi. Qazir ýaqytta para dzıýdomen elimizdiń 11 oblysy men 3 qalasyndaǵy 100-den astam sportshy daıyndalyp júr. Sportshylardyń jetistikteri aýyz toltyryp aıtarlyqtaı. My­saly, Qazaqstan para dzıýdo qurama komandasy 2017 jyly Tashkent (О́zbekstan) qalasyn­da ótken Azııa chempıonatynyń jáne 2018 jyly Djakartada ótken Azııa Para oıyndarynyń qola júldegeri atandy. Al 2019 jylǵy Azııa chempıonatynyń komandalyq esseppen alǵanda jeńimpaz atanyp, bas júldege qol jetkizdi.

Sondaı-aq eldegi Para dzıý­do sportynyń damýyn Para­lım­pıada oıyndarynda jeńip alǵan joldama sany arqyly da baıqaýǵa bolady. Máselen, 2016 jyly Rıoda ótken Paralımpııa oıyndarynda 2 balýanymyz óner kórsetken bolsa, bıylǵy Tokıo oıyndaryna 6 balýan joldama aldy.

Aıta keteıik, bıyl Qazaqstan táýelsiz el retinde altynshy ret Para­lımpıadaǵa qatysady. 24 tamyz ben 5 qyrkúıek ara­lyǵynda ótetin XVI jazǵy Para­lımpııa oıyndarynda Qazaqstan quramasynan 25 parasportshy sporttyń 7 túri boıynsha el namysyn qorǵaıdy. Qazaqstandyq sportshylar Tokıo-2020 Para­lımpııa oıyndaryna júzýden – 7, dzıýdodan – 6, paýerlıftıngten – 5, taekvondodan – 3, jeńil atletıkadan – 2 jáne kanoe men nysana kózdeýden bir-bir joldama jeńip alǵan bolatyn.

Buǵan deıin Jazǵy oıyndarǵa Qazaqstan quramasynan 1996 jylǵy Atlanta Paralım­pıa­da­syna – 12, 2000 jylǵy Sıd­neıdegi dodaǵa – 2, Afınydaǵy (2004) básekege – 8, Beıjińge (2008) – 3, Londonǵa (2021) – 7 jáne 2016 jylǵy Rıo-de-Janeırodaǵy oıyndarǵa – 10 sportshymyz barǵan edi. Osy Para­lımpııa oıyndaryndaǵy al­ǵashqy júldemiz dál osy Rıo tó­rindegi básekede túsken bola­tyn. Sol jyly júzýden Zýl­fııa Gabıdýlına chempıon atansa, paýerlıftıngten Raýshan Qoı­shybaeva kúmis júldege ıe boldy.

Tokıodaǵy Oıynnyń ashylý saltanatynda Qazaqstannyń kók Týyn taekvondodan eki dúr­kin álem chempıony, úsh dúrkin Azııa chempıony jáne eki dúrkin Eýropa chempıony Nurlan Dom­baev pen paýerlıftıngten Rıo Para­lım­pıadasynyń kúmis júl­degeri Raýshan Qoıshybaeva kóterip shy­­ǵady.

Sońǵy jańalyqtar

Áýezov jáne túrki álemi

Rýhanııat • Keshe

Áskerdegi álimjettik

Qoǵam • Keshe

Ideologııa

Rýhanııat • Keshe

Meıirim men qatygezdik

Rýhanııat • Keshe

Eski men jańa arasy

Rýhanııat • Keshe

Bı padıshasy

Rýhanııat • Keshe

Sapa qaıtse jaqsarady?

Qazaqstan • Keshe

Qaıyrymdylyqtyń úlgisi

Qazaqstan • Keshe

Saq dáýiriniń tasy

Tanym • Keshe

Uqsas jańalyqtar